Divule dine Bible utelanga Yesu bu “Mwanā Leza.” (Yoano 1:49) Kishima “Mwanā Leza” kilombola’mba Leza i Umpangi, nansha Nsulo ya būmi bonso, ne bwa Yesu bwine. (Ñimbo ya Mitōto 36:9; Kusokwelwa 4:11) Bible kanenangapo amba Leza wābutwile mwana na mubutwilwanga bana ba bantu.

 Kadi Bible utelanga bamwikeulu bu “bana ba Leza.” (Yoba 1:6) Bible unena’mba Adama muntu mubajinji wādi “mwanā Leza.” (Luka 3:38) Inoko, Bible utelanga Yesu bu Mwana umbedi wa Leza mwanda Yesu i kipangwa kibajinji kya Leza kadi kimo kete kyaāpangile bunka bwandi.

•  Lelo Yesu wādi’ko momwa mūlu kumeso kwa kubutulwa pano pa ntanda?

•  Le i bika byādi bilonga Yesu kumeso kwa kwiya pano pa ntanda?

 En-en. Yesu wādi kipangwa kya ku mushipiditu momwa mūlu kumeso kwa kubutulwa bu muntu pano pa ntanda. Yesu aye mwine wānenene amba: “Natūkile mūlu.”—Yoano 6:38; 8:23.

 Leza wāpangile Yesu kumeso kwa kupanga kintu kyo-kyonso. Bible unena pa mwanda wa Yesu amba:

•   “Aye i . . . umbedi wa bipangwa byonso.”—Bene Kolose 1:15.

•   I “ngalwilo ya bupangi bwa Leza.”—Kusokwelwa 3:14.

 Yesu wāfikidije bupolofeto butala yewa wa “ngalwilo yandi . . . ya tamba bitatyi bya kala, tamba mafuku a pa kala.”—Mika 5:2; Mateo 2:4-6.

 Wādi pa kifuko kizunzulwe Mūlu. Yesu wātelele kifuko kyaādipo paālombēle amba: “Abe Tata, ntumbije . . . ntumbo yonadi nayo kubwipi nobe kumeso kwa ino ntanda kwikala’ko.”—Yoano 17:5.

 Wākweshe’ko Shandi pa kupanga bintu bikwabo byonso. Yesu wāingile pamo na Leza “bu mwingidi mukatampe.” (Nkindi 8:30) Bible unena pa mwanda wa Yesu amba: “Kupityila kudi aye bintu bikwabo byonso byāpangilwe mūlu ne pano pa ntanda pene.”​—Bene Kolose 1:16.

 Leza wāpangile bipangwa bikwabo byonso kupityila kudi Yesu. Mu bino bipangwa byonso mubadilwa bamwikeulu, ne diulu ne ntanda bimweka na maso. (Kusokwelwa 5:11) Mu bintu bimo, kwingila kwāingile Leza pamo na Yesu kwādi pamo bwa kokwa kwingilanga sendwe mu lūbako pamo na mūbaki wa njibo. Sendwe ufwatulanga njibo, kupwa mūbaki waūbaka’yo koku utala pa kifwatulo’kya.

 Wādi Kinenwa. Kitatyi kīsambila Bible pa būmi bwa mūlu bwa Yesu, umutelanga bu “Kinenwa.” (Yoano 1:1) Ko kunena’mba Leza wāingidije wandi Mwana mwanda wa kusapwila bipangwa bikwabo bya ku mushipiditu myanda ne misoñanya.

 Kadi mobimwekela Yesu wāingile bu mukendi wa Leza wa kusapwila bantu ba pano pa ntanda yandi myanda. Padi Leza wēsambīle mudi Yesu Kinenwa paāpele ba Adama ne Eva misoñanya mu budimi bwa Edena. (Ngalwilo 2:16, 17) Yesu wādi padi mwikeulu wāendeje bene Isalela wa kala mu ntanda mutuputupu, ne mwine diwi dyobādi bafwaninwe kukōkela kudi bene Isalela.​—Divilu 23:20-23. a