Balopwe Umbajinji 17:1-24
17 Ebiya Ediya*+ mwine Tishibi, mwikadi wa ku Ngileade,+ wanena Ahaba amba: “Bine ne Yehova Leza wa Isalela mwine oñingidila* byadi mūmi, mu ino myaka kekusapo kwikala lumé nansha mvula poso’nka shi nanena’kyo!”+
2 Kinenwa kya Yehova kyaiya kwadi amba:
3 “Taluka kuno, enda dya kutunduka wifye ku Musanza wa Kedite,* kutunduka kwa Yodano.
4 Ufwaninwe kutoma mema a ku kamunonga, nsa kusoñanya binkombe bikuletele byakudya kwine’kwa.”+
5 Ponkapo waenda walonga mungya mwamunenene Yehova; waenda wakashikata dya ku Musanza wa Kedite,* kutunduka kwa Yodano.
6 Binkombe byadi bimuletela mikate ne mwita wa ntanda lubanga, mikate ne mwita wa ntanda ku kyolwa, kadi wadi utoma mema a ku kamunonga’ka.+
7 Ino kupwa kwa mafuku matyetye, kamunonga kaūma,+ mwanda kekwadipo kukinoka mvula mu yoya ntanda.
8 Ebiya kinenwa kya Yehova kyaiya kwadi amba:
9 “Taluka, enda ku Zelefata, kibundi kya Shidona wikale kwine’kwa. Tala! Nsa kunena mukaji wa kishala akupe byakudya.”+
10 Penepo wataluka waenda ku Zelefata. Aye pa kufika ku kibelo kya kibundi, wamona mukaji wa kishala uboya nkuni. Ebiya wamwita kanena’mba: “Mpaile’kopo mema matyetye mu nkopo ntome.”+
11 Aye paadi kaenda kukeasela, wamwita’mba: “Nakwisāshila, mpaile’ko ne kipindi kya mukate mu kuboko kobe.”
12 Nandi wamunena’mba: “Bine ne Yehova Leza obe byadi mūmi, nkidipo na mukate, ndi’nka na mukono umo wa bukula mu mulondo ne māni matyetye mu katyibi.+ Pano mboyanga nkuni mityetye, ñende nkatēke kami kakudya ne ka wami mwana. Shi tubapu kudya penepa ketufu.”
13 Kupwa Ediya wamunena’mba: “Kokikwatwa moyo. Enda ulonge’nka mowanenena’mo. Ino dibajinji nongele kamukate kajokoloke na tudibwa tudi’ko’to undetele’ko. Kupwa kolonga kobe ne ka obe mwana.
14 Mwanda mo mwanenena Yehova Leza wa Isalela namino amba: ‘Bukula kebukapupo mu mulondo, ne māni keakapupo mu katyibi ka māni kufika ne difuku dikanokeja Yehova mvula pa nshi.’”+
15 Penepo waenda walonga monka mwamunenene Ediya, ebiya wadya nandi ne ba mu njibo yandi mu mafuku mavule.+
16 Bukula kebwapwilepo mu mulondo, ne māni nao keapwilepo mu katyibi ka māni, mungya kinenwa kya Yehova kyaanenene kupityila kudi Ediya.
17 Kupwa kwa bino bintu, mwana wa mwana-mukaji mwinē njibo’wa wabela, kadi misongo yandi yaninga bininge waleka’nka ne kufoma.+
18 Ponkapo wanena Ediya amba: “Le udi nami mwanda’ka,* abe muntu wa Leza wa bine? Le ubaiya kumvuluja mambo ami ne kungipaila mwana?”+
19 Ino aye wamunena’mba: “Mpe obe mwana.” Penepo wamuyata ku makasa andi wakanda nandi mu kyumba kya pangala mwaadi ushikata, ebiya wamulādika pa butanda bwandi.+
20 Waabija Yehova amba: “A Yehova Leza wami,+ le kosanshija kadi uno mukaji wa kishala onshikete nandi na kwipaya wandi mwana?”
21 Penepo wetamwina padi mwana misunsa isatu kaabija Yehova amba: “A Yehova Leza wami, nakwisāshila, leka būmi* bwa uno mwana bujokele mwadi.”
22 Yehova waivwana kulomba kwa Ediya,+ ne būmi* bwa mwana bwajokela mwadi, waikala monka mūmi.*+
23 Ediya wasela mwana watūka nandi mu kyumba kya pangala, watwela mu njibo wapa’ye inandi; penepo Ediya wanena’mba: “Tala, obe mwana i mūmi.”+
24 Ponkapo mwana-mukaji’wa wanena Ediya amba: “Pano nayuka amba bine wi muntu wa Leza+ ne amba kinenwa kya Yehova kidi mu kyakanwa kyobe i kya bine.”
Kunshi kwa Dyani
^ Ko kushintulula’mba “Leza Wami I Yehova.”
^ Kishima pa kishima i, “oñimene kumeso.”
^ Nansha’mba “Kinekaneka kya Kedite.”
^ Nansha’mba “Kinekaneka kya Kedite.”
^ Nansha’mba “Le ndi nobe mwanda’ka, . . .?”
^ Nansha’mba “muya.”
^ Nansha’mba “muya.”
^ Nansha’mba “wajokela ku būmi.”
