“Yelusalema Mupya,” binenwa bitanwa mu Bible misunsa ibidi, i kibundi kya kyelekejo kyelekeja kibumbo kya balondi ba Yesu bakenda mūlu kukabikala nandi mu Bulopwe bwa Leza. (Kusokwelwa 3:12; 21:2) Bible unena’mba kino kibumbo kibwanya ne kwitwa bu mutundaile wa Kidishitu.

1.   Yelusalema mupya udi mūlu. Ponso patela Bible Yelusalema mupya, unenanga’mba ukāya mūlu, mwine mulamine bamwikeulu ku bibelo bya kibundi. (Kusokwelwa 3:12; 21:2, 10, 12) Kadi bukata bwa kibundi bulombola’mba kekibwanyapo kwikala pano pa ntanda. Kidi na bukata bwa “biwanza 12 000” mitamba yonso. a (Kusokwelwa 21:16) Mitamba yādi na kintu kya makilometele 560 mu bwimwa, dya mūlu.

2.   Yelusalema mupya i mubundwe na kibumbo kya balondi ba Yesu, mutundaile wa Kidishitu. Yelusalema mupya witwanga bu “mutundaile, mukaja Kana ka Mukōko.” (Kusokwelwa 21:9, 10) Mu uno muneneno wa kyelekejo, Kana ka Mukōko i Yesu Kidishitu. (Yoano 1:29; Kusokwelwa 5:12) “Mukaja Kana ka Mukōko,” mutundaile wa Kidishitu i bene Kidishitu bakekala pamo na Yesu momwa mūlu. Bible udingakanya kipwano kipwene Yesu ne bano bene Kidishitu, na kipwano kya ba mulume ne mukaji. (2 Bene Kodinda 11:2; Bene Efisesa 5:23-25) Kadi Bible unena’mba, pa mabwe a kyalwilo kya Yelusalema Mupya padi “majina 12 a batumibwa 12 ba Kana ka Mukōko.” (Kusokwelwa 21:14) Ino myanda ibingija myanda yotwanena pa Yelusalema Mupya, mwanda bene Kidishitu betyilwe kukekala mūlu i “bobakwe pa kyalwilo kya batumibwa ne bapolofeto.”—Bene Efisesa 2:20.

3.   Yelusalema Mupya ubadilwa mu umbikalo. Yelusalema wa kala ye mwādi mwipata mwa Isalela, mwine mwādi muludikila Mulopwe Davida, wandi mwana Solomone, ne babo bana “pa lupona lwa Yehova.” (1 Bilongwa bya Mafuku 29:23) Nanshi Yelusalema, witwa bu “kibundi kijila,” i buludiki bwa Leza bwādi buludikwa na lukunwa lwa Davida. (Nehemia 11:1) Kadi Yelusalema Mupya witwa ne bu “kibundi kijila,” i mubundwe na boba bakelunga na Yesu momwa mūlu mwanda wa kubikala “bu balopwe pa ntanda.”—Kusokwelwa 5:9, 10; 21:2.

4.   Yelusalema Mupya uletelanga bantu ba pano pa ntanda madyese. Bible i mulombole Yelusalema Mupya “[utūka] mūlu kwa Leza,” mwanda wa kulombola’mba Leza umwingidijanga mwanda wa kulonga bintu ne pano pa ntanda. (Kusokwelwa 21:2) Bino binenwa bilombola kukwatañana kukwatañene Yelusalema Mupya na Bulopwe bwa Leza, bwine bwingidija Leza mwanda wa kufikidija kiswa-mutyima kyandi “momwa mūlu, ne pano pa ntanda.” (Mateo 6:10) Mu mpango ya Leza itala pa bantu ba pano pa ntanda mubadilwa ne ano madyese:

   •   Kutalula’ko bubi. “Munonga wa mema a būmi” utambanga ku Yelusalema Mupya ukukila ku “mityi ya būmi,” ko kunena’mba wa “kundapa nao mizo.” (Kusokwelwa 22:1, 2) Kuno kundapwa kwa ku ngitu ne ku mushipiditu kukatalula’ko bubi ne kukwasha bantu bekale na būmi bubwaninine, monka mwādi musakila Leza dibajinji.—Bene Loma 8:21.

   •   Kipwano kiyampe pa bukata bwa Leza ne bantu. Bubi i bubombole bantu kudi Leza. (Isaya 59:2) Kutalulwa’ko kwa bubi kukalengeja buno bupolofeto bufikidile ne pa mfulo: “Pema wa Leza udi na bantu, nandi ukekalanga nabo, abo nabo bakekalanga bantu bandi. Kadi Leza mwine ukekalanga nabo.”—Kusokwelwa 21:3.

   •   Kupwa kwa masusu ne lufu. Kupityila ku Bulopwe bwandi, Leza “ukapampulanga impolo yonso mu meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka.”—Kusokwelwa 21:4.