“Pāna kudi Yehova byonso byolonga, kadi mpango yobe yonso ikendeka biyampe.”—Nkindi 16:3, Bwalamuni bwa Ntanda Mipya.

 “Tudila Vidye kyobe kilongwane mpango yobe ikavuika.”—Nkindi 16:3, Bisonekwa Bitokele.

 Luno lukindi lukulupija boba batōta Leza wa bine amba mpango yabo ikendeka shi batūle kikulupiji kyabo mwadi na kukimba buludiki bwandi ne kwibulonda.

 “Pāna kudi Yehova byonso byolonga.” Kumeso kwa kukwata butyibi, batōtyi ba Yehova a batalanga kwadi na kwityepeja mwanda wa ebaludike. (Yakoba 1:5) Mwanda waka? Dibajinji bidi, divule dine bantu bekalanga na lupusa lutyetye pa byobya bibatana mu būmi, padi ne kwikala na lupusa mpika. (Musapudi 9:11; Yakoba 4:13-15) Kutentekela papo, bantu babwanya kusaka kulonga kintu kapanda ino babulwa tunangu. Pa buno bubinga, bavule baloñanga bya tunangu na kupa, nansha’mba na kwela mpango yabo kudi Leza. Bapānanga’yo kudi Leza na kumulomba ebaludike, ne na kulonga bintu mwendele kiswa-mutyima kyandi monka mokilombwedilwe mu Kinenwa kyandi kilembwe, Bible.—Nkindi 3:5, 6; 2 Temote 3:16, 17.

 Binenwa “tudila Vidye b kyobe kilongwa,” bishintulula kishima pa kishima’mba “kunkulumwina mingilo yobe kudi Vidye.” Kingidilwa kimo kya bukimbi kinena’mba, uno musemwa ulombola “muntu upa kiselwa kyaselele muntu mukwabo mukomo bininge kadi ubwanya kwikisela biyampe.” Boba bakulupile Leza na kwityepeja babwanya kukulupila amba ukebakwasha ne kwibakwatakanya.—Ñimbo ya Mitōto 37:5; 55:22.

 Musemwa “byonso byolonga” keulombolapo amba Leza uketabija nansha kwesela mpango yonso ibwanya kwikala na bantu. Pa kusaka’mba Yehova esele mpango kampanda, ifwaninwe kukwatañana na misoñanya yandi ne na kiswa-mutyima kyandi. (Ñimbo ya Mitōto 127:1; 1 Yoano 5:14) Leza keselangapo kubulwa kikōkeji. “Ukankajanga mpango ya babi.” (Ñimbo ya Mitōto 146:9) Ukwatakanyanga boba balombola kikōkeji kwadi na kulēmeka misoñanya yatūdile’ko idi mu Bible.—Ñimbo ya Mitōto 37:23.

 “Kadi mpango yobe yonso ikendeka biyampe.” Malamuni amo i malamune uno musemwa amba mpango “yobe ikakomejibwa.” Mu Bisonekwa bya Kihebelu, bitwanga na bantu bu Kipwanino kya Kala, kishima kyalamwinwe mu Kiluba amba “ikendeka” kibwanya ne kwalamunwa bu “ikakomejibwa,” kidi na mulangwe wa kwala kyalwilo, kadi kifunkilanga divule dine pa kushimatyija kwa bintu bipangile Leza. (Nkindi 3:19; Yelemia 10:12) Muswelo umo onka, Leza ukashimatyija mpango ya boba balonga byoloke ku meso andi, na kwibakwasha bekale na būmi buyampe, bushimatyije, kadi bwa nsangaji.—Ñimbo ya Mitōto 20:4; Nkindi 12:3.

 Luno lukindi lwālembelwe na Mulopwe Solomone, mwine wālembele bivule bitanwa mu mukanda wa Nkindi. Wānenene nkindi tununu na tununu mwanda wādi na tunangu twāmupēle Leza.—1 Balopwe 4:29, 32; 10:23, 24.

 Mu shapita 16, Solomone ushilula’mo na kutendela tunangu twa Leza ne kulombola mwashikidilwe mitatulo. (Nkindi 16:1-5) Kupwa papo, uno shapita ukwasha batangi bevwanije mwanda mukatampe wa mfulo mwine wimanine’po bininge mukanda wa Nkindi wa amba: Bantu babwanya kwikala na tunangu twa bine ne kadi bintu bikebendekela biyampe enka shi i betyepeje, baleka Leza aludike matabula abo. (Nkindi 16:3, 6-8, 18-23) Buno bubine bwa kyalwilo i bwisambilwe’po divule dine mu Bible.—Ñimbo ya Mitōto 1:1-3; Isaya 26:3; Yelemia 17:7, 8; 1 Yoano 3:22.

 Tala ino video mīpi umone mwanda mukatampe udi mu mukanda wa Nkindi.