“Loelelwa bininge mudi Yehova, nandi ukakupa bisakasaka mutyima obe.”—Ñimbo ya Mitōto 37:4, Bwalamuni bwa Ntanda Mipya.

 “Sangala mudi Vidye, ukakupa bisaka mucima obe.”—Ñimbo ya Mitōto 37:4, Bisonekwa Bitokele.

 Kaimba wa mitōto ukankamika batōtyi ba Leza batane nsangaji mu kwikala na kipwano kya pabwipi Nandi. Boba bonso bapwene nandi uno muswelo babwanya kukulupila amba Yehova a Leza ukavuija bisakibwa byabo.

 “Loelelwa bininge mudi Yehova.” Uno musemwa ubwanya ne kwalamunwa amba “tana nsangaji yobe mikatampe mudi Yehova,” “sangela kwingidila MFUMWETU,” nansha’mba “sangela byobya bikulaile MFUMWETU.” Mu kīpi i amba, tufwaninwe ‘kutana nsangaji yetu mikatampe’ mu kwingidila Leza wa bine. (Ñimbo ya Mitōto 37:4, kunshi kwa dyani) Mwanda waka tubanena namino?

 Monka mulombwela’kyo Bible, boba batōta Yehova bamonanga bintu mwawibimwena. Bayukile Leza kadi bamonanga amba kumukōkela i kintu kya tunangu. Kulonga namino kwibalengejanga bekale na mutyima wa mundamunda utōka ne kwepuka bilubo bivule ne butyibi bufwe. (Nkindi 3:5, 6) Kimfwa, kebalobengapo bipitepite nansha kwabila bantu ba makomwa-meso ne ba budimbidimbi pobamweka amba abaloelelwa. (Ñimbo ya Mitōto 37:1, 7-9) Bantu ba Leza badi na nsangaji mwanda bayukile amba panopano ponka usa kufudija bukondame ne kupala mpalo ba kikōkeji pangala pa mwiendelejo wabo muyampe. (Ñimbo ya Mitōto 37:34) Ne kadi, badi na nsangaji mikatampe mwanda bayukile amba badi na Tata wabo wa mūlu mwine wibetabije.—Ñimbo ya Mitōto 5:12; Nkindi 27:11.

 “Ukakupa bisakasaka mutyima obe.” Bino binenwa bibwanya ne kwalamunwa amba, “ukalondolola milombelo yobe” nansha’mba, “ukakupa byosakilwa bininge.” Na bubine, Yehova kaketupepo kintu kyonso kyotumulomba. Ino pamo bwa mbutwile muyampe, Yehova uyukile i bintu’ka bya mvubu bisakilwa Bandi bana. Ne kadi, byotulomba ne mwiendelo wetu wa mu būmi bifwaninwe kukwatañana na misoñanya yandi ne kiswa-mutyima kyandi. (Nkindi 28:9; Yakoba 4:3; 1 Yoano 5:14) Shi tubalonga namino, tubwanya kufwena “Mwine wivwananga milombelo” aku tukulupīle amba usa kwitwivwana.—Ñimbo ya Mitōto 65:2; Mateo 21:22.

 Lwimbo lwa Mitōto 37 lwālembelwe na Davida, mulopwe wa Isalela wa kala. Wālembele uno mutōto mu mulembelo wa akrostike, ko kunena’mba na kulēmeka mwilondela masomo a mu alufabe. b

 Davida wālongelwe bintu bivule na bukondame. Mulopwe Solo ne bakwabo bādi bamukimba mwanda wa kumwipaya. (2 Samwele 22:1) Ino nansha nankyo, Davida wādi nyeke mutūle kikulupiji kyandi kyonso mudi Leza. Davida wādi uyukile amba dyakadilwe kantu, Yehova uketa bantu babi beshintulwile. (Ñimbo ya Mitōto 37:10, 11) Nansha shi abamweka’mba badi biyampe, pamo bwa “biyombo bibishi” bakafula’nka ku kutalulwa’ko.—Ñimbo ya Mitōto 37:2, 20, 35, 36.

 Lwimbo lwa Mitōto 37 lulombola kwishila kudi pa bukata bwa byobya bikafikila boba balonda misoñanya ya Leza ne byobya bikafikila boba beifutulula. (Ñimbo ya Mitōto 37:16, 17, 21, 22, 27, 28) Ne kadi uno mutōto witukwasha twikale na tunangu ne kwikala bantu betabijibwe na Leza.

 Tala ino video mīpi, umone myanda mikatampe idi mu mukanda wa Ñimbo ya Mitōto.