Bilongwa bya Mafuku Umbajinji 10:1-14
-
Lufu lwa Solo ne lwa bandi bana (1-14)
10 Ino bene Fidishitia badi balwa na Isalela. Penepo bantu ba Isalela banyema ku meso a bene Fidishitia, kadi bavule bapona batapwe pa Lūlu lwa Ngidiboa.+
2 Bene Fidishitia badi benda batyinya Solo ne bandi bana, kadi bene Fidishitia baipaya Yonafane, Abinadaba, ne Maleki-Shua,+ bana ba Solo bana-balume.
3 Bulwi bwananina Solo bininge, kadi belanga miketo bamumona, ne kadi boba belanga miketo bamutapa bilonda.+
4 Ponkapo Solo wanena kyabuta wandi amba: “Somona kipete kyobe unsabakanye nakyo, kutyina’mba bano bantu ba kubulwa kutwela kwisao bakāya ne kunonga bintu pampikwa kafuku.”*+ Ino kyabuta wandi wapela, mwanda wakwetwe moyo bininge. Penepo Solo wasela kipete waponena’po.+
5 Kyabuta wandi pa kumona’mba Solo wafu, nandi waponena pa kipete kyandi wafwa.
6 Enka nenki Solo ne bandi bana basatu bafwa, ne boba bonso ba mu njibo yandi bafwa pamo.+
7 Bantu bonso ba Isalela badi mu musanza* pa kumona’mba bantu bonso abanyema ne amba Solo ne bandi bana abafu, bashilula kushiya bibundi kebanyema; penepo bene Fidishitia baiya bashikata’mo.
8 Difuku dilonda’ko, paile bene Fidishitia kuvūla bantu batapwe byobadi nabyo, batana Solo ne bandi bana balēle pa Lūlu lwa Ngidiboa.+
9 Ebiya bamuvūla, bamuketa mutwe ne kusela byabulwi byandi, kupwa batuma musapu mu ntanda yonso ya bene Fidishitia mwanda wa kusambakanya myanda ku bilezaleza+ byabo ne mu bantu.
10 Kupwa batūla byabulwi byandi mu njibo* ya leza wabo, babambila kabamba kandi ku njibo ya Dakona.+
11 Bekadi ba Yabeshe+ mu Ngileade pa kwivwana byobalongele Solo kudi bene Fidishitia,+
12 bantu bonso ba bulwi bataluka, bakasela ngitu mifwe ya Solo ne ngitu mifwe ya bandi bana. Bebaselela ku Yabeshe, bajīka mikupa yabo munshi mwa mutyi mukatampe mu Yabeshe,+ kupwa bashikilwa na nzala mafuku asamba-abidi.
13 Enka nenki Solo wafwa mwanda kalombwelepo kikōkeji kudi Yehova, kakōkelepo kinenwa kya Yehova,+ kadi wakepangwile ubuka na bibanda+
14 pa kyaba kya kwipangula Yehova. O mwanda wamwipaile kupwa wapa Davida mwanā Yese bulopwe.+
Kunshi kwa Dyani
^ Nansha’mba “bya nshikani.”
^ Nansha’mba “dilungu dya musanza.”
^ Nansha’mba “tempelo.”
