Ñimbo ya Mitōto 104:1-35
104 Ntendele* Yehova.+
A Yehova Leza wami, wi mukatampe bininge.+
Uvwele bukatakata* ne buya bwa dyangi.+
2 Abe wi mwipombe kitōkeji+ pamo bwa kivwalwa;Ubādile madiulu pamo bwa pema.+
3 Aye utandikile makomba a byumba byandi bya peulu mu mema a mūlu,*+Walonga makumbi ke dikalo dyandi,+Wenda pa mapapa a kivula.+
4 Walonga bamwikeulu bandi ke mishipiditu,Bengidi bandi ke mudilo uloteja.+
5 Aye ushimatyije ntanda pa byalwilo byayo;+Keikajinapo pa kifuko kyayo* nyeke ne nyekeke.+
6 Abe weipūtyile mema mangimangi pamo bwa kivwalwa.+
Mema aimana peulu pa ngulu.
7 Abe pa kufuna anyema;+Pa lunwa lwa mikungulo yobe, anyema lubilo na luzakalo.
8 —Ngulu yakanda+ ne misanza nayo yatūka—Ku kifuko kyowebitūdile’ko.
9 Watūdile mukalo amba keakatabuka,+Amba keakapūta monka ntanda nansha dimo.
10 Aye utumanga masulo a mema mu misanza;*Keakuke pa bukata bwa ngulu.
11 Aletelanga banyema bonso ba mu ntanda mema;Bampunda ba ntanda kebepu kyumwa.
12 Byoni bya mūlu bikalanga pangala pao;Bidilanga mu kivunda* kya mani.
13 Usangilanga ngulu mema aye mu byumba byandi bya peulu.+
Ntanda ibaikuta bipa bya mingilo yobe.+
14 Aye umenejanga biyombo bya bañombeNe munamuna ya kukwasha bantu,+Mwanda wa kumeneja byakudya pa nshi
15 Ne vinyu isangaja mutyima wa muntu,+Māni akelemeja mpala,Ne mukate ukomeja mutyima wa muntu wa kufwa.+
16 Mityi ya Yehova ibaikuta,Mityi ya sedele ya Lebanona yawakunine,
17 Kwine kwalanga byoni manswa.Kīkalo kya kakumbi+ kidi mu mityi ya jenevidiye.
18 Ngulu milamila i ya bambuji ba mu ngulu;+Bimabwe i kinyemeno kya badama.+
19 Walongele kweji wa kuyukanya bitatyi bitungwe;Dyuba diyukile biyampe kitatyi kya kupona.+
20 Uletanga fukutu, bufuku bwaila,+Kitatyi kizeuluka banyema ba ntanda bonso ba mwitó.
21 Bantambo bana* babuluminanga kikwatwa kyabo+Ne kukimba byakudya byabo kudi Leza.+
22 Shi dyuba dibatambe,Bataluka bakalāla mu mikembo yabo.
23 Muntu wendanga ku mwingilo wandi,Kadi ususukanga na mingilo kufika ne ku kyolwa.
24 A Yehova, mingilo yobe bungi’yo’po!+
Walongele yonso na tunangu.+
Ntanda i miyule byobya byolongele.
25 Tala dijiba, dikatampe bininge kadi dipāmuke,Musakanya bintu byūmi kebibadika, bityetye ne bikatampe bine.+
26 Mwendanga byombo,Ne Leviatane,*+ owalongele kukaila’mo.
27 Abyo byonso bikutengeleWibipe byakudya byabyo pa kitatyi kyabyo.+
28 Byobya byowibipa, bikongakanyanga’byo.+
Kitatyi kyobāla kuboko kobe, byaikuta bintu biyampe.+
29 Shi wafya mpala yobe, byakambakana.
Shi watalula mushipiditu wabyo, byafwa ne kujokela ku luvumbi.+
30 Shi watuma mushipiditu obe, byapangwa,+Kadi walamunanga nshi ke mipya.
31 Ntumbo ya Yehova ikalādila nyeke.
Yehova ukasangela mingilo yandi.+
32 Utala ntanda, nayo keizakala;Utenga ngulu, nayo keifituka.+
33 Nkembilanga Yehova+ mu būmi bwami bonso;Nkembilanga Leza wami mitendelo* kyaba kyonso kyondi mūmi.+
34 Milangwe yami imusangaje.*
Nkasepelelanga mudi Yehova.
35 Babipya-mambo bakajimina pa ntanda,Kadi babi kebakekala’kopo monka.+
Ntendele* Yehova. Tendelai Yah!*
Kunshi kwa Dyani
^ Nansha’mba “bulēme.”
^ Nansha’mba “Muya wami utendele.”
^ Kishima pa kishima i, “mu mema.”
^ Nansha’mba “Keikatelententapo.”
^ Nansha’mba “binekaneka.”
^ Nansha’mba “kifinga.”
^ Nansha’mba “Bantambo bana ba manyenze.”
^ Tala Nshintulwilo ya Bishima.
^ Nansha’mba “Nkombelanga Leza wami minjiki.”
^ Bibwanika padi i, “Kulanguluka kwami padi aye kwikale kusangaja.”
^ Nansha’mba “Muya wami utendele.”
^ Nansha’mba “Aleluya!” “Yah” i dijina Yehova mu kīpi.
