Bantu bavule beipangulanga bino bipangujo i bafwilwe bantu kadi kebakimbengapo’tu enka malondololo, ino i ne busengi. Bakwabo nabo bamwene Mukubo bu kintu kibi kikatampe kyāfikīle bantu, ebiya bakomenwa kukulupila mudi Leza.

 Lufumo: I bibi kwipangula kine kyālekēle Leza uno Mukubo

 Bubine: Bantu ba lwitabijo lukomo bāipangwile kine kyādi kilekele’ko Leza bibi. Kimfwa, mulopofeto Habakuka wāipangwile Leza amba: “Mwanda waka ulekele bya lūma, kujilula kwa bijila, bupolapola ne butapani byenda bisambakana konso konso?” (Habakuka 1:3, Contemporary English Version) Pa kyaba kya kufunina Habakuka, ino aye Leza wālembeje bipangujo byawāipangwile mu Bible mwanda wa bantu bonso batange’byo.

 Lufumo: Leza katelepo mutyima ku masusu a bantu

 Bubine: Leza ushikilwe bubi ne masusu alupuka’ko. (Nkindi 6:16-19) Pa kala mu mafuku a Noa, Leza ‘mutyima wāmusense” pa mwanda wa bya lūma byasambakene pano pa ntanda. (Ngalwilo 6:5, 6) Na bubine, uno Mukubo wāsense Leza bininge.—Malaki 3:6.

 Lufumo: Mukubo i mfuto yobāpele Bayuda kudi Leza

 Bubine: Leza wālekele bene Loma bonakanye Yelusalema mu myaka katwa kabajiji. (Mateo 23:37–24:2) Ino tamba pene’pa, Leza kakityakulangapo bantu ba kabila kampanda mwanda wa kwibatōkelwa mutyima nansha kwibapa mfuto. Ku meso a Leza, “i kutupu kwishila pa bukata bwa Bayuda ne Bajentaila.”—Loma 10:12, Good News Translation.

 Lufumo: Shi Leza wa buswe kadi wa bukomo udi’ko, wādi wa kukankaja uno Mukubo.

 Bubine: Nansha Leza byakalengejangapo masusu, inoko kyaba kimo wialekanga ekale’ko mu kitatyi kityetye.—Yakoba 1:13; 5:11.

 Leza wālekele uno mukubo pa bubinga bumo bonka bwalekēle bantu bonso basusuka: mwanda wa kupwa myanda yālupukile pano kepadi myaka mivule. Bible ulombolola patōkelela’mba pano’ko bidi Leza kaludikangapo ntanda, ino i Dyabola wiiludika. (Luka 4:1, 2, 6; Yoano 12:31) Mu Bible mudi bubine bubidi bukatampe bubwanya kwitukwasha twivwanije kine kyālekele Leza uno Mukubo.

1.   Leza wāpangile bantu na bwanapabo bwa kwitongela. Leza wāsapwidile bantu babajinji, ba Adama ne Eva, byaādi wibasakila, ino kebāningilepo bamukōkele. Bākwete butyibi bwa kwitongela kiyampe ne kibi, ebiya butyibi bwabo bubi, ne butyibi bubi bwākwete bantu bakwabo mu bula bwa mānga, bwāletela muzo wa muntu makambakano makatampe. (Ngalwilo 2:17; 3:6; Bene Loma 5:12) Ye munenena ne dibuku dimo (Statement of Principles of Conservative Judaism) amba: “Masusu mavule adi pano pa ntanda atambanga ku kwingidija bibi bwanapabo bwa kwitongela bobetupele.” Pa kyaba kya kwitutalula bwanapabo, Leza i mupe bantu kitatyi kya kwiendeja abo bene.

2.   Leza ubwanya kulongolola bintu bibi bilupukile ku Mukubo kadi ukebilongolola. Leza i mulaye kusangula midiyo ne midiyo ya bantu bafwile, ne boba bāfwile pa Mukubo. Ukatalula’ko ne misanshi ivwana boba bāpandile ku Mukubo itamba kukuvuluka byāpityile. (Isaya 65:17; Bilongwa 24:15) Buswe bobasenswe bantu kudi Leza bwitukulupija’mba ukafikidija ino milao.—Yoano 3:16.

 Bantu bavule bāfwile pa Mukubo ne boba bāpandile, bābwenye kulama lwitabijo lwabo ne kwikala na kitungo mu būmi mwanda bādi bevwanije kine kyādi kilekēle’ko Leza bibi, ne mpango yakwete ya kulongolola byoya bilupuka’ko.