Samwele Umbajinji 10:1-27
10 Ebiya Samwele wasela katyibi ka māni wapungulwila’o pa mutwe wa Solo.+ Wamufifya kamunena’mba: “Mwene Yehova wakushinga māni bu mutangidiji+ wa bupyani bwandi?+
2 Potusa kwishiya nobe dyalelo, usa kutana bana-balume babidi kubwipi na kibundu kya Letyela+ mu ntanda ya Benjemani ku Zeleza, kadi basa kukulombola’mba, ‘Bampunda bowakakimbile ke bamweke, ino pano shobe wailwa myanda ya bampunda+ kakulanga’ko abe. Unenanga’mba: “Le nonge namani pa mwanda wa wami mwana?”’
3 Tamba kwine’kwa enda enka ne byofika ku mutyi mukatampe wa Tabola, usa kutana’ko bana-balume basatu bakanda ku Betele+ kudi Leza wa bine, umo uselele bambuji bana basatu, mukwabo uselele mikate isatu, ungi nandi uselele mutyibi mukatampe wa vinyu.
4 Basa kukwipangula mobukile ne kukupa mikate ibidi, nobe ufwaninwe kutambula mikate yobakupa.
5 Kupwa usa kufika ku mukuna wa Leza wa bine, kwine kudi kibumbo kya basola ba bene Fidishitia. Shi ubafika mu kibundi, ukatana kibumbo kya bapolofeto batūka pa mutenta, basa komba kumeso kwabo kyombanwa kya myonji ne ñoma ne lushiba ne lunsense abo papo banena bupolofeto.
6 Mushipiditu wa Yehova usa kukupa bukomo,+ nobe usa kunena bupolofeto pamo nabo ne kwalamunwa kodi muntu ungi.+
7 Shi bino biyukeno bibalongeka, longa byonso bikokeja kulonga dikasa dyobe, mwanda Leza wa bine udi nobe.
8 Kupwa mbadikidile kutūkila ku Ngilengale,+ nami nsa kutūkila komudi’ko mwanda wa kulambula bitapwa bisōkwe ne bitapwa bya kipwano. Ufwaninwe kukungila mafuku asamba-abidi enka ne byomfika kodi. Penepa nsa kukulombola byofwaninwe kulonga.”
9 Solo pa kuvundamina Samwele kaenda, Leza washilula kushinta mutyima wandi waikala pamo na wa muntu ungi, ne bino biyukeno byonso byafikidila mu dyodya difuku.
10 Penepa bataluka kwine’kwa kebenda ku mukuna, ebiya kibumbo kya bapolofeto kyamusambakana. Ponkapo mushipiditu wa Leza wamupa bukomo,+ washilula kunena bupolofeto+ mu bukata mwabo.
11 Bantu bonso badi bamuyukile dibajinji pa kumumona unena bupolofeto pamo na bapolofeto, kebanena abo bene na bene amba: “Le i bika byafikila mwanā Kishi? Lelo Solo nandi ubadilwa mu bapolofeto?”
12 Kupwa muntu umo wa kwine’kwa wanena’mba: “Ino shabo i ani?” Penepo kyaikala ke kisela* kyobelanga’mba: “Lelo Solo nandi ubadilwa mu bapolofeto?”+
13 Aye pa kupwa kunena bupolofeto, waiya pa mutenta.
14 Kupwa mwanabo na shandya Solo wamunena aye ne umpika wandi amba: “Le mwaendele kwepi?” Nandi watentulula’mba: “Twakakimbile bampunda,+ ino twamwene amba kebadi’kopo, ebiya twaenda kwa Samwele.”
15 Mwanabo na shandya Solo wamwipangula’mba: “Nakwisāshila nsapwile, lelo Samwele wakulombwele bika?”
16 Solo watentulula mwanabo na shandi amba: “Wetulombwele amba bampunda ke bebamone kala.” Ino Solo kamulombwelepo myanda ya bulopwe yanenene Samwele.
17 Kupwa Samwele waityija bantu ku Mizipa kudi Yehova+
18 kadi wanena bene Isalela amba: “Yehova Leza wa Isalela wanena namino amba: ‘Ami ye watambije Isalela mu Edipito ne kwimukūla mu makasa a Edipito+ ne mu makasa a malopwe onso adi emumwesha malwa.
19 Ino banwe dyalelo mubapele Leza wenu+ wadi Umpandiji wenu wemutambije mu bibi ne mu tusua twenu tonso, kemunena’mba: “Kutupu, ufwaninwe kwitutongela mulopwe wa kwitubikala.” Pano imanai ku meso a Yehova mungya bisaka byenu ne mungya tununu twenu.’”*
20 Ebiya Samwele wanena bisaka byonso bya Isalela bifwene,+ penepa kisaka kya Benjemani kyatongwa.+
21 Kupwa wanena kisaka kya Benjemani kifwene mungya mafu akyo, penepa difu dya Matedi dyatongwa. Mfulo mfulō Solo mwanā Kishi watongwa.+ Ino pobaendele kukamukimba, kebamutenepo kuntu nansha kumo.
22 Penepo baipangula Yehova amba:+ “Le uno muntu i mwiye kuno?” Yehova nandi walondolola’mba: “Yewa ufyeme kokwa mu bivwe.”
23 Ponkapo baenda’ko lubilo bamusela. Aye pa kwimana mu bukata mwa bantu, wadi mulampe kupita bantu bakwabo bonso, mwibasubwile tamba pa bipuji kutūla ne ku mutwe.+
24 Samwele wanena bantu bonso amba: “Le mubamone uno muntu watongwa na Yehova,+ mwene kekudipo nansha umo udi bwa aye mu bantu bonso? Ponkapo bantu bonso bashilula kutūta kyungwe amba: “Mulopwe ufwa bununu!”
25 Samwele wasapwila bantu byobya bifwaninwe kupebwa balopwe,+ walemba’byo mu mukanda weutūla ku meso a Yehova. Kupwa Samwele wanena bantu bonso bende, muntu ne muntu ku yandi njibo.
26 Solo nandi waenda kwandi mu Ngibea pamo ne ba bulwi batengelwe mityima na Yehova.
27 Ino bana-balume bamo ba bitupu banena’mba: “Le uno nandi usa kwitupandija namani?”+ Penepo bamufutulula, kadi kebamuselēlepo kyabuntu nansha kimo.+ Ino aye kanenene’popo kintu nansha kimo.*
Kunshi kwa Dyani
^ Nansha’mba “lukindi.”
^ Nansha’mba “bisaka.”
^ Kishima pa kishima i, “Kadi aye wadi pamo bwa kamāma.”
