Bilongwa bya Mafuku Umbajinji 13:1-14
13 Davida wesambile pamo na bakata ba tununu ne ba tutwa ne na batangidiji bonso.+
2 Kupwa Davida wanena kipwilo kyonso kya Isalela amba: “Shi i biyampe komudi ne shi i bitabijibwe na Yehova Leza wetu, tutumei musapu ku banabetu bashele mu bipindi byonso bya ntanda ya Isalela ne ku babitobo ne bene Levi mu bibundi+ byabo bya madyo bāye belunge netu.
3 Tujokejei Sanduku+ wa Leza wetu.” Mwanda kebadipo bamulamine biyampe mu mafuku a Solo.+
4 Kipwilo kyonso kyaitabija kulonga enka nabya, mwanda bantu bonso bamwene amba i byoloke.
5 Penepo Davida wakongakanya Isalela ense, tamba ku munonga* wa Edipito kutūla ne ku Lebo-Hamata,*+ mwanda wa kusela Sanduku wa Leza wa bine ku Kidiata-Yeadimi.+
6 Davida ne Isalela ense bakanda ku Balā,+ ku Kidiata-yeadimi, ntanda ya Yuda, kukasela’ko Sanduku wa Leza wa bine, Yehova, ushikete pa lupona pangala* pa bakelubi,+ kwine kwityilwa dijina dyandi.
7 Ino batūla Sanduku wa Leza wa bine pa dikalo dipya,+ bamusela ku njibo ya Abinadaba, kadi Uza ne Ahiyo badi bendeja dikalo’dya.+
8 Davida ne Isalela ense badi basepelela ku meso a Leza wa bine na bukomo bwabo bonso, koku bemba ñimbo, bomba nsense, ne byombanwa bikwabo bya myonji, ne mañoma,+ ne membo,+ ne bimpungidi.+
9 Ino pobafikile ku kipūdilo kya Kidone, Uza waolola kuboko kwandi wakwata ku Sanduku, mwanda bañombe baswile kumuponeja.
10 Ponkapo bulobo bwa Yehova bwaakila Uza, wamukupila mwanda waolwedile kuboko kwandi ku Sanduku,+ wafwila ponka ku meso a Leza.+
11 Ino Davida waloba* mwanda wa bukalabale bwa Yehova bwaakīle Uza; ne kifuko’kya kitwanga bu Peleze-Uza* kufika ne dyalelo.
12 Ebiya Davida wakwatwa Leza wa bine moyo mu dine difuku’dya kanena’mba: “Le mbwanya namani kuselela Sanduku wa Leza wa bine kwami?”+
13 Davida kaselēlepo Sanduku kwaadi mu Kibundi kya Davida, ino wakamutūdija ku njibo ya Obede-Edome mwine Ngata.
14 Sanduku wa Leza wa bine wadi na ba mu njibo ya Obede-Edome, waikala mu njibo yandi myeji isatu, kadi Yehova wadi wesela’nka kwesela ba mu njibo ya Obede-Edome ne byonso byaadi nabyo.+
Kunshi kwa Dyani
^ Nansha’mba “tamba ku Shihole.”
^ Nansha’mba “kibelo kya Hamata.”
^ Bibwanika padi i, “pa bukata.”
^ Nansha’mba “wafītwa.”
^ Ko kushintulula’mba “Kusabikila Uza.”
