BUKWASHI KU BISAKA | BUSONGI
Mumweno Muyampe pa Ngikadila ya Mwinē Pobe Ikulobeja
Abe usenswe kulonga bintu bukidibukidi; ino mwinē pobe usaka kupangika kintu kyo-kyonso.
Utalalanga kadi wa bumvu; ino mwinē pobe i wa mashi makabe kadi usenswe kwikala mu kitango kya bantu.
Le mwinē pobe udi na ngikadila ikulobeja? Kuta mutyima pa ino ngikadila kubwanya kuleta makambakano mu busongi bwenu. Inoko Bible unena’mba, “yewa unena’nka kunena myanda’ya ukalañanyanga balunda ba pa mutyima.”—Nkindi 17:9.
Pa kyaba kya kuleka ngikadila ikulobeja imuletele makambakano abe ne mwinē pobe, ubwanya padi kwifunda kumona ngikadila’ya mu muswelo muyampe.
Mu kino kishinte
Mumweno muyampe pa ngikadila ya mwinē pobe ikulobeja
Ngikadila idi na mwinē pobe ikulobeja, ibwanya kudingakana na ngikadila miyampe yosenswe. Langulukila pa bino bimfwa bisatu:
“Wami mulume udi na mulēle wa kulongela bintu nansha kwiteakanya pa kwenda kuntu kampanda. Inoko ino ngikadila imukwashanga ekale na kitūkijetyima—antūkijije mutyima’nka ne ami mwine. Kyaba kimo mulēle wandi undobejanga, inoko ubadilwa mu bintu byomusanshilwe.”—Chelsea.
“Wami mukaji uteakanyanga kakintu ne kakintu; usakanga kubandaula bintu byonso, bine bibwanya kundobeja. Ku mutamba mukwabo nako, kuta kwatanga mutyima ku kanda ne kanda kumukwashanga ateakanye bintu byonso senene.”—Christopher.
“Wami mulume ubwanya kumweka bu kasangedilepo bintu, bine biletanga bulobo. Inoko kulonga kwaloñanga bintu na mutyima mutūke kubadilwa mu ngikadila insangaja mwadi. Nsenswe bwino bwandi bwa kwisamba na mutyima mutūke mu myanda ilobeja.”—Danielle.
Monka mwefundile’kyo ba Chelsea, Christopher, ne Danielle, divule dine bukomo ne buzoze bwa mulume nansha mukaji, i bintu bishile bibadilwa mu ngikadilo imo yonka. Shi bidi uno muswelo, kubwanyapo kupwa buzoze pampikwa kwingidija bukomo, enka na mulongelwanga bukomo pa kubesula kakipindi ka lupeto lwa kityele.
Shako kudi ngikadila imo keidipo na kantobela. Kimfwa, Bible unena’mba bantu bamo ‘balobalobanga.’ (Nkindi 29:22) Mu uno muswelo, muntu ufwaninwe kulonga bukomo bwa kuleka “miswelo yonso ya bululu bubibubi, bulobo, bukalabale, kwela mabila, ne binenwa bya mutonko.” a—Bene Efisesa 4:31.
Inoko shi ngikadila ikulobejanga’tu, londa madingi a mu Bible a amba: “Endelelai kwitūkijija mityima banwe bene na bene . . . nansha shi kudi udi na mwanda na mukwabo.”—Bene Kolose 3:13.
Ne kadi longa bukomo bwa kumona kakintu kayampe mu mine ngikadila’ya—kakintu padi kakusangeje dibajinji kudi mwinē pobe. Mulume umo witwa bu Joseph unena’mba, “kuta mutyima ku ngikadila ikulobeja kudi pamo bwa kwimika milangwe pa bui bwa dyama pa kyaba kya kusangela kweñenya kwadyo.”
Mwa kwisambila
Banwe bonso mubwanya kulangulukila pa bipangujo bilonda’ko wa pandi wa pandi. Kupwa mwisambilei pamo pa malondololo enu.
Le mwinē pobe udi na ngikadila yomona bu ileta kavutakanya mu busongi? Shi i amo, le i ngikadila’ka?
Le ngikadila’yo i mibi bininge, nansha ikulobejanga’tu?
Le kudi kakintu kayampe ku mine ngikadila’yo? Shi i amo, i kakintu’ka, ne mwanda waka umwene na mvubu kako kakintu ka ku ngikadila ya mwinē pobe?
a Tala kishinte kinena’mba “Mwa Kutaleja Bulobo Bobe,” “Mwa Kulekela Kunena Bishima Bisansa,” ne “Mwa Kulekela Lupotopoto.”
Tala'po Bidi ne Bino:
BUSONGI NE KISAKA
Mwa Kutamijija Kitūkijetyima
Shi bantu babidi ba kubulwa kubwaninina abesonge, kebabulwangapo kwipya myanda. Kitūkijetyima kidi na mvubu mpata pa kwikala na busongi bulumbuluke.