Kumeso kwa kutumbuka, bipupulu bisakilwanga kyanga kya dyuba kya kukabija misunya ibikwashanga bitumbuke. Inoko shi kūlu i kufinde, kipupulu kitwa bu Piéride du Chou kibadikilanga kutumbuka bipupulu bikwabo kebyatumbukile. Mwanda waka i kishile na bikwabo?

 Languluka’po bidi: Kumeso kwa kutumbuka, bipupulu bya miswelo mivule byanikanga masala abyo ku dyuba nansha kwiabāla atadidile ku dyuba. Inoko, kipupulu kitwa bu piéride du chou kiabālanga mu bupunga bwa V. Bukimbi bulombola’mba pa kusaka kikabije biyampe, kino kipupulu kifwaninwe kubāla disala ne disala ditadidile ku dyuba. Kulonga uno muswelo kulengejanga kyanga kitwele mu misunya ya pa kyadi ikikwashanga pa kutumbuka, ayo’tu ikaba kyatumbuka.

 Bakimbi ba ku Iniveleshite ya Exeter mu Angeletele, baiwile bupunga bwa kipupulu kitwa bu piéride du chou mwanda wa kupunga mapanu a mudilo mungi. Mu uno muswelo, bamwene amba bibwanika kubweja’ko bukomo bwa mudilo kutabuka 50 pa katwa.

 Kadi bakimbi bamwene amba masala akyo apēlanga bininge. Bano bakimbi pa kwiula bupunga bwa V ne kupēla kwa masala akyo, bapungile mapanu mayampe kadi apēla bininge. Pa kino, Polofesele Richard ffrench-Constant wa mu kisumpi kya bakimbi wanenene amba, kino kipupulu “kidi na bwino’po kashā bwa kukoka kyanga kya dyuba.”

 Le ulanga’po namani? Le bupunga bwa kipupulu kitwa bu piéride du chou bwēikadile’ko’ni nansha bwāpangilwe?