Samwele Umbajinji 14:1-52
14 Difuku dimo Yonafane+ mwanā Solo wanena mwingidi wandi wadi umuselele byabulwi amba: “Iya twabukile bobwa bukila kudi basola ba kumeso ba bene Fidishitia.” Ino kalombwelepo shandi.
2 Solo wadi ushikata kufula kwa Ngibea+ munshi mwa mutyi wa mangelenade mu Mikelone, kadi kwadi kintu kya bana-balume 600 pamo nandi.+
3 (Kadi Ahiya mwanā Ahitube,+ mwanabo na Ikabode,+ mwanā Finease,+ mwanā Edi,+ kitobo wa Yehova mu Shilo,+ wadi uselele efoda.)+ Inoko bantu kebadipo bayukile amba Yonafane i mwende.
4 Ino pa bukata bwa tushinda twadi tutompa Yonafane kutyibuluka mwa kufikila kudi basola ba kumeso ba bene Fidishitia, padi kidibwe kidi bwa dino ku mutamba umo ne kidibwe kidi bwa dino ku mutamba mukwabo; dijina dya kidibwe kimo i Bozeze, ne dijina dya kikwabo i Sene.
5 Kidibwe kimo kyadi pamo bwa kikomo kungala kampalampala na Mikemashe, kikwabo nakyo kyadi kunshi kampalampala na Ngeba.+
6 Ebiya Yonafane wanena kyabuta wandi amba: “Iya twabukile kudi basola ba kumeso ba bano bana-balume bampikwa kutwela kwisao.+ Padi Yehova usa kwitukwasha, mwanda i kutupu kintu kibwanya kukankaja Yehova kupandija na bantu bavule nansha na batyetye.”+
7 Penepo kyabuta wandi wamutentulula’mba: “Longa byonso bikutonona mutyima obe kulonga. Alamukila konso kosaka, nami nkakulonda konso kukutonwena mutyima obe.”
8 Kupwa Yonafane wanena’mba: “Tusa kwabukila kudi boba bana-balume twilombole kobadi.
9 Shi abetunena’mba, ‘Imanai nkū enka ne byotwiya komudi!” netu tusa kwimana’nka potudi’pa, ketusapo kukanda kobadi.
10 Ino shi abanena’mba, ‘Kandai mulwe netu!’ tusa kukanda mwanda Yehova usa kwibapāna mu makasa etu. Kino kyo kisa kwikala kiyukeno kyetu.”+
11 Kupwa abo bonso babidi belombola kudi basola ba kumeso ba bene Fidishitia. Bene Fidishitia banena’mba: “Talai! Bahebelu abatambe mu bīna mobadi bafyeme.”+
12 Penepo basola ba kumeso banena Yonafane ne kyabuta wandi amba: “Kandai kuno kotudi, tusa kwimufundija!”+ Ponkapo Yonafane wanena kyabuta wandi amba: “Nonde, mwanda Yehova usa kwibapāna mu kuboko kwa Isalela.”+
13 Yonafane wadi wenda ukanda na makasa ne maulu, kadi kyabuta wandi wadi umulonda kunyuma; penepa bene Fidishitia bashilula kupona ku meso a Yonafane, ino kyabuta wandi wadi wibepaya kunyuma kwandi.
14 Mu bulwi bubajinji bwalwile ba Yonafane ne kyabuta wandi, baipaile kintu kya bana-balume 20 mu kyaba kisenselela ku kipindi kya kipēta kya budimi budimwa na bañombe babidi.*
15 Penepo luzakalo lwasambakana mu nkambi ya mu ntanda ne mu basola bonso ba kumeso, enka ne basola bañonaona+ bene baivwana luzakalo. Ntanda yashilula kutenkana, ne luzakalo lwa kwa Leza nalo lwetentekela’po.
16 Batulama ba Solo ba mu Ngibea+ wa Benjemani bamona’mba luzakalo lwadi lwenda lusambakana mitamba yonso.+
17 Solo wanena bantu baadi nabo amba: “Nemwisāshila, balai bidi bantu mumone i ani wataluka potudi.” Abo pa kubala, bamona’mba Yonafane ne kyabuta wandi kebadi’popo.
18 Ebiya Solo wanena Ahija+ amba: “Fwenyai Sanduku wa Leza wa bine!” (Mwanda Sanduku wa Leza wa bine wadi na bene Isalela mu kine kitatyi’kya.*)
19 Padi pesamba Solo na kitobo, lupotopoto lwa mu nkambi ya bene Fidishitia lwadi lwenda luvudila’ko bininge. Ponkapo Solo wanena kitobo amba: “Leka byolonga’byo.”*
20 Ebiya Solo ne bantu bonso badi nandi bekongakanya baenda mu divita, batana bene Fidishitia betape abo bene na bene bipete byabo, kadi kavutakanya kadi kakatampe bininge.
21 Ne kadi, Bahebelu belungile dibajinji ku mutamba wa bene Fidishitia ne boba bakandile pamo nabo mu nkambi badi bajokela kudi Isalela wadi wendejibwa na Solo ne Yonafane.
22 Bana-balume bonso ba Isalela bafyeme+ mu ntanda ya ngulu ya Efelaimi baivwana’mba bene Fidishitia abanyema, penepa nabo besoba nabo kebebalonda mu bulwi.
23 Penepa Yehova wapandija Isalela mu dine difuku’dya,+ bulwi bwaenda kufika ne ku Bete-Avena.+
24 Ino bana-balume ba Isalela batyinibwa bininge mu dine difuku’dya, mwanda Solo watyipije bantu uno mutyipo amba: “Afingwe mafingo yewa ukadya kyakudya* kyo-kyonso kyolwa kekyaolobele enka ne byonsa kulubwila balwana nami kinongo!” Enka nenki kekwadipo muntu wadile kyakudya kyo-kyonso.+
25 Kadi bantu* bonso batwela mu ditó, ne kadi kwadi būki pa nshi.
26 Bantu pa kutwela mu ditó, bamona būki busūma, ino kekwadipo muntu nansha umo watūdile kuboko kwandi ku kyakanwa, mwanda badi batyina mutyipo.
27 Ino Yonafane kaivwenepo patyipije shandi bantu mutyipo,+ o mwanda waolwele mukombo wadi mu kuboko kwandi watubika nsongo yao mu kisá kya būki. Aye pa kujokeja kuboko ku kyakanwa, meso andi keeñenya.
28 Ponkapo umo mu bantu’ba wanena’mba: “Shobe i mutyipije bantu mutyipo mukomo amba, ‘Afingwe mafingo yewa udya kyakudya dyalelo!’+ O mwanda bantu abakōka bininge.”
29 Ino Yonafane wanena’mba: “Tata waletela ntanda makambakano* makatampe mu ino ntanda. Tala mwaeñenyenya meso ami mwanda’tu wa tuno tubūki tutyetye tonatompa.
30 Mwene byadi bya kwikala biyampe shi bantu badīle+ dyalelo monso mobasakila bitūtwa bya balwana nabo byobatananga! Nabya bene Fidishitia badi ba kutapibwa bininge.”
31 Mu dine difuku’dya badi bepaya’nka kwipaya bene Fidishitia tamba ku Mikemashe kutūla ne ku Aiyalone,+ penepo bantu bakōka bininge.
32 Ebiya bantu bashilula kubotokela bitūtwa na makomwa-meso, kadi bayata mikōko ne bañombe ne bañombe bana bebatapila pa nshi, kupwa kebadi mwita na mashi.+
33 Kupwa basapwila Solo amba: “Tala! Bantu aba bapya Yehova mambo na kudya mwita ne mashi.”+ Nandi wanena’mba: “Mubalonga bintu pampikwa lwitabijo. Kunkulumwinai bukidi dibwe dikatampe kuno kondi.”
34 Kupwa Solo wanena’mba: “Pitai mu bantu mwibalombole amba, “Muntu ne muntu ufwaninwe kuleta ñombe mulume ne mukōko mwibatapile kuno kupwa kemudi. Kemwakapyai Yehova mambo na kudya mwita ne mashi.’”+ Penepa umo ne umo waleta ñombe wandi mulume bwine bufuku’bwa wamutapila konka’kwa.
35 Penepa Solo waubakila Yehova kisōkelo.+ Kino kyo kisōkelo kibajinji kyawaubakīle Yehova.
36 Kupwa Solo wanena’mba: “Tutūkei tukalonde bene Fidishitia bufuku, twibatūte kufika ne ku lubanga. Ketukashiyepo muntu nansha umo mūmi.” Nabo banena’mba: “Longa byonso byomona bu biyampe ku meso obe.” Penepo kitobo wanena’mba: “Tufwenei kudi Leza wa bine kuno.”+
37 Ebiya Solo waipangula Leza amba: “Le ntūke nkalonde bene Fidishitia?+ Le usa kwibapāna mu kuboko kwa Isalela?” Ino Leza kamulondolwelepo mu dine difuku’dya.
38 Penepo Solo wanena’mba: “Iyai kuno banwe bamfumu bonso ba bantu, kimbai i bubi’ka bwalongwa dyalelo.
39 Mwanda, bine ne Yehova byadi’ko mūmi, mwine wakūdile Isalela, nansha shi i wami mwana Yonafane ufwaninwe kufwa.” Ino i kutupu muntu wamulondolwele.
40 Kupwa wanena Isalela yense amba: “Banwe musa kwikala bukila bumo, ami ne wami mwana Yonafane bukila bukwabo.” Penepo bantu banena Solo amba: “Longa byonso byomona bu biyampe ku meso obe.”
41 Ebiya Solo wanena Yehova amba: “Abe Leza wa Isalela, londolola na Tumimi!”+ Kupwa Yonafane ne Solo batongwa, ino bantu batamba batōka.
42 Ponkapo Solo wanena’mba: “Tá bubale+ bwa kuyuka shi i ami nansha shi i wami mwana Yonafane.” Penepo Yonafane watongwa.
43 Kupwa Solo wanena Yonafane amba: “Nombole, le ubalonga bika?” Ebiya Yonafane wamulombola’mba: “Natompanga’tu tubūki tutyetye ku nsongo ya mukombo wadi mu kuboko kwami.+ Ami uno! Ngitabije kufwa!”
44 Penepo Solo wanena’mba: “Leza alonge enka nenki ne kubweja’ko shi kufwilepo, abe Yonafane.”+
45 Ino bantu banena Solo amba: “Le Yonafane—mwine waletela Isalela buno bushindañani*+ bukatampe, ufwaninwe kufwa? Kebibwanikapo! Bine ne Yehova byadi’ko mūmi, i kutupu lunywene nansha lumo lwa ku mutwe wandi lufwaninwe kuponena pa nshi, mwanda waloñanga bintu pamo na Leza dyalelo’di.”+ Enka nenki bantu bakūla* Yonafane, kakifwilepo.
46 Ponkapo Solo waleka kulonda bene Fidishitia, bene Fidishitia nabo baenda ku ntanda yabo.
47 Solo waningisha bulopwe pa Isalela ne kulwa na balwana nandi bonso ku mitamba yonso, walwa na bene Moabu,+ bene Amone,+ bene Edoma,+ balopwe ba Zoba,+ ne bene Fidishitia;+ konso kwaadi wenda wadi wibanekenya.
48 Kadi walwa na bukomo wanekenya bene Amaleke,+ wakūla Isalela mu makasa a bantu badi bebatūta.
49 Bana ba Solo bana-balume i Yonafane, Ishivi, ne Maleki-Shua.+ Kadi wadi na bana bana-bakaji babidi; dijina dya mukulu i Melabe,+ ne dijina dya nkasa i Mikale.+
50 Dijina dya mukaja Solo i Ahinoame mwanā Ahimaza. Dijina dya mukulu wa basola bandi i Abinele+ mwanā Nele, mwanabo na shandya Solo.
51 Kishi+ ye shandya Solo, Nele+ shandya Abinele nandi wadi mwanā Abiele.
52 Kwadi divita dikatampe mpata na bene Fidishitia mu mafuku onso a Solo.+ Shi Solo wamone mwana-mulume mukomo nansha mukankamane, wadi umutweja mu mwingilo wandi.+
Kunshi kwa Dyani
^ Kishima pa kishima i, “kipindi kya budimi,” ko kunena’mba, bula bwa ntanda ibwanya kudimwa na bañombe babidi mu difuku dimo.
^ Kishima pa kishima i, “mu dine difuku’dya.”
^ Kishima pa kishima i, “Koka kuboko.”
^ Kishima pa kishima i, “mukate.”
^ Kishima pa kishima i, “ntanda.”
^ Nansha’mba “waleta mushikwa.”
^ Nansha’mba “lupandilo.”
^ Kishima pa kishima i, “kunyongolola.”
