Bilongwa bya Mafuku Umbajinji 22:1-19
22 Penepo Davida wanena’mba: “Ino’i yo njibo ya Yehova Leza wa bine, kadi kino’ki kyo kisōkelo kya kyamulambu kisōkwe pa mwanda wa Isalela.”+
2 Kupwa Davida wasoñanya bakongakanye beni ba kibundi+ badi mu ntanda ya Isalela, kadi webatūla ke ba kusōnga mabwe mwanda wa kulala ne kusōnga mabwe a kūbaka nao njibo ya Leza wa bine.+
3 Kadi Davida wateakanya byuma bivule mpata bya misumadi ya milango ya ku bibelo ne bya bikomo, ne mikuba mivule yadi mikomo’nka ne kupima bulēmi,+
4 ne mityi ya sedele+ ya ntanda ne miseke, mwanda bene Shidona+ ne bene Tyila+ baletēle Davida mityi ya sedele mivule mpata.
5 Ebiya Davida wanena’mba: “Solomone wami mwana ukidi nkasampe kadi wampikwa bwino,*+ ino njibo yūbakilwa Yehova ifwaninwe kwikala ya nkuo kutabuka+ amba ntumbo ne buya+ bwayo biyukane mu matanda onso.+ O mwanda nsa kumuteakenya bintu.” Enka nenki Davida wateakanya bintu bivule mpata paadi kafwile.
6 Ne kadi waityija wandi mwana Solomone kamulombola ōbakile Yehova Leza wa Isalela njibo.
7 Davida wasapwila wandi mwana Solomone amba: “Amiwa, mutyima wami wadi usaka kūbaka njibo ya dijina dya Yehova Leza wami.+
8 Ino kinenwa kya Yehova kyaiya kondi amba, ‘Ubamwanga mashi mavule mpata, kadi ubalu mavita makatampe. Kusapo kūbaka njibo ya dijina dyami,+ mwanda ubamwanga mashi mavule mpata pa ntanda ku meso ami.
9 Tala! Ukabutula mwana+ ukekala muntu wa ndoe,* kadi nkamupa kukōkolokwa ku balwana nandi bonso bamujokolokele,+ uketwa bu Solomone*+ kadi nkapa Isalela ndoe ne kwibekadija talala mu mafuku andi.+
10 Aye ye ukōbaka njibo ya dijina dyami.+ Ukekala wami mwana nami nkekala shandi.+ Nkakomeja pototo lupona lwa bulopwe bwandi pa Isalela nyeke.’+
11 “Shi ke pano, a wami mwana, Yehova ekale nobe, kadi nekenya ne kūbaka njibo ya Yehova Leza obe monka mwaanenene’kyo pa mwanda obe.+
12 Yehova akupe’tu budyumuku ne ñeni+ pakupa lupusa pa Isalela, amba ulame bijila bya Yehova Leza obe.+
13 Nabya ukanekenya shi ulame senene mbila+ ne butyibi bobasoñenye Mosesa kudi Yehova amba ape’bo Isalela.+ Kankamana kadi wikomeje. Kokikwatwa moyo nansha kutuyuka kwine.+
14 Tala nasusukile bininge pa kuteakenya njibo ya Yehova talenta* 100 000 ya olo, ne talenta 1 000 000 ya ndalama ne mukuba ne byuma+ bivule mpata bikomo’nka ne kupima bulēmi, kadi ne muteakanye mityi ne mabwe,+ ino usa kubweja’ko.
15 Udi na bengidi bavule—basōnga mabwe, bōbaki ba mabwe,+ basendwe ba mityi, ne bengidi ba bwino ba miswelo ne miswelo.+
16 Olo, ndalama, mukuba, ne byuma i bikomo’nka ne kupima.+ Imana, ushilule kwingila, kadi Yehova ekale nobe.”+
17 Ebiya Davida wasoñanya bamfumu bonso ba Isalela bakwashe’ko wandi mwana Solomone, amba:
18 “Mwene Yehova Leza wenu udi nenu kadi mwene wemupe kukōkolokwa ku mitamba yonso? Wapēne bekadi ba ino ntanda mu makasa ami, kadi ntanda ibanekenibwa ku meso a Yehova ne ku meso a bantu bandi.
19 Shi ke pano, sumininwai na mutyima ne muya* wenu onso kukimba Yehova Leza wenu,+ kadi shilulai kūbaka kipandulwe kya Yehova Leza wa bine,+ mwa kutwadila sanduku wa kipwano kya Yehova ne bipungwa bijila bya Leza wa bine+ ku njibo yūbakīlwe dijina dya Yehova.”+
Kunshi kwa Dyani
^ Nansha’mba “wampikwa bukomo.”
^ Kishima pa kishima i, “kukōkolokwa.”
^ Kitamba ku kishima kya Kihebelu kishintulula’mba “Ndoe.”
^ Talenta imo i makilo 34,2. Tala Mbwejo B14.
^ Tala Nshintulwilo ya Bishima.
