“I kutupu wa buswe bukatampe kutabuka buno’bu, amba muntu apāne būmi bwandi pa mwanda wa balunda nandi.”—Yoano 15:13, Bwalamuni bwa Ntanda Mipya.

 “Kekudipo kisanso kipityile kya kupana bumi pa mwanda wa balunda nandi.”—Yoano 15:13, Dibuku Dijila.

 Yesu wādi ukwasha balondi bandi bevwanije amba buswe bwabo bwādi bufwaninwe kwikala bukatampe mu ludingo lwa amba umo ne umo mobadi etabije kufwila mukwabo.

 Mu binenwa bibadikīle, Yesu wālombwele’mo bandi bana ba bwanga amba: “Ino’i yo mbila yami, amba mwisanswe banwe bene na bene monka monemusanshilwe.” (Yoano 15:12) Le Yesu wādi wibasenswe muswelo’ko? Bwādi buswe bwa kubulwa kwisakila kadi bwa kwipāna. Mu mwingilo wandi wa pano pa ntanda, Yesu wādi utūla bisakibwa bya balondi bandi ne bya bantu bakwabo pa kifuko kibajinji. Wādi undapa babela ne kwibafundija bitala Bulopwe bwa Leza. a Wāingile’nka ne mingilo imweka bu ya panshi mwanda wa kukwasha bakwabo. (Mateo 9:35; Luka 22:27; Yoano 13:3-5) Inoko mu Yoano 15:13, Yesu wādi wisambila pa kilongwa kikatampe bininge kya buswe. Na bubine, mansá kampanda pa kupita’po kupwa kwa aye kunena bino binenwa, wālombwele buswe bukatampe namino kitatyi kyawāpēne na mutyima tō “būmi bwandi ke kinkūlwa kya kukūla bavule bene.” (Mateo 20:28; 22:39) Namino, wālombwele mu muswelo wa pa bula bininge amba usenswe bakwabo kupita’ko mwaesanshilwe aye mwine.

 Yesu usenswe bantu. Ino usenswe bininge boba balonda bufundiji bwandi. Wādi umwene bandi bana ba bwanga bu balunda nandi ba pabwipi mwanda bādi bakōkela bulombodi bwandi, ne kadi bāmulamete paādi mu matompo. (Luka 22:28; Yoano 15:14, 15) Kino kyo kyāmutonwene apāne būmi bwandi pa mwanda wabo.

 Bene Kidishitu ba mu myaka katwa kabajinji bālamine binenwa bya Yesu mu mityima yabo, kadi bādi na mutyima wa kufwa pa mwanda wa bakwabo. (1 Yoano 3:16) Kunena na bubine, buswe bwa kubulwa kwisakila—buswe bwine bwālombwele Yesu—bwādi bwa kwikala ke kayukeno ka binebine kayukanya bene Kidishitu ba bine.—Yoano 13:34, 35.

 Tamba mu shapita 13 kutūla ku shapita 17 wa Evanjile ya Yoano, mudi madingi a mfulo a Yesu awāpele batumibwa bandi ba kikōkeji 11, ne milombelo yandi ya mfulo yaālombēle paādi nabo. Aye upwa’tu kulonga bino, kepāpityilepo ne mansá mavule mene waipaibwa. Mu shapita 15, Yesu wāletele’mo kimfwa kyaādingakenye’mo bandi bana ba bwanga na misambo ipa bipa ku muñanza, mwanda wa kulombola’mba bādi bafwaninwe kwikala nandi nyeke umbumo pa kulombola amba bine i balondi bandi. Wēbasoñenye amba, “mupe’nka kupa bipa bingi.” (Yoano 15:1-5, 8) Muswelo umo bidi obaloñanga kino i na kulombola buswe bwa kwipāna pa mwanda wa bakwabo, mwine mubadilwa ne kusapula musapu wāsapwile Yesu—“myanda miyampe ya Bulopwe bwa Leza.”—Luka 4:43; Yoano 15:10, 17.

 Tala ino video mīpi, umone myanda mikatampe idi mu mukanda wa Yoano.