Samwele Umbajinji 11:1-15
11 Kupwa Nahashi mwine Amone+ wakanda, watūdila Yabeshe+ nkambi mu Ngileade. Penepo bana-balume bonso ba Yabeshe banena Nahashi amba: “Samba netu kipwano* netu tukakwingidila.”
2 Ino Nahashi mwine Amone webanena’mba: “Nsa kusamba nenu kino kipwano enka shi mubalonga kino kintu: Mubongotolwe meso enu onso a ku lundyo. Nsa kulonga namino mwanda wa kufwija Isalela ense bumvu.”
3 Bakulumpe ba Yabeshe bamutentulula’mba: “Witupe’ko kitatyi kya mafuku asamba-abidi mwanda wa tutume mikendi mu ntanda yonso ya Isalela. Shi i kutupu nansha umo wa kwitupandija, penepa ketwitūla kodi.”
4 Mwenda mafuku mikendi yaiya ku Ngibea+ wa Solo besamba bino binenwa mu matwi a bantu, penepa bantu bonso badila na diwi dikatampe bya mwiko.
5 Ino Solo wadi utamba ku madimi ulonda luombe kunyuma, penepa Solo waipangula’mba: “I bika byafikila bantu? I kika kyobadidila?” Ebiya bamulombola binenwa bya bana-balume ba Yabeshe.
6 Solo pa kwivwana bino binenwa, mushipiditu wa Leza wamupa bukomo,+ nandi waaka bulobo.
7 Ebiya wayata bañombe balume babidi webasaya bipindibipindi, watuma bipindi’bya mu ntanda yonso ya Isalela ku makasa a mikendi, nayo yadi inena’mba: “Ense kalondapo Solo ne Samwele atengele’tu amba bañombe bandi bakalongwa enka namino!” Penepo kityino kya kwa Yehova kyaponena bantu, nabo batamba bonso bekute umbumo.*
8 Kupwa webabala mu Bezeke, kwadi bene Isalela 300 000 ne bana-balume ba Yuda 30 000.
9 Nabo banena mikendi yaile’ya amba: “Kasapwilei bana-balume ba Yabeshe mu Ngileade namino amba, ‘Kesha dyuba pa kunana, musa kupandijibwa.’” Ponkapo mikendi yaiya yasapwila bana-balume ba Yabeshe, nabo basangala bya mwiko.
10 Ebiya bana-balume ba Yabeshe banena’mba: “Kesha tusa kwitūla kodi, nobe ubwanya kwitulonga byonso byomona bu biyampe.”+
11 Difuku dilonda’ko, Solo waabanya bantu mu bibumbo bisatu, nabo batwela mu bukata mwa nkambi ku kilo kya lubanga,* baipaya bene Amone+ kufika ne byananine dyuba. Boba bapandile bapalankana, enka ne byokekwashelepo bantu babidi pamo.
12 Kupwa bantu banena Samwele amba: “I bāni badi banena’mba: ‘Le Solo ye wa kwitubikadila bu mulopwe?’+ Leta bana-balume’bo, tusa kwibepaya.”
13 Ino Solo wanena’mba: “Kekudipo muntu nansha umo usa kwipaibwa mu dino difuku,+ mwanda dyalelo Yehova wakūla Isalela.”
14 Kupwa Samwele wanena bantu amba: “Iyai twende ku Ngilengale+ tukayukanye bulopwe+ dikwabo.”
15 Ebiya bantu bonso baenda ku Ngilengale, kadi mu Ngilengale’mwa babikika Solo ku meso a Yehova. Kupwa balambula konka bitapwa bya kipwano ku meso a Yehova,+ kadi Solo ne bana-balume bonso ba Isalela basoba masobo na nsangaji mikatampe.+
Kunshi kwa Dyani
^ Nansha’mba “kwiivwanika.”
^ Kishima pa kishima i, “pamo bwa muntu umo.”
^ Ko kunena’mba, kubwipi na nsá 2 ya lubanga kutūla ku nsá 6 ya lubanga.
