Madia mwine Makadala utala mūlu, koku wipampula impolo mu meso. Mfumwandi wasenswe i mupopwe ku mutyi. Tudi ku muketeko, kubwipi na dyuba mu mitwe, “inoko mfindi [ibasambakana] mu ntanda yonso’ya”! (Luka 23:44, 45) Waela kisandi kyandi pa mapuji kupwa washipila mwana-mukaji udi kubwipi nandi. Ke kujimankanapo kwa dyuba, dijiminanga’tu mu minite ibala-inga, dyalengeja ino mfindi ya mu mansá asatu. Padi Madia ne bantu bakwabo badi kubwipi na Yesu, abashilula kwivwana banyema ba bufuku badila, bene kebavudilepo kwivwanwa dyuba. Bantu bamo bādi babandila “bakwatwa moyo mukatampe, kebanena’mba: ‘Na bubine, uno wadi Mwanā Leza.’” (Mateo 27:54) Balondi ba Yesu ne bantu bakwabo abalanga padi amba i Yehova ulombola’mba wivwene bulanda ne amba i mulobe pa muswelo obasusula wandi Mwana.

Nansha Madia mwine Makadala byaakomenwa kwivwanija byamona, ino katelukilepo pa kifuko’kya. (Yoano 19:25, 26) Bine Yesu udi na misanshi ya lufu. Inandya Yesu nandi usakilwa kusengibwa ne kukwatakanibwa.

Madia pa kumona bintu byonso byamulongēle Yesu, wamone amba nandi ufwaninwe kumulongela byonso byabwanya kulonga. Wavuluka ngikadilo ya bulanda yaadi’mo, ino bintu byonso byashinta pa mwanda wa Yesu. Yesu ye wamulengeje ekale na būmi bwa bulēme kadi bwa kitungo. Waikele ke mwana-mukaji wa lwitabijo lukatampe. Namani? Ne lwitabijo lwandi lwitufundija bika dyalelo?

Mu Bible, mānga ya Madia mwine Makadala ishilula na kyabuntu. Yesu wamupe bwanapabo na kumutambija mu bupika bwa kulotakanya. Mu mene mafuku’a bandemona bādi batāle, kadi ino mishipiditu mibi yādi itamba’dyo bantu bavule ne kutwela’nka ne mu bantu bamo keibaludika. Shako ketuyukilepo lupusa lwadi na bandemona padi uno lolo mulanda Madia mwine Makadala, ino kintu kyotuyukile i kino amba wādi mukwatwe na bino bipangwa bya kasusu bisamba-bibidi. Na bya dyese, Yesu Kidishitu webalupula’mo bonso!—Luka 8:2.

Madia byaanyongololwa ne kusengibwa bininge, kudi būmi bukwabo bumutengēle. Le aye ubwanya kulombola kufwija’ko namani? Waikala mulondi wa Yesu umulamete. Kadi wamone bisakibwa ne kwibivuija. Yesu ne batumibwa bandi bādi basakilwa byakudya, bivwalwa ne kifuko pa kulāla bufuku. Kebādipo bampeta, kadi kebādipo na kaji mu kine kitatyi’kya. Inoko bādi basakilwa bintu bya ku ngitu pa kuta mutyima ku mwingilo wa kusapula ne kufundija.

Madia ne bana-bakaji bakwabo bavule bādi bebakwasha’ko pa kuvuija bino bisakibwa. Bana-bakaji “badi bebengidila na bintu byabo.” (Luka 8:1, 3) Bana-bakaji bamo bādi padi na lupeto luvule. Bible kanenenepo kintu shi bādi batēka byakudya, kukenda bisandi nansha kulongolola mwa kwikala mu kibundi ne kibundi. Inoko bādi bengila na mutyima tō mwingilo wa kukwatakanya kino kibumbo kyādi kyendakana, kyādi padi kya bantu kubwipi kwa 20. Bine, buno bukomo bwādi bulonga bana-bakaji bwākweshe Yesu ne batumibwa bandi bate mutyima bininge ku mwingilo wa busapudi. Na bubine, Madia wādi uyukile amba kabwanyapo kwalwija Yesu bintu bidingakene na byaāmulongēle—ino wādi usangedile kulonga byobya byabwanya kulonga!

Bantu bavule dyalelo babwanya kulanga’mba i batabuke boba bāingile mingilo ya munshi pa mwanda wa bakwabo. Ino aye Leza kalañangapo uno muswelo. Fwatakanya’po bidi mwaāsangedile pa kumona Madia wipāna aye mwine, ne kulonga bukomo bwa kukwatakanya Yesu ne batumibwa bandi! Dyalelo nadyo, bene Kidishitu bavule ba kikōkeji bengilanga na nsangaji mingilo ya munshi pa mwanda wa bakwabo. Kyaba kimo kwingidila bakwetu nansha kunena binenwa biyampe kubwanya kukwasha bininge. Kudi Yehova, kukwasha’ko uno muswelo kudi na mvubu bininge.—Nkindi 19:17; Bahebelu 13:16.

Madia mwine Makadala ubadilwa mu bana-bakaji bāendele na Yesu mu Yelusalema ku Pashika mu mwaka wa 33 Yesu ke Mwiye. (Mateo 27:55, 56) Na bubine, wālobele pawāivwene amba abakwata Yesu ne kumusambija mu bukata bwa bufuku. Kadi myanda yādi ibipila’ko. Mbikavu Pontusa Pilato, pa kutyinibwa mbavu na bendeji ba bipwilo Bayuda ne na kibumbo, wātyibila Yesu mambo a kwipailwa ku mutyi. Padi Madia wamone Mfumwandi, kadi kala na mashi bilembelembe, mukōke bininge, ukoka mu bipito mutyi mulampe wa kumwipaila’ko.—Yoano 19:6, 12, 15-17.

Pa kifuko pa kumwipaila, mfindi pa kupwa kwandabila kubwipi na dyuba mu mitwe, Madia mwine Makadala ne bana-bakaji bakwabo bemene “kubwipi na mutyi wa masusu wa Yesu.” (Yoano 19:25) Madia, waimana’po kufika ne ku mfulo, wamone Yesu ne kumwivwana unena Yoano mutumibwa wasenswe alele inandi. Waivwana Yesu udi na misanshi udidila Shandi. Kupwa waivwana paanena kumeso kwa aye kufwa, binenwa bya mfulo bya bushindañani bya amba, “kibafikidila.” Waivwana moyo mukatampe. Inoko, udi’nka penepa kufika ne bifwa Yesu. Kupwa washala kubwipi na kibundi kipya mobatūla umbidi wa Yesu kudi muntu mpete witwa bu Yosefa mwine Adimatea.—Yoano 19:30; Mateo 27:45, 46, 57-61.

Kimfwa kya Madia kituvuluja bintu byotubwanya kulonga shi banabetu mu lwitabijo bekonda na makambakano makatampe. Ketubwanyapo padi kukankaja kinkumbulu nansha kupwa misanshi ya bantu baponenwe nakyo. Inoko, tubwanya kwibevwanina lusa ne kukankamana. Muntu udi mu makambakano makatampe ubwanya kukwashibwa bininge shi udi na mulunda wa kumukwatakanya. Kwikala kubwipi na mulunda usakilwa bukwashi, i kilomboji kya lwitabijo lukatampe kadi kubwanya kumusenga bya binebine.—Nkindi 17:17.

Umbidi wa Yesu pa kupwa kutūlwa mu kibundu, Madia ubadilwa mu bana-bakaji bakapota binunka mwenye bikwabo mwanda wa kushinga’byo umbidi wandi. (Mako 16:1, 2; Luka 23:54-56) Ebiya Sabato pa kupwa, wabūka lubanga bwē. Mumone’po mu ñeni wenda mu bipito bya mfindi na bana-bakaji bakwabo, ku kibundu kya Yesu. Mu dishinda, benda beipangula mobakakunkulumwina dibwe dilēma dishityilwe ku kibelo kya kibundu. (Mateo 28:1; Mako 16:1-3) Inoko kebajokele’kopo. Na bubine, lwitabijo lwabo lubebalengeja balonge bukomo kadi bakulupile amba Yehova ukalonga bishala’ko.

Padi Madia wabadikila kufika ku kibundu kumeso kwa bakwabo. Waimana nkū, kupwa watulumuka. Dibwe i dikunkulumune, kadi mu kibundu i mutupu muntu! Byadi mwana-mukaji keje kulonga kintu, wajoka lubilo wakasapwila ba Petelo ne Yoano byaamona. Fwatakanya’po bidi mwanenena wesakana’mba: “Mfumwetu abamusela’mo mu kibundu, kadi ketuyukilepo kobakamulādika”! Ba Petelo ne Yoano abaenda lubilo ku kibundu, abamone amba i mutupu muntu, kupwa abajokela ku abo mobo. *—Yoano 20:1-10.

Madia pa kujokela ku kibundu, kaimene’ko bunka. Lubanga bwē, pa kumona mu kibundu mudi’tu nyā, kadila bya mwiko. Byaketabijepo amba Mfumwandi wajimina, wafwena kaebela mu kibundu, ebiya bibamusansa bininge. Mu kibundu mushikete bamwikeulu babidi bavwele bitōka! Abamwipangula’mba “le i bika byodila?” Mupandikile, wapituluka mu byaakasapwilanga batumibwa’mba: “Abasela Mfumwami, kadi nkiyukilepo kobakamulādika.”—Yoano 20:11-13.

Aye amba ālamuke, muntu umo wimene kunyuma kwandi. Byakamuyukilepo, walanga’mba i mudimi ulongololanga pa kifuko’pa. Uno muntu wamwipangula’tu biyampe amba: “A mwana-mukaji, le i bika byodila? I ani okimba?” Madia walondolola’mba, “Mfumwami, shi i abe wamutekunanga, nombole komulādikile, nkamusele’ko.” (Yoano 20:14, 15) Langulukila bidi pa byaanena. Le uno mwana-mukaji bunka bwandi wadi ubwanya kutekuna umbidi wa Yesu Kidishitu ne kwenda nao, muntu wadi mupuñame kadi wa bukomo? Madia kalekelepo kulangulukila pa bino bintu. Uyukile’tu amba ufwaninwe kulonga byobya byabwanya kulonga.

Shi tudi mu byamalwa ne mu bikoleja byoketubwanyapo kunekenya, tubulwepo kwiula Madia mwine Makadala? Shi tute’tu mutyima’nka ku buzoze bwetu ne ku bintu byoketubwanyapo kulonga, tubwanya kuzakala bininge, twakomenwa kulonga kintu. Inoko tusumininwe kulonga byonso byotubwanya kulonga ne kuleka Leza alonge’po kintu, tukalonga bivule kupita ne motwadi tulangila. (2 Bene Kodinda 12:10; Bene Fidipai 4:13) Kadi kya mvubu kutabuka i kino, tukasangaja Yehova. Ye byalongele ne Madia, Yehova nandi wamwesela mu muswelo utulumukwa.

Muntu wimene kumeso a Madia ke mudimipo. I aye wadi sendwe wa mbao, ke mufundiji, kupwa ke Mfumwandya Madia wasenswe. Ino byakamujiwilepo, washilula kumusonsoloka. Madia kabwanyapo kufwatakanya bubine bwa amba: Yesu wasanguka bu kipangwa kya bukomo. Pa kino, Yesu wavwala ngitu ya bumuntu, inoko ke ngitupo yaepēne nayo bu kitapwa. Mu mafuku a kasekuseku alondakana na kusangulwa kwandi, divule Yesu kebamujiwilepo enka ne kudi bantu badi bamuyukile biyampe.—Luka 24:13-16; Yoano 21:4.

Le Yesu weyukanya namani kudi Madia? Weyukanya ku muswelo watela dijina “Madia!” Madia waalamuka, waela lubila, waingidija kishima kiyukane kya Kihebelu kyaadi umwityila’po misunsa mivule amba: “Lamoni!” I Mufundiji wandi wasenswe! Wasangala bininge. Wamukwata, kadi kasakepo kumulekelela.—Yoano 20:16.

Yesu uyukile bilanga uno mwana-mukaji. Wamunena’mba, “leka kunkwata.” Tufwatakanyei’po bidi pamunena na kanye, padi umungamunga, ne kwisombolola pamukwete koku umukulupija’mba: “Nkyakandile kwa Tata.” Kitatyi kekyabwene kya aye kwenda mūlu. Ukidi na mwingilo mukatampe wa kwingila pano pa ntanda, kadi usaka Madia amukwashe. Na bubine Madia utejanga senene byonso binena Yesu. Yesu wamunena’mba “enda kudi banabetu ukebalombole amba, ‘Kenkanda kwa Tata kadi ye Shenu, kwa Leza wami kadi ye Leza wenu.’”—Yoano 20:17.

Bine, Mfumwandi wamupe mwingilo! Madia ubadilwa mu bana ba bwanga babajinji badi na dyese dya kumona Yesu musanguke, kadi pano abamupe dyese dikwabo dya kusapwila bakwabo myanda miyampe. Fwatakanya’po nsangaji ne kampeja-bukidi kaenda nako kukakimba bana ba bwanga. Mumone’po mu ñeni panena koku wesakana binenwe byadi bya kushala kitatyi kilampe mu ñeni yandi ne ya bana ba bwanga, bya amba: “Namone Mfumwetu!” Webalombola bintu byonso byanena Yesu, kadi byadi musangale bininge, wanena’byo lubilolubilo. (Yoano 20:18) Myanda yaanena iyebweja ku yoya yanenene bana-bakaji bakwabo baendele ku kibundu kya Yesu batana’mo mutupu muntu.—Luka 24:1-3, 10.

Le bana ba bwanga abalonga’po namani? Dibajinji, kebalongele’popo mu muswelo muyampe. Tutanga’mba: “Ino myanda yamwekele bu ya bunenenene kobadi, kadi kebaitabijepo bana-bakaji’ba.” (Luka 24:11) Nansha byobadi na mutyima muyampe, bano bana-balume batamīne mu bantu kebadipo bakulupila binena bana-bakaji; kadi mungya bisela bya balabi, kebadipo betabija bukamoni bwa bana-bakaji mu kidye. Padi batumibwa abatādilwa bininge na bibidiji byabo kupita ne mobadi balangila. Inoko ba Yesu ne Shandi kebadipo na mboloji ya uno muswelo. Bine, abo abape uno mwana-mukaji wa kikōkeji dyese!

Na bubine Madia kalekelepo malondololo a bano bana-balume amulobeje. Uyukile amba Mfumwandi umukulupile, ne kadi ye byonso byasaka. Mu muswelo umo onka, boba bonso balonda Yesu i bebape musapu wa kusapula. Bible utela uno musapu bu “myanda miyampe ya Bulopwe bwa Leza.” (Luka 8:1) Yesu kalailepo balondi bandi amba, bantu bonso bakamwitabija nansha kusangela mwingilo wandi. Ino amba kebakamwitabijapo nansha kumusangela. (Yoano 15:20, 21) O mwanda bene Kidishitu bafwaninwe kuvuluka kimfwa kya Madia mwine Makadala. Nansha ke kutatana kwa banababo ku mushipiditu, kekumulengejepo aleke kwikala na nsangaji ya kusapula myanda miyampe ya lusangukilo lwa Yesu!

Mwenda mafuku, Yesu wamwekela batumibwa bandi ne balondi bandi bavule. Difuku dimo wamwekela bantu 500 ne musubu mwa kimo! (1 Bene Kodinda 15:3-8) Ponso pamona Madia nansha kwivwana amba Yesu wamwekela bantu, lwitabijo lwandi lwenda lukomena’ko. Padi Madia mwine Makadala ubadilwa mu bana-bakaji bakebungīle mu Yelusalema mu difuku dya Pentekosa pobāpungulwidile mushipiditu ujila pa balondi ba Yesu bādi bebungile.—Bilongwa 1:14, 15; 2:1-4.

Nansha bikale namani, tudi na bubinga buvule bwa kukulupidila’mba: Madia mwine Makadala wāikele nyeke na lwitabijo kufika ne byaāfwile. Nanshi netu tusumininwe kwikala nalo nyeke! Tukeula kimfwa kya Madia mwine Makadala, shi tufwija’ko pa byonso bitulongele Yesu ne kwingidila bakwetu na kwityepeja, koku tukulupile amba Leza usa kwitukwasha.