Bilongwa bya Mafuku Umbajinji 19:1-19
19 Mwenda mafuku Nahashi mulopwe wa bene Amone wafwa, wandi mwana wabikala pa kyandi kyaba.+
2 Penepo Davida wanena’mba: “Nsa kulombola Hanune mwanā Nahashi buswe bwa ndamatyidile+ mwanda shandi waunombwele buswe bwa ndamatyidile.” Ebiya Davida watuma mikendi ikamusenge pa kujimija kwaajimija shandi. Ino bengidi ba Davida pa kutwela mu ntanda ya bene Amone+ mwanda wa kusenga Hanune,
3 bamfumu ba bene Amone banena Hanune amba: “Le ulanga’mba Davida walēmeka shobe pa kukutumina bantu ba kukusenga? Mwene bengidi bandi abaiya mwanda wa kukimba senene ne kukuponeja ne kubela ntanda?”
4 Penepa Hanune wayata bengidi ba Davida webatenda+ ne kusana bivwalwa byabo pa bukata kufika ne ku matako kupwa webanena bende.
5 Pobasapwidile Davida myanda ya bana-balume’ba, nandi watuma ponka na ponka bantu bakwabo kukebasambakana, mwanda bana-balume’ba bafwijibwe bumvu bininge; kadi mulopwe webasapwidile amba: “Shikatai mu Yediko+ enka ne bimena myevu monka kupwa kemujoka.”
6 Mwenda mafuku bene Amone bamona’mba abaikala kintu kinunka bibi kudi Davida, penepo Hanune ne bene Amone batuma talenta* 1 000 ya ndalama ya kufutyila makalo ne bakandanga pa tubalwe ba ku Mesopotemya,* ku Alami-Maka, ne ku Zoba.+
7 Enka nenki bafutyila makalo 32 000, pamo ne mulopwe wa Maka ne bantu bandi. Ebiya baiya batūla nkambi ku meso a Medeba.+ Bene Amone bebungila pamo tamba ku bibundi byabo kebāya kulwa bulwi.
8 Davida pa kwivwana’o, watuma Yoabe+ ne kibumbo kyonso kya divita, kubadila’mo ne ba bulwi bandi bakomokomo kutabuka.+
9 Ebiya bene Amone batamba, bepanga mu milongo ya bulwi ku kibelo kya kibundi papo balopwe baile’ba badi kwa abo bene mu ntanda.
10 Yoabe pa kumona’mba basola abamutambe’dyo kunyuma ne kumeso, watonga’ko bibumbo bilumbuluke bya basola mu Isalela webipanga mu milongo ya bulwi mwa kwisambakena na bene Shidea.+
11 Watūla bana-balume bashele’ko mu lupusa* lwa mwanabo Abishai,+ mwanda wa kwibapanga mu milongo ya bulwi mwa kwisambakena na bene Amone.
12 Kupwa wanena’mba: “Shi bene Shidea+ abankomena bininge, nabya ufwaninwe kwiya kunkūla; ino shi nobe bene Amone abakukomena bininge, nabya nsa kukukūla.
13 Tufwaninwe kwikomeja ne kukankamana+ pa mwanda wa bantu betu ne pa mwanda wa bibundi bya Leza wetu, ne kadi Yehova usa kulonga byobya biyampe ku meso andi.”
14 Kupwa Yoabe ne bantu bandi bafwena kwisambakana na bene Shidea mu bulwi, nabo banyema ku meso andi.+
15 Bene Amone pa kumona’mba bene Shidea abanyema, nabo banyema ku meso a mwanabo Abishai bakatwela mu kibundi. Kupwa Yoabe waiya ku Yelusalema.
16 Bene Shidea pa kumona’mba abanekenibwa na Isalela, batuma mikendi mwanda wa kwityija bene Shidea ba ku ntanda ya Munonga,*+ pamo ne Shofake mukata wa kibumbo kya Hadadezele wibaludika.+
17 Musapu pa kufika kudi Davida, ponkapo wakongakanya Isalela ense, waabuka Yodano waiya kobadi, wapanga ba bulwi bandi mu milongo ya bulwi mwanda wa kulwa nabo. Davida wapanga ba bulwi bandi mu milongo ya bulwi mwanda wa kwisambakana na bene Shidea, nabo balwa nandi.+
18 Ino bene Shidea banyema ku meso a Isalela; kadi Davida waipaya bantu 7 000 bakandanga pa makalo, ne basola ba lwa nshi bene Shidea 40 000, waipaya ne Shofake mukata wa kibumbo kya divita.
19 Bengidi ba Hadadezele pa kumona’mba abanekenibwa na Isalela,+ baenda bukidi kukapwana na Davida, baikala bantu bandi;+ Shidea kakidipo usaka kukwasha monka bene Amone.
Kunshi kwa Dyani
^ Talenta imo i makilo 34,2. Tala Mbwejo B14.
^ Kishima pa kishima i, “Alami-Nahalaimi.”
^ Kishima pa kishima i, “mu dikasa.”
^ Ko kunena’mba, “Ufalete.”
