Samwele Umbajinji 12:1-25
12 Ku mfulo Samwele wanena Isalela yense amba: “Nalonga* byonso byomwaunombele, kadi nabikika mulopwe wa kwimubikala.+
2 Pano mulopwe wa kwimuludika* au keye!+ Ino ami, nanunupa kendi na mvwi ku mutwe, kadi bami bana badi nenu pano,+ ami nemuludikile tamba busongwalume bwami kufika ne dyalelo.+
3 Ami uno. Ntūdilei bukamoni ku meso a Yehova ne ku meso a mushingwe māni wandi:+ Le i ñombe wa ani nansha mpunda wa ani onaselele?+ Nansha i ani onadimbile nansha onatyininye mbavu? I ku kuboko kwa ani konaitabije kutyibwa milomo* amba ntale kungi?+ Shi nalongele namino, nsa kwimujokejeja’byo.”+
4 Penepo nabo bamutentulula’mba: “Kwitudimbilepo nansha kwitutyinya mbavu nansha kwitabija kintu nansha kimo ku kuboko kwa muntu.”
5 Ebiya webanena’mba: “Yehova i kamoni wa kwimuponeja, ne mushingwe māni wandi nandi i kamoni dyalelo’di amba kemutenepo kantu nansha kamo ka kuntopekela’po.”* Nabo banena’mba: “I kamoni.”
6 Penepo Samwele wanena bantu amba: “Yehova, mwine wāingidije Mosesa ne Alone kadi wātambije bakulutuba benu mu ntanda ya Edipito,+ i kamoni.
7 Shi ke pano imanai nkū, nsa kwimutyibila mambo ku meso a Yehova mungya bilongwa byonso byoloke byemulongēle Yehova banwe ne bakulutuba benu.
8 “Pātwelele’tu Yakoba mu Edipito+ ne pāshilwile bakulutuba benu kwabija Yehova,+ Yehova wātumine ba Mosesa+ ne Alone batambije bakulutuba benu mu Edipito ne kwibashikatyija mu kino kifuko.+
9 Ino baidilwe Yehova Leza wabo, nandi webapoteja+ mu makasa a Shisela+ mukata wa kibumbo kya basola ba Hazola ne mu makasa a bene Fidishitia+ ne mu makasa a mulopwe wa Moabu,+ kadi balwile nabo.
10 Ino baabije Yehova+ amba, ‘Tubapi mambo,+ mwanda tubaleka Yehova ketwingidila’ko Babāla+ ne bankishi ba Ashetolete;+ shi ke pano witukūle ku kuboko kwa balwana netu amba tukwingidile.’
11 Kupwa Yehova watuma Yelubale+ ne Bedane ne Yefeta+ ne Samwele,+ wemukūla mu makasa a balwana nenu bonso bemujokolokele, amba mwikale ku matwi talala.+
12 Pomwamwene amba Nahashi,+ mulopwe wa bene Amone waiya kwimutamba bulwi, mwadi munena’nka kunena ami amba, ‘Kutupu, twi basumininwe kwikala na mulopwe wa kwitubikala!’+ nansha Yehova Leza wenu byadi Mulopwe wenu.+
13 Shi ke pano mulopwe omwatonga au keye, mwine omwalombele. Talai! Yehova wabikika mulopwe pomudi.+
14 Shi mutyine Yehova,+ mumwingidile+ ne kukōkela diwi dyandi,+ shi muleke kutombokela musoñanya wa Yehova, kadi banwe ne mulopwe wa kwimubikala mulonde Yehova Leza wenu, i biyampe.
15 Ino shi muleke kukōkela diwi dya Yehova kadi mutombokele musoñanya wa Yehova, kuboko kwa Yehova kukemulwa banwe ne bashenu.+
16 Shi ke pano imanai nkū, mumone kintu kikatampe kisa kulonga Yehova ku meso enu.
17 Mwene dyalelo i mwangulo wa ñano? Nsa kwita Yehova alete mikungulo ne mvula; penepa musa kuyuka ne kwivwanija kibi kyomulongele ku meso a Yehova pa kulomba komwalomba banwe bene mulopwe.”+
18 Ponkapo Samwele waita Yehova, Yehova nandi waleta mikungulo ne mvula mu dine difuku’dya, penepo bantu bonso batyina Yehova ne Samwele bininge.
19 Ebiya bantu bonso banena Samwele amba: “Lombela kudi Yehova Leza obe pangala pa bengidi bobe,+ ke-pantu ketusakilepo kufwa, mwanda tubabweja kibi kikwabo ku bubi bwetu bonso pa kulomba mulopwe.”
20 Penepo Samwele wanena bantu amba: “Kemukikwatwai moyo. Na bubine mwi balonge bino bibi byonso. Inoko banwe kemukisāsukai’tu pomulonda Yehova,+ ino ingidilai Yehova na mutyima wenu onso.+
21 Kemukisāsukai kemulonda bintu bya bitupu*+ byampikwa kamweno+ kadi kebibwanyapo kukūla, mwanda i bya bitupu.*
22 Yehova kakalekapo bantu bandi+ pa mwanda wa dijina dyandi dikatampe,+ mwanda Yehova wakwete aye mwine mulangwe wa kwimwalamuna kemudi bantu bandi.+
23 Ino ami, kebibwanikapo ami kulonga bubi ku meso a Yehova na kuleka kwimulombelela, nkendelela kwimufundija dishinda diyampe kadi dyoloke.
24 Ino banwe tyinai’tu Yehova,+ mwingidilei na kikōkeji* na mutyima wenu onso, mwanda vulukai bintu bikatampe byaemulongēle.+
25 Ino shi mulonge bibi ku nshikani, musa kukuba+ banwe ne mulopwe wenu mwine kumo.+
Kunshi kwa Dyani
^ Kishima pa kishima i, “Nateje diwi dyenu pa mwanda wa.”
^ Kishima pa kishima i, “kunanga kumeso.”
^ Nansha’mba “lupeto lwa kasusu.”
^ Kishima pa kishima i, “kemutenepo kintu nansha kimo mu kuboko kwami.”
^ Nansha’mba “bintu bya bubela.”
^ Nansha’mba “bintu bya bubela.”
^ Nansha’mba “mu bubine.”