Ku mfulo, kakibumbo katyetye ka bana-balume kabaube. Padi kubashala ka lunwa lwa kaluvula katamba mu dilungu dya Alabia. Yoba kaikele talala, mukōke pa kupwa kwisamba kitatyi kilampe. Mumone’po bidi mu ñeni mwatadila balunda nandi basatu na bulobo, ba Edifaza, Biledade ne Zofala​—wibakolomona banene. Ino kebasupo kumutala, balobe mwanda wa binenwa byabo bya bunwanwa, binenwa bya “kwianya,” ne milangwe yabo ya kumusanshija kebilongelepo kintu. (Yoba 16:3, kunshi kwa dyani) Ino aye Yoba i musumininwe bininge kulwila bululame bwandi.

Padi Yoba walanga’mba kubamushadila’tu enka bululame. Ke mujimije bupeta bandi, bandi bana bonso dikumi, balunda ne balondakani kebakimukwatakenyepo ne kumulēmeka, enka ne bukomo bwandi bwa ngitu bwine. Lukoba lwandi ke lufīta mwanda wa misongo, lwikele na bitāto, koku bivinyu bimulandala. Wadi kanunka’nka ne kununka. (Yoba 7:5; 19:17; 30:30) Inoko binenwa bya bano bantu basatu bibalengeja Yobe emone bu kadipo na mvubu. Aye i musumininwe kulombola’mba ke nkuma-bibipo na mobadi bamunenena. Binenwa bya mfulo bya Yoba bibebobija talala. Ku mfulo binenwa byabo bibi bibebapu mukanwa. Inoko Yoba byadi’nka bimusansa. Ukisakilwa’nka bukwashi!

Shako, Yoba kadipo na mumweno muyampe pa masusu andi. Usakilwa kuludikwa ne kulemununwa. Kadi usakilwa kusengibwa na balunda nandi basatu, ino abo abakomenwa kumusenga. Le nobe wimonanga bu kimonya-malwa usakilwa kuludikwa ne kusengibwa? Lelo bantu bemona bu balunda nobe ke bakutyumune mutyima? Kuboila ñeni ku muswelo obākweshe Yoba kudi Yehova Leza ne ku muswelo wālongele Yoba bintu kubwanya kukupa lukulupilo ne kukukwasha bya binebine.

Kudi kintu kitulumuja mu nsekununi ya Yoba. Nsongwalume umo witwa bu Edihu udi kubwipi nabo. Udi kwa bunka uteja talala bakulumpe besamba. Bintu byaivwana kebimusangejepo.

Walobela Yoba. Bibamusansa pa kumona Yoba muntu moloke wilombola “aye mwine bu moloke pa kyaba kya Leza.” Inoko Edihu wetūla pa kyaba kya Yoba, wamone masusu andi, kubulwa budimbidimbi kwandi, ne kusaka kwasakilwa madingi mayampe ne busengi. Na bubine, Edihu katūkijijepo mutyima basengi basatu ba bubela! Webevwana banena Yoba bintu bisansa, balonga bukomo bwa kuzozeja lwitabijo lwandi, kupwa bulēme bwandi ne bululame bwandi. Kadi kibi kutabukidila, binenwa byabo binyengakane i bya kutopeka Leza amba i mubi. Edihu wakomenwa kwikala talala!​—Yoba 32:2-4, 18.

Wanena’mba “Amiwa ne mwanuke Banwe mwi batame. O mwanda nadi nekoka na bulēme, kadi nkyasomwenwepo kwimulombola byondyukile.” Ino kabwenyepo kadi kwikala talala. Wabweja’ko amba: “Ke bukulupo kete bwalamunanga muntu ke wa tunangu, kadi ke banunupo kete bevwanijanga kyokya kyoloke.” (Yoba 32:6, 9) Kupwa Edihu wesambe kitatyi kilampe, ubingija byanena. Wanena Yoba mu muswelo mwishile na ba Edifaza, Biledade ne Zofala. Edihu wakulupija Yoba amba kasapo kumufutulula nansha kumubweja’ko njia. Kadi walēmeka Yoba, pa kumwita pa dijina ne kuyuka’mba kebamulongēlepo bintu na bulēme. * Wamunena na bulēme amba: “Pano, a Yoba, teja’po bidi binenwa byami.”​—Yoba 33:1, 7; 34:7.

Edihu wadingila Yoba pampikwa kafinda’mba: “Abe wanenene mu matwi ami’mba, . . . ‘Ami ne utōka tō, wampikwa kujilula; Ami ne wampikwa disubi, wampikwa kilubo. Ino Leza watana buluji bwa kulwa nami.’” Edihu watengelela pa mwanda, wamwipangula’mba: “Le ukulupile amba abe udi na bubinga ponena’mba, ‘Amiwa ne moloke kutabuka Leza’?” Kadipo ukokeja kumuleka alange uno muswelo. Uno nkasampe wamunena’mba, “abe kudipo na bubinga bwa kunena namino.” (Yoba 33:8-12; 35:2) Edihu uyukile amba Yoba i mulobe bininge pa kujimija bintu ne kususulwa na balunda nandi ba bubela. Inoko Edihu wadyumuna Yoba amba: “Tá mutyima kutyina bukalabale bwakakutwala ku nshikani.”—Yoba 36:18.

Nakampata Edihu wabingija Yehova Leza. Wanena bubine bukatampe kadi bwa kamweno amba: “Kebibwanikapo Leza wa bine kulonga bintu na nshikani, nansha Mwinē Bukomo Bonso kulonga bibi!. . . Mwinē Bukomo Bonso kanyengakanyangapo boloke.” (Yoba 34:10, 12) Pa kulombola Yoba amba Yehova udi na lusa lwa binebine, Edihu wamuvuluja’mba Yehova kalongele’popo kintu ne amba kapelepo Yoba mfuto mwanda wa binenwa byandi byampikwa kulanga ne bya kubulwa bulēme. (Yoba 35:13-15) Kadi pa kyaba kya kumwekeja bu uyukile bintu byonso, Edihu wanena na kwityepeja’mba: “Leza i mukatampe kupita ne byotukokeja kuyuka bine.”​—Yoba 36:26.

Nansha madingi a Edihu byoadi ampikwa kafinda, ino udi nyeke na lusa. Wesambila pa lukulupilo lwa kutendelwa lwa amba, difuku dimo Yehova ukajokejeja Yoba bukomo bwa ngitu. Leza ukanena mwingidi wandi wa kikōkeji amba: “Ngitu yandi ifufume kupita ne pa bunkasampe; ajokele ku mafuku a bukomo bwa bunkasampe bwandi.” Kilomboji kikwabo kya lusa lwa Edihu i kino: Pa kyaba’tu kya kukankamika Yoba, wamunena na lusa esambe, amulondolole. Wamunena’mba “Wisambe, mwanda nsaka kukubingija.” (Yoba 33:25, 32) Ino Yoba kalondolwelepo. Padi kasakilepo kwibingija pa ano madingi mayampe kadi akankamika. Padi udilanga.

Kudi ñeni mikatampe yotubwanya kuboila ku bano bantu babidi ba kikōkeji. Kudi Edihu, tuboila’ko ñeni ya mwa kudingidila ne kusenga boba basakilwa bukwashi. Mulunda wa bine kakalekapo kulombola patōka kilubo kikatampe nansha kilongwa kileta kyaka. (Nkindi 27:6) Netu tusakanga kwikala balunda ba uno muswelo, kwikala nyeke biyampe na boba basakilwa bukwashi ne kwibakankamika nansha shi abetunena bintu pampikwa kulanga. Kadi shi batwe bene tusakilwa madingi, kimfwa kya Yoba kibwanya kwituvuluja’mba tufwaninwe kwivwana madingi na kwityepeja pa kyaba kya kwiapela. Batwe bonso tusakilwanga madingi ne kulemununwa. Kwietabija kubwanya kwitupandija.—Nkindi 4:13.

Pesamba Edihu, watela divule kimpumpu, makumbi, mikungulo ne mapeni. Wanena Yehova amba: “Ivwana biyampe lupumo lwa diwi dyandi.” Kitatyi kityetye pa kupita’po Edihu watela “kimpumpu kya luvula.” (Yoba 37:2, 9) Bimweka’mba, paadi wisamba kimpumpu kyadi kipukuma, kyenda kivudila’ko. Ku mfulo kyaikala ke kimpumpu kikatampe. Kupwa kubalongeka kintu kitulumukwa. Yehova wesambe!​—Yoba 38:1.

Kitatyi kyotutanga mukanda wa Yoba, tusangalanga bininge shi tubafika mu mashapita mwisamba Yehova na Yoba. Bidi pamo bwa kimpumpu kya bubine kipepula binenwa bya bitupu ne binenwa byonso bya bubela bya ba Edifaza, Biledade, ne Zofala. Ne kadi bidi, Yehova wesambile na bano bantu ke mungya kala. Wadi utele mutyima’nka Yoba, wesambile na mwingidi wandi wasenswe pamo bwa shabana ulemununa wandi mwana.

Yehova uyukile masusu a Yoba. Wamwivwanina lusa, monka mwaivwaninanga’lo bandi bana basenswe basusuka. (Isaya 63:9; Zekadia 2:8) Inoko kadi uyukile amba Yoba wisambanga “pampikwa buyuki,” ne kubipija’ko myanda yandi. O mwanda Yehova walemununa Yoba na kumwipangula bipangujo bivule. Wamwipangula’mba “Lelo wādi kwepi ponaādile byalwilo bya ntanda? Nombole, shi ulanga’mba wivwanije.” Ku ngalwilo ya bupangi, “ñenyenye ya lubanga,” ko kunena’mba kisaka kya Leza kya bamwikeulu, kyatūta kyungwe na nsangaji pangala pa bupangi bwa kutendelwa. (Yoba 38:2, 4, 7) Na bubine, Yoba kadipo uyukile kintu nansha kimo.

Yehova waendelela kwisambila pa mingilo yandi ya bupangi. Udi pamo bwa aye ushintulwila Yoba myanda ibwanya kwita bantu dyalelo bu sianse ya bupangi, myanda pamo bwa bwifundi bwa imbuo, bioloji, bwifundi bwa mwikadile ntanda, ne fizike. Nakampata Yehova watela banyema bavule badi mu ntanda ishikete’mo Yoba​—ntambo, kimkombe, mbuji wa mu ngulu, mpunda wa ntanda, ñombe wa ntanda, dikolongo, kabalwe, kabemba, mukebo, Behemote (mobimwekela i kyovwe), ne Leviatane (padi i ñwena). Langa’po bidi dyese dyaikele na Yoba dya kufundijibwa bupangi na Umpangi wa diulu ne ntanda! *

Le i mwanda’ka mukatampe ufyeme mu bino byonso? Yoba wadi usakilwa kwityepeja bininge. Yoba pa kutompola’mba masusu andi atambanga kudi Yehova, webwejeja’ko’nka misanshi, wapaluka kudi Shandi wa buswe. O mwanda Yehova waipangula misunsa mivule kwine kwadi Yoba kitatyi kyaikele’ko bintu bya kutendelwa, ne kukimba kuyuka shi Yoba ubwanya kudisha, kulela nansha kumuna bipangwa byapangile. Mwene Yoba kabwanyapo kwivwanija mashinda a Yehova ne milangwe yandi?

Byonso byanena Yehova, bilombola’mba usenswe Yoba bininge. Bidi pamo wa Yehova ulanguluja Yoba amba: ‘A wami mwana, shi ubwanya kupanga bino bintu byonso’bi ne kuvuija bisakibwa byabyo, le bine ulanga nkakomenwa kuvuija bisakibwa byobe? Le mbwanya kukwela, kukwipaila bana, kukubudija mutyima-ntenke, ne kukubeleka? Le ke amipo kete ubwanya kukwalwija byowajimije ne kukundapa misongo yobe isansa?’

Ku bipangujo byonso bya Yehova, Yoba walondolola’ko bibidi kete. Kapatenepo nansha kwibingija ne kukimba kabepelo. Waitabija na kwityepeja’mba kayukilepo bintu bivule, kadi wesāsa pa binenwa byandi. (Yoba 40:4, 5; 42:1-6) Pano tubemwena kimfwa kiyampe kya lwitabijo lwa Yoba. Kupwa’tu kwa bintu byonso byawaūminine, washele nyeke muntu wa lwitabijo lukatampe. Waitabije kulemununwa na Yehova ne kuta’ko mutyima. Netu tubwanya kwiipangula’mba, ‘le ne muntu mwityepeje witabija madingi ne kulemununwa?’ Batwe bonso tusakilwanga bukwashi. Twiulanga lwitabijo lwa Yoba shi twitabija bukwashi.

Pano Yehova walonga’po kintu mwanda wa kusenga Yoba ku masusu andi. Yehova wanena Edifaza, mukulumpe pa basengi ba bubela basatu amba: “Bulobo bwami bubakudyendyemukila abe ne balunda nobe babidi, mwanda kemwesambilepo bya bine pondi pamo bwa mwingidi wami Yoba.” (Yoba 42:7) Langulukila’po bidi pa bino binenwa. Le Yehova wanena’mba bintu byonso byanenene bano bantu basatu byadi bya bubela nansha’mba kintu kyonso kyanenene Yoba i kya bine? Aa. * Inoko kwadi kwishila kukatampe pa bukata bwa Yoba ne bantu bamutopeka. Yoba i mutyumukwe mutyima, mutādilwe na njia, kadi bintu byobamubepela bimusansa. O mwanda wanena kyaba kimo binenwa byampikwa kulanga. Inoko, Edifaza ne balunda nandi babidi kebadipo na ano makambakano. Abo abanena pampikwa kulanga kadi bya kibengo mwanda lwitabijo lwabo i luzoze. Kebashinikangapo enka uno muntu wampikwa mambo bishima bitupu, ino kibi kutabuka, abamwekeja Yehova bibi, bamutela bu Leza wa mutyima mūmu kadi mubi!

Nanshi ke kya kutulumukapo shi Yehova walombe bano bantu bitapwa bya bei bininge. Badi bafwaninwe kulambula bañombe basamba-babidi ne mikōko milume isamba-ibidi, kadi byebalombele bivule, mwanda mu Bijila bya Mosesa ñombe wādi ulambulwa na kitobo mukatampe bu kitapwa shi bubi bwandi bubapija muzo onso mambo. (Bene Levi 4:3) Mu Bijila, banyema ba bei bininge bo bādi balambulwa bu kitapwa. Ne kadi, Yehova wānenene amba uketabija kyamulambu kya balwana na Yoba enka shi Yoba walombela bidi pa mwanda wabo. * (Yoba 42:8) Bine, mutyima wa Yoba wātūkile pa kubingijibwa na Leza wandi ne kwimwena boloke bwa Leza!

Yehova ukulupile amba Yoba usa kulonga byaamunena kulonga ne kulekela bano bantu bamusanshija bininge. Kadi Yoba kafwijijepo Shandi bumvu. (Yoba 42:9) Kikōkeji kyandi i kilomboji kikatampe kya bululame bwandi, kitabukile kulampe binenwa byandi. Kadi kibashitula dishinda dya kwesela Yoba madyese makatampe.

Yehova i “muyule kisanso kya ku mutyima kadi i wa lusa,” padi Yoba. (Yakoba 5:11) Namani? Yehova waalwija Yoba bukomo bwa ngitu. Langa’po bidi mweivwanina Yoba pa kumona ngitu yandi ‘ifufuma kupita ne pa bunkasampe,’ enka mwālaile’kyo Edihu! Kisaka kyandi ne balunda nandi bamukwatakanye, bamupa byabuntu ne kumwivwanina lusa. Yehova waalwija Yoba bupeta, wamupe pabidi bintu byonso byaadi nabyo. Le kyaso kyandi kikatampe nakyo​—kyaso kya kufwilwa bana? Ba Yoba ne wandi mukaji abasengibwa bininge pa kubutula monka bana dikumi! Ne kadi Yehova walepeja būmi bwa Yoba mu kingelengele. Yoba waendelela kwikala’ko myaka 140, waije’ko bininge, wamone ne nkongo iná ya bandi bana ikele biyampe. Tutanga’mba, “ku mfulo Yoba wafwa, kupwa kwa būmi bulampe kadi bwa nsangaji.” (Yoba 42:10-17) Kadi mu Paladisa, Yoba ne wandi mukaji wasenswe bakekala monka na kisaka kyabo, kubadila’mo ne bana dikumi bebepaile Satana.​—Yoano 5:28, 29.

Mwanda waka Yehova waesala Yoba bininge? Bible ulondolola’mba: “Mwaivwene kūminina kwa Yoba.” (Yakoba 5:11) Yoba waūminina masusu mavule oketubwanyapo ne kufwatakanya kwine. Kishima “kūminina” kilombola’mba Yoba walonga bivule kupita’ko’tu kupanda mu ano matompo. Waūminina pampikwa kujimija lwitabijo ne buswe bwasenswe Yehova. Pa kyaba kya kuloba ne kulama kīji, waitabija kulekela’nka ne bantu bamusanshija ku kusaka. Kadi kajimijepo lukulupilo lwandi nansha kintu kya bulēme mpata kwadi, bululame bwandi.—Yoba 27:5.

Netu tufwaninwe kūminina. Tubwanya kukulupila amba Satana ukalonga bukomo bwa kwitutyumuna mityima na mwaātyumwinine wa Yoba. Ino shi tūminine mu lwitabijo, twityepeje nyeke, twitabije kulekela bakwetu, ne kusumininwa kulama bululame bwetu, netu ketubwanyapo kujimija lukulupilo lwetu. (Bahebelu 10:36) Bine shi twiule lwitabijo lwa Yoba, tukalobeja Satana bininge kadi kusangaja mutyima wa Yehova wa buswe!