Le Yesu Wādi Namani?

VUMIJA MU

Bilonodolola Bible

I kutupu muntu uyukile mwādi mwikadile Yesu, mwanda Bible kalombwele mwaādi umwekala ku ngitu. Kino kilombola’mba muswelo wādi wikēle Yesu ku ngitu keudipo na mvubu. Inoko Bible witupa milangwe imo ya mwādi mumwekela Yesu.

Mumwekelo: Yesu wādi Muyuda, kadi padi wāpyene kudi inandi mumwekelo wa bene Semite. (Bahebelu 7:14) Na bubine kādipo umweka mu muswelo wa pa bula. Difuku dimo, wābombolokele wātamba ku Ngadilea, wāenda ku Yelusalema bantu kuyuka mpika. (Yoano 7:10, 11) Kadi mobimwekela bantu kebādipo bapēlelwa kumujiula nansha ke mu bukata mwa bandi bana ba bwanga. Vuluka’mba Yudasa Isakadiota wānenenwe kusokola Yesu ku kibumbo kilumbile bya bulwi kyākamukwete.—Mateo 26:47-49.
Bula bwa nywene: Mobimwekela Yesu kādipo na nywene milampe mwanda Bible unena’mba “nywene milampe idi bumvu ku mwana-mulume.”—1 Bene Kodinda 11:14.
Myevu: Yesu wādi na myevu. Wādi ulonda kijila kya Bayuda, kyādi kipeleje bana-balume batame “konakanya ku mfulo kwa myevu [yabo].” (Bene Levi 19:27; Bene Ngalatea 4:4) Kadi Bible wisambila pa myevu ya Yesu mu bupolofeto bwisambila pa masusu andi.—Isaya 50:6.
Umbidi: Bintu byonso bilombola’mba Yesu wādi mupuñame. Mu mwingilo wandi, wādi wenda makilometele mavule. (Mateo 9:35) Wātōkeje tempelo ya Bayuda misunsa ibidi, wākuvumika mameza a bantu bādi bashinta lupeto, ne kupanga banyema na lusonde. (Luka 19:45, 46; Yoano 2:14, 15) Dibuku dimo (McClintock and Strong’s Cyclopedia) dinena’mba: “Nsekununi yonso ya busapudi ilombola’mba [Yesu] wādi na bukomo mu ngitu ne na bukomo bwa ngitu.—Volime IV, paje 884.
Mumwekelo wa mpala: Yesu wādi na nsangaji ne na lusa, kadi bino bintu byādi bimwekela ku mpala yandi. (Mateo 11:28, 29) Bantu ba miswelo yonso bādi bamukimba ebasenge ne kwibakwasha. (Luka 5:12, 13; 7:37, 38) Enka ne bana bādi beivwana biyampe shi badi nandi.—Mateo 19:13-15; Mako 9:35-37.

Milangwe ya bubela pa mumwekelo wa Yesu

Mulangwe wa bubela: Bantu bamo banenanga’mba Yesu wādi ufwaninwe kwikala mwine Afrika mwanda mukanda wa Kusokwelwa udingakanya nywene yandi na butonge ne binyantyilo byandi pamo bwa “mukuba mulumbuluke.”—Kusokwelwa 1:14, 15.

Bubine: Mukanda wa Kusokwelwa i mulombolwe “mu biyukeno.” (Kusokwelwa 1:1) Nywene ya Yesu ne binyantyilo byandi i bitelwe mu muneneno wa kyelekejo mwanda wa kwelekeja ngikadila ya Yesu pa kupwa kusangulwa kwandi, ke mwandapo wa kulombola mumwekelo wandi wa ngitu paādi pano pa ntanda. Pa kunena’mba “mutwe [wa Yesu] ne nywene yandi byadi bitōka tō bwa myoya itōka, pamo’nka bwa mashika mekwate,” Kusokwelwa 1:14 wingidija musombelo bu kintu kya kudingakenya’po, ke bupungapo. Kino kyelekeja tunangu twawāikele nato mwenda myaka. (Kusokwelwa 3:14) Uno vese kadingakanyangapo mwādi mwikadile nywene ya Yesu na butonge nansha kudingakanya mwādi mwikadile nywene yandi na mashika mekwate.

Binyantyilo bya Yesu byādi bimweka “pamo bwa mukuba mulumbuluke ukitamba mu nkelwa ya mudilo.” (Kusokwelwa 1:15) Kadi mpala yandi yādi “pamo bwa dyuba ditēma bininge.” (Kusokwelwa 1:16) Byokekudipo lukoba lwa uno musombelo, kino kimonwa kifwaninwe kwikala kyelekejo, kilombola Yesu musanguke “wikele mu kitōkeji kekifikika.”—1 Temote 6:16.

Milangwe ya bubela: Yesu wādi muzoze kadi wampikwa bukomo.

Bubine: Yesu wādi mukankamane. Kimfwa, wēsokwele aye mwine ku kibumbo kilumbile bya bulwi kyāendele kukamukwata. (Yoano 18:4-8) Yesu wādi ufwaninwe kwikala mukomo ku ngitu mwanda wāingile bu sendwe wa mbao, wingidija bingidilwa bya makasa.—Mako 6:3.

Penepa, mwānda waka Yesu wāsakile bamuseleje’ko mutyi wa masusu? Ne mwanda waka wābadikile kufwa kumeso kwa bantu bobēbepaile nabo? (Luka 23:26; Yoano 19:31-33) Kumeso’tu kwa kwipaya Yesu, umbidi wandi wādi kala ke mukōke bininge. Wākesheshe bufuku bonso, mwanda mutyima wādi umusansa. (Luka 22:42-44) Bayuda bāmususwile bufuku, kadi lubanga nalo bene Loma bamuseleja mutyi wa masusu. (Mateo 26:67, 68; Yoano 19:1-3) Padi bino bintu byo byālengeje afwe bya bukidibukidi.

Mulangwe wa bubela: Yesu wādi bya bulanda, muntu mufītwe.

Bubine: Yesu wāmwekeje mu muswelo mubwaninine ngikadila ya Yehova, Shandi wa mūlu, mwine utelelwe na Bible bu “Leza wa nsangaji.” (1 Temote 1:11; Yoano 14:9) Bine, Yesu wāfundije bakwabo mwa kwikadila na nsangaji. (Mateo 5:3-9; Luka 11:28) Bino bintu bilombola’mba divule dine Yesu wādi umwekeja nsanga ku mpala yandi.