“Ino boba bakulupile mudi Yehova bakamona monka bukomo. Bakalelemba na mapapa pamo bwa mikebo. Bakanyema ne kupungila mpika; bakenda ne kukōka mpika.”—Isaya 40:31, Bwalamuni bwa Ntanda Mipya.

 “Ino nanshi boba bakungila Yehova bakasangula bukomo bwabo; bakalelemba na mapapa’nka bwa mukebo; bakanyema, ne kukōkapo kwine mpika; bakananga, ne kupungilapo kwine mpikila.”—Isaya 40:31, Mukanda Ukola.

 Yehova a Leza ukulupija batōtyi bandi amba ukebapa bukomo bobasakilwa mwanda wa kulwa ne kūminina bikoleja byo-byonso bibwanya kwibatana.

 “Boba bakulupile mudi Yehova bakamona monka bukomo.” Boba besumbidile Leza, nansha’mba bakulupile amba Leza udi na bukomo kadi usakanga kukwasha bantu bandi, babwanya kukulupila amba ukebakwatakanya. (Nkindi 3:5, 6) Muswelo umo bidi ubwanya Leza kukomeja boba bamutōta i na kwibapa mushipiditu wandi ujila, nansha’mba bukomo bwandi bwingila.—Luka 11:13.

 “Bakalelemba na mapapa pamo bwa mikebo.” Bino binenwa bya kyelekejo bilanguluja bilombola lupusa lubwanya kwikala na bukomo bwa Leza padi muntu. Pa kusaka’mba mukebo ukandile’ko mūlu ne kulelemba pampikwa kujinya mapapa, wikalanga mwisumbidile luvula lwa kyanga lukanda mūlu. Shi mukebo ubafika pa luno luvula lwa kyanga, ubālanga mapapa ao kupwa keujokoloka mu luvula’mwa, kino kiulengejanga ukandile’ko mūlu bininge. Poupita luvula lumo lwa kyanga ne kwenda ku lukwabo, mukebo ushalanga mansá mavule mu lwelēle enka ne byoukafika kowenda na kwingidija bukomo butyetye.

 “Bakanyema ne kupungila mpika.” Bikoleja bya mu būmi bibwanya kwituzozeja ku ngitu ne mu malango, inoko tubwanya kūminina na bukomo bwitupanga Leza. Bubwanya kwitukomeja tulonge byoloke nansha shi tudi mu makambakano makomo. Mutumibwa Polo wāuminine matompo makomo wālembele amba: “Mu byonsololo ngidi na bukomo kupityila kudi yewa unkomeja.”—Bene Fidipai 4:13.

 Leza wāludikile mupolofeto Isaya alembe bino binenwa mu katwa ka mwānda Y.K. Nansha kino kisonekwa byokitala bengidi ba Leza bonso ba kikōkeji, bimweka bu Yehova wēbilembeje mwanda wa kukankamika Bayuda bādi ba kuselelwa mu Babiloni mu bula bwa myaka 70. Pātambile Bayuda mu bu misungi ne kujokela mu yabo ntanda, bēmwenine kufikidila kwa binenwa bya Leza. (Isaya 40:1-3) Leza wēbapele bukomo bwa kwenda lwendo lulampe kadi lwa makambakano, b tamba ku Babiloni kufika ku Yelusalema mu 537 Y.K.—Isaya 40:29.