Bilongwa bya Mafuku Umbajinji 29:1-30
29 Penepo Mulopwe Davida wanena kipwilo kyonso amba: “Wami mwana Solomone, mwine watongwa na Leza,+ ukidi nkasampe kadi wampikwa bwino,*+ ino mwingilo i mukatampe, mwanda ke tempelopo* ya muntu ino i ya Yehova Leza.+
2 Ne mulonge bukomo bwami bonso bwa kuteakanya bintu bya njibo ya Leza wami, naleta olo ya mwingilo wa olo, ndalama ya mwingilo wa ndalama, mukuba wa mwingilo wa mukuba, byuma bya mwingilo wa byuma,+ mityi+ ya mwingilo wa mityi, mabwe a onikise, ne mabwe a kulamika na bitoto, mabwe a minono a kuneñenya nao, mabwe malēme a miswelo yonso, ne mabwe a alubatele mavule bininge.
3 Ne kadi, byondoelelwe njibo ya Leza wami,+ kudi ne byabulēme bya ami mwine+ bya olo ne ndalama byompāna ku njibo ya Leza wami, kutentekela pa byonso byonateakeninye njibo ijila,
4 kubadila’mo ne talenta* 3 000 ya olo ya ku Ofila+ ne talenta 7 000 ya ndalama mikundulwe, ya kushinwina ku mumbu ya mobo,
5 olo ya mwingilo wa olo ne ndalama ya mwingilo wa ndalama, ne ya mingilo yonso ya kwingilwa na basendwe. Shi ke pano, le i ani usa kwipāna aye mwine āye dyalelo’di na kyabuntu mu dikasa kya kupa Yehova?”+
6 Ebiya bamfumu ba mobo a bashabo, bamfumu ba bisaka bya Isalela, bakata ba tununu ne ba tutwa,+ ne bakata ba mingilo ya mulopwe+ beila abo bene na mutyima tō.
7 Bapāna ku mingilo ya njibo ya Leza wa bine: talenta 5 000 ya olo, ndadiki* 10 000, talenta 10 000 ya ndalama, talenta 18 000 ya mukuba, ne talenta 100 000 ya byuma.
8 Ense wadi na mabwe malēme waletele’o ku kibīko kya byabulēme kya njibo ya Yehova, kyadi kitalwa na Yehiele+ mwine Ngelashona.+
9 Bantu basangele pa kulambula bino byamulambu bya kwilanga, mwanda balambwile byamulambu bya kwilanga kudi Yehova na mutyima onso mutuntulu,+ Mulopwe Davida nandi wasangele bininge.
10 Kupwa Davida watendela Yehova ku meso a kipwilo kyonso. Davida wanena’mba: “A Yehova Leza wa Isalela tata wetu, utendelwe nyeke ne nyekeke.*
11 A Yehova, bukatampe+ ne bukomokomo+ ne bulumbuluke ne buya bwa dyangi ne bukatakata*+ i byobe, mwanda bintu byonso bidi mūlu ne pano panshi i byobe.+ Bulopwe i bobe, abe Yehova.+ Abe Ye wizunzulanga bu mutwe pa bonso.
12 Bupeta ne ntumbo bitambanga kodi,+ kadi uludikanga bintu byonso,+ mu kuboko kobe mudi bukomo+ ne bukomokomo,+ kadi mu kuboko kobe mubwanya kubaija+ ne kupāna bukomo ku bonso.+
13 Shi ke pano, a Leza wetu, tubakufwija’ko ne kutendela dijina dyobe dilumbuluke.
14 “Ino, le ami nami ne ani ne bantu bami nabo i bāni amba tubwanye kulambula byamulambu bya kwilanga pamo bwa bino? Mwanda bintu byonso bitambanga kodi, kadi tubakupe byobya bitamba ku kuboko kobe.
15 Mwanda twi beni ba kibundi ku meso obe ne beni bavilukile, pamo’nka bwa bakulutuba betu+ bonso. Mwanda mafuku etu pano panshi adi pamo bwa munjiñininya+—pampikwa lukulupilo.
16 A Yehova Leza wetu, buno bupeta bonso botwateakanya mwanda wa kukūbakila njibo ya dijina dyobe dijila i butambe ku kuboko kobe, kadi bonso i bobe.
17 Ndyukile biyampe, abe Leza wami, amba ubandaulanga mutyima+ ne amba usangelanga bululame.*+ Mu boloke* bwa mutyima wami, napāna bino bintu byonso na mutyima tō, kadi nasepelela bininge pa kumona bantu bobe badi pano bakulambula byamulambu bya kwilanga.
18 A Yehova, Leza wa Abalahama, wa Izake, ne wa Isalela, bakulutuba betu, lama nyeke ino mifwatakanyo ne milangwe mu mityima ya bantu bobe, kadi ludikila mityima yabo kodi.+
19 Kadi pá wami mwana Solomone mutyima onso mutuntulu,*+ amba alame mbila yobe,+ ne bivulujo byobe, ne misoñanya yobe ne kulonga bino bintu byonso ne kūbaka tempelo* yonateakenya bintu.”+
20 Kupwa Davida wanena kipwilo kyonso amba: “Pano tendelai Yehova Leza wenu.” Ebiya kipwilo kyonso kyatendela Yehova Leza wa bakulutuba babo, kyafukata panshi ne kwivukwila kudi Yehova ne kudi mulopwe.
21 Badi balambula’nka kulambula Yehova bitapwa ne kulambula Yehova byamulambu bisōkwe+ mu difuku dilonda’ko, byana bya bañombe bilume 1 000, mikōko milume 1 000, twana twa mikōko tulume 1 000, ne byamulambu byabo bya bitomibwa;+ balambula bitapwa bingi mpata pa mwanda wa Isalela ense.+
22 Badi badya’nka kudya ne kutoma ku meso a Yehova mu dine difuku’dya na nsangaji mikatampe,+ ne kubikika babikika Solomone mwanā Davida musunsa wa bubidi, bamushinga māni ku meso a Yehova ke mutangidiji,+ ne Zadoki nandi ke kitobo.+
23 Penepo Solomone washikata pa lupona lwa Yehova+ bu mulopwe pa kyaba kya shandi Davida, wanekenya, kadi bene Isalela bonso badi bamukōkele.
24 Bamfumu bonso,+ ba bulwi bonso bakomokomo,+ ne bana bonso ba Mulopwe Davida+ bakōkelele mulopwe Solomone.
25 Kadi Yehova walengeje Solomone ekale muntu mukatampe kutabuka ku meso a Isalela ense, wamupa ne bukatakata bwa bulopwe kebwaikele na mulopwe nansha umo wa Isalela dibajinji.+
26 Enka nenki Davida mwanā Yese wabikala pa Isalela ense,
27 kadi wabikele pa Isalela mu bula* bwa myaka 40. Mu Hebelona wabikele’mo myaka 7,+ mu Yelusalema namo myaka 33.+
28 Penepo wafwa mununu senene,+ mubwanwe būmi bulampe,* ne bupeta, ne ntumbo; ebiya wandi mwana Solomone wabikala pa kyandi kyaba.+
29 Ino mānga ya Mulopwe Davida, tamba ku ngalwilo kutūla ne ku mfulo, i milembwe mu binenwa bya Samwele mumoni, Natana+ mupolofeto, ne Ngade+ mumoni wa bimonwa,
30 pamo ne bulopwe bwandi bonso, bukomokomo bwandi, ne myanda ya bitatyi imutala aye ne Isalela ne malopwe onso adi koku ne koku.
Kunshi kwa Dyani
^ Nansha’mba “wampikwa bukomo.”
^ Nansha’mba “ke kibundipo kya nsakwa; ke njibopo mikatakata.”
^ Talenta imo i makilo 34,2. Tala Mbwejo B14.
^ Ndadiki kyadi kityele kya olo kya bene Peleshia. Tala Mbwejo B14.
^ Nansha’mba “tamba nyeke kutūla ku nyeke.”
^ Nansha’mba “bulēme.”
^ Nansha’mba “kubulwa budimbidimbi; boloke swā.”
^ Nansha’mba “bubinebine.”
^ Nansha’mba “mwipāne ao onso.”
^ Nansha’mba “kibundi kya nsakwa; njibo mikatakata.”
^ Kishima pa kishima i, “mafuku.”
^ Kishima pa kishima i, “mafuku.”
