Samwele Umbajinji 13:1-23
13 Solo wadi na myaka . . .* paabikele,+ kadi wabikele myaka ibidi pa Isalela.
2 Solo watonga bana-balume 3 000 mu Isalela; 2 000 badi pamo na Solo mu Mikemashe ne mu ntanda ya ngulu ya Betele, ino 1 000 badi pamo na Yonafane+ mu Ngibea+ wa Benjemani. Wajokeja bantu bashele’ko, muntu ne muntu ku pema wandi.
3 Kupwa Yonafane waipaya kibumbo kya basola kya bene Fidishitia+ mu Ngeba,+ penepa bene Fidishitia nabo baivwana’o. Ebiya Solo waidija lusengo mu ntanda yonso,+ kanena’mba: “Bahebelu bevwane!”
4 Isalela yense waivwana myanda’ya amba: “Solo waipaya kibumbo kya basola kya bene Fidishitia, pano Isalela waikala ke kintu kinunka bibi mu bene Fidishitia.” Penepo baityija bantu balonde Solo ku Ngilengale.+
5 Bene Fidishitia nabo bebunga pamo mwanda wa kulwa na Isalela, pamo ne makalo 30 000 a bulwi, ne bantu 6 000 bakandanga pa tubalwe ne bibumbo bya basola bingi bininge pamo bwa musenga wa ku mukunko wa dijiba;+ penepa bakanda batūla nkambi mu Mikemashe kutunduka kwa Bete-Avena.+
6 Penepo bana-balume ba Isalela bamona amba badi mu makambakano, mwanda badi batyinibwe bininge; ponkapo bantu bafyama mu mitá,+ mu bipunzu, mu bimabwe, mu bīna,* ne mu byumbu.
7 Bahebelu bamo baabuka’nka ne Yodano baenda ku ntanda ya Ngade ne ya Ngileade.+ Ino Solo aye wadi’nka mu Ngilengale, kadi bantu bonso badi bamulonda badi bazakala.
8 Wakungila’nka kukungila mafuku asamba-abidi kufika ne pa kitatyi kitungwe kyalaile Samwele, ino Samwele kwiya ku Ngilengale mpika, penepo bantu bamupalakana.
9 Mfulo mfulō Solo wanena’mba: “Ndetelei kitapwa kisōkwe ne bitapwa bya kipwano.” Penepo walambula kitapwa kisōkwe’kya.+
10 Ino aye upwa’tu kulambula kitapwa kisōkwe, Samwele nandi ufika. Ebiya Solo waenda kukamusambakana wamwesela.
11 Kupwa Samwele wanena’mba: “Le i bika byowalonga?” Solo walondolola’mba: “Namonanga’mba bantu badi kebampalakana,+ abe nobe kwiilepo mu kitatyi kitungwe, bene Fidishitia nabo badi bekongela pamo ku Mikemashe.+
12 O mwanda nanenanga’mba, ‘Pano bene Fidishitia basa kutūka kulwa nami ku Ngilengale, ino nadi nkyakimbile kutōkelwa mutyima* na Yehova.’ Penepa nami namone amba mfwaninwe’tu kulambula kitapwa kisōkwe.”
13 Ponkapo Samwele wanena Solo amba: “Ubalonga bya bulembakane. Kukōkelepo mbila yakupele Yehova Leza obe.+ Shi weikōkele, Yehova wadi wa kukomeja nyeke bulopwe bobe pa Isalela.
14 Ino pano bulopwe bobe kebukejepo.+ Yehova usa kutana muntu wa mwendele mutyima wandi,+ kadi Yehova ukamutūla bu mutangidiji wa bantu bandi,+ mwanda kwakōkelepo bine byakusoñenye Yehova.”+
15 Kupwa Samwele wataluka ku Ngilengale waenda ku Ngibea wa Benjemani, ino Solo wabala bantu; boba badi bakishele nandi badi kintu kya bana-balume 600.+
16 Solo, ne wandi mwana Yonafane, ne bantu badi bakidi nabo, badi bashikete mu Ngeba+ wa Benjemani, ino bene Fidishitia badi batūdile nkambi ku Mikemashe.+
17 Kadi basola bañonaona badi batamba mu nkambi ya bene Fidishitia mu bibumbo bisatu. Kibumbo kimo kyadi kyenda mu dishinda dyenda ku Ofela, ku ntanda ya Shuale;
18 kibumbo kikwabo nakyo kyadi kyenda mu dishinda dya ku Bete-Holone;+ kibumbo kya busatu nakyo kyadi kyenda mu dishinda dyenda ku mukalo witadidile na musanza wa Zeboimi, dya mu ntanda mutuputupu.
19 Ino mu ntanda yonso ya Isalela kemwadipo mutanwa sendwe ufula byuma, mwanda bene Fidishitia banenene amba: “Kutyina’mba Bahebelu bakapunga kipete nansha mukobe.”
20 Bene Isalela bonso badi batūkila kudi bene Fidishitia mwanda wa kunoneja nkasu, mampiki, tusolwa, nansha bikwakwa.
21 Lupoto lwa kunoneja nalo lwadi i pimi* umo ku nkasu, ku mampiki, ku bingidilwa bya misomo isatu, ku tusolwa, ne pa kukwika kamusungu ka bakumbi.
22 Mu difuku dya divita, kekwadipo muntu nansha umo ku bantu badi na Solo ne Yonafane watenwe na kipete nansha mukobe mu kuboko kwandi; poso enka Solo ne wandi mwana Yonafane+ bo badi na byabulwi.
23 Penepa kibumbo kya basola* kya bene Fidishitia kyatamba kyaenda dya ku kashinda ka kinkolankola ka Mikemashe.+
Kunshi kwa Dyani
^ Kibalwa kekidipo mu bilembwa bya Kihebelu.
^ Nansha’mba “mitá.”
^ Nansha’mba “nkyanekenye mpala.”
^ Kipimo kya pa kala, kisenselela ku bipindi bibidi bya pa bipindi bisatu bya shekele.
^ Nansha’mba “basola ba kumeso.”
