Bilongwa bya Mafuku Umbajinji 16:1-43
16 Penepo batweja Sanduku wa Leza wa bine, bamutūla munda mwa pema wamushimikīle Davida;+ balambula ne byamulambu bisōkwe ne bitapwa bya kipwano ku meso a Leza wa bine.+
2 Davida pa kupwa kulambula byamulambu bisōkwe+ ne bitapwa bya kipwano,+ waesela bantu mu dijina dya Yehova.
3 Ne kadi, waabila bene Isalela bonso, mwana-mulume ense ne mwana-mukaji ense, mukate mujokoloke, mukate wa tukonkoma, ne mukate wa mañanza.
4 Kupwa watonga’ko bene Levi bamo ba kwingila ku meso a Sanduku wa Yehova,+ ba kulēmeka,* kufwija’ko, ne kutendela Yehova Leza wa Isalela.
5 Asafa+ ye wadi mutwe, ne wa bubidi umulonda i Zekadia; ne Yeiele, Shemilamote, Yehiele, Matitia, Ediabu, Benaya, Obede-Edome, ne Yeiele+ badi bomba byombanwa bya myonji ne nsense;+ Asafa nandi wadi omba membo,+
6 ne babitobo, ba Benaya ne Yahaziele badi bēla bimpungidi kyaba kyonso kumeso kwa sanduku wa kipwano kya Leza wa bine.
7 I mu dine difuku’dya mwaletele dibajinji Davida kyabuntu kya lwimbo lwa kufwija’ko Yehova kupityila kudi Asafa+ ne banababo amba:
8 “Fwijai’ko Yehova,+ itai dijina dyandi,Yukanyai bilongwa byandi mu bantu!+
9 Mwimbilei, mwimbilei mitendelo,*+Langulukilai* pa mingilo yandi yonso ya kutendelwa.+
10 Mwitumbijei pangala pa dijina dyandi dijila.+
Mityima ya boba bakimba Yehova isangale.+
11 Kimbai Yehova+ ne bukomo bwandi.
Kimbai mpala* yandi kyaba kyonso.+
12 Vulukai mingilo ya kutendelwa yalongele,+Bingelengele byandi ne butyibi bwatyibile,
13 Banwe lutundu* lwa Isalela mwingidi wandi,+Banwe bana ba Yakoba, batongwe bandi.+
14 Aye i Yehova Leza wetu.+
Butyibi bwandi budi ntanda yonso.+
15 Vulukai kipwano kyandi nyeke,Mulao waālaile,* ku nkongo kanunu,+
16 Kipwano kyaāsambile na Abalahama,+Ne mutyipo waātyipīle Izake,+
17 Mwine waātūdile bu lubila kudi Yakoba+Ne bu kipwano kya myaka na myaka kudi Isalela,
18 Amba, ‘Nkakupa ntanda ya Kenani+Ke bupyani bukupyanikilwe.’+
19 Kino kyālongekele pomwādi mukidi butyetye,Bine, butyetye bininge, kadi mwādi beni mu ntanda.+
20 Bādi basanka ku ou muzo ke ku ou muzo,Ku bobu bulopwe ke ku bantu bakwabo.+
21 Kālekelepo muntu nansha umo ebamweshe malwa,+Ino wādingile balopwe pa mwanda wabo,+
22 Amba, ‘Kemukitengai bashingwe māni bami,Kadi kemukilongai bapolofeto bami kibi nansha kimo.’+
23 Imbilai Yehova, ntanda yonso!
Sapulai lupandilo lwandi difuku ne difuku!+
24 Sapulai ntumbo yandi mu mizo,Mingilo yandi ya kutendelwa mu bantu bonso.
25 Mwanda Yehova i mukata kadi i mufwaninwe kutendelwa bininge.
Uleñanga nzuba kupita baleza bakwabo bonso.+
26 Baleza bonso ba bantu i baleza ba bituputupu,+Ino Yehova ye walongele madiulu.+
27 Bukatakata* ne buya bwa dyangi bidi ku meso andi;+Bukomo ne nsangaji bidi mu kīkalo kyandi.+
28 Pai Yehova kyokya kimufwaninwe, a bisaka bya bantu,Pai Yehova kyokya kimufwaninwe pa mwanda wa ntumbo ne bukomo bwandi.+
29 Pai Yehova ntumbo ifwaninwe dijina dyandi;+Letai kyabuntu ne kutwela ku meso andi.+
Mwivukwilei kudi* Yehova koku muvwele bivwalwa bya dyangi bijila.*+
30 Zakalai ku meso andi, ntanda yonso!
Ntanda* i mikomejibwe pototo; keibwanyapo kujina.*+
31 Madiulu asangale, kadi ntanda nayo isepelele;+Sapulai mu mizo amba: ‘Yehova wabikala ke Mulopwe!’+
32 Dijiba dikungule ne byonso biyudile’mo;Madimi ne byonso bidi’mo bisangale.
33 Mu kitatyi kimo kyonka mityi ya mu ditó yele nsadi ya tusepo ku meso a Yehova,Mwanda wiyanga* kutyibila ntanda mambo.
34 Fwijai’ko Yehova, mwanda i muyampe;+Buswe bwandi bwa ndamatyidile bulādilanga nyeke.+
35 Kadi nenai’mba: ‘Witupandije, abe Leza wa lupandilo lwetu,+Witukongakanye ne kwitukūla ku mizo,Amba tufwije’ko dijina dyobe dijila+Ne kusepelela pa kukutendela.*+
36 Yehova, Leza wa Isalela, atendelweNyeke ne nyekeke.’”*
Kadi bantu bonso banena’mba, “Amena!”* kadi batendela Yehova.
37 Kupwa Davida washiya Asafa+ ne banababo kwine’kwa ku meso a sanduku wa kipwano kya Yehova amba bengile kyaba kyonso ku meso a Sanduku,+ mungya kibidiji kya difuku ne difuku.+
38 Obede-Edome ne banababo, bantu 68, ne Obede-Edome, mwanā Yedutuna, ne Hosa badi batulama ba ku kibelo;
39 kitobo Zadoki+ ne bakwabo babitobo badi ku meso a kipema kya Yehova pa mutenta ku Ngibeone+
40 mwanda wa kulambula nyeke Yehova byamulambu bisōkwe pa kisōkelo kya kyamulambu kisōkwe, lubanga ne kyolwa kadi ne kulonga byonso bilembelwe mu Bijila bya Yehova byaajidikile Isalela.+
41 Badi pamo ne Hemana ne Yedutuna+ ne bana-balume bakwabo batongelwe, bene batelelwe pa majina abo mwanda wa kufwija’ko Yehova,+ ke-pantu “buswe bwandi bwa ndamatyidile bulādilanga nyeke”;+
42 kadi badi ne na Hemana+ ne Yedutuna ba kwila bimpungidi, ne komba membo, ne byombanwa bya kutendela nabyo* Leza wa bine; bana ba Yedutuna+ nabo badi ku kibelo.
43 Kupwa bantu bonso bajokela kwabo, Davida nandi wakesela ba mu njibo yandi.
Kunshi kwa Dyani
^ Kishima pa kishima i, “kuvuluka.”
^ Nansha’mba “mombelei minjiki.”
^ Bibwanika padi i, “Mwisambilei.”
^ Nansha’mba “kwikala’po.”
^ Kishima pa kishima i, “lukunwa.”
^ Kishima pa kishima i, “Kinenwa kyaāsoñenye.”
^ Nansha’mba “Bulēme.”
^ Nansha’mba “Tōtai.”
^ Bibwanika padi i, “mwanda wa buya bwa dyangi bwa buujila bwandi.”
^ Nansha’mba “Ntanda ipa bipa.”
^ Nansha’mba “kutenkanibwa; kusunkanibwa.”
^ Nansha’mba “waiya.”
^ Nansha’mba “kusepelela mu mitendelo yobe.”
^ Nansha’mba “Tamba nyeke kutūla ku nyeke.”
^ Nansha’mba “Mo monka!”
^ Nansha’mba “byombanwa bya lwimbo lwa.”
