Kīshi kiyukene bininge kitwa bu Patelle, i nkalanyonga wa mu mema wa kiboyo kisongoke udi na meno a bukomo butulumukwa. Ano meno adi na tujilojilo tukomo twitwa bu goethite, kadi tuno tujilojilo tutyetutye ato’ko tukomo i tubambakanyibwe na bumeni bunekena.

 Languluka’po bidi: Kibuyu kya kīshi kitwa bu patelle, kine kiifwene na ludimi, kidi na meno matontamane mepange mu mulongo, dino ne dino kedibwanyapo kufika pa milimetele imo, kadi kino kīshi kibwanya kukolola nao. Ano meno afwaninwe kwikala makomo kadi mōmu mwa kukolwela mulé okidyanga pa mabwe.

 Kupityila ku mikoloshikope ya bukomo bukatampe, bakimbi bapimine bukomo bwa meno engidijanga kino kīshi pampikwa kukōka. Bajingulwile amba meno a kīshi kitwa bu Patelle adi na bukomo kupita kintu kyo-kyonso kyokebadi bapime, enka ne bukonde bwa ntanda-kumbidi bwine. Mwimaniji wa bano bakimbi wanenene amba: “Mu bintu byotupunga, tufwaninwe kulonga bukomo bwa kwiula bupunga bwa meno a kīshi kitwa bu Patelle.”

 Bakimbi betabije amba bintu bilongelwe nabyo meno a kīshi kitwa bu Patelle bibwanya kukwasha pa kupunga myotoka, byombo, maamviyo, enka ne meno a kwela bantu.

 Le ulanga’po namani? Le meno a bupunga butulumukwa a kīshi kitwa bu Patelle ēikadile’ko’ni nansha kudi wēalongele?