Samwele Umbajinji 16:1-23
16 Mwenda mafuku Yehova wanena Samwele amba: “I kufika ne kitatyi’ka kyokadila Solo+ ami muntu mumupele pano kubikala bu mulopwe wa Isalela?+ Yuja disengo dyobe māni wende.+ Nsa kukutuma kwa Yese+ mwine Betelema, mwanda netongela mulopwe mu bana bandi bana-balume.”+
2 Ino Samwele wanena’mba: “Le ñenda’tu namani? Shi Solo evwane’o, usa kungipaya.”+ Yehova wamutentulula’mba: “Sela ñombe mwana unene amba, ‘Naiya kulambula kitapwa kudi Yehova.’
3 Ityija Yese ku kitapwa; penepa nkakuyukija bya kulonga. Ufwaninwe kunshingila māni yewa onkakutelela.”+
4 Samwele walonga byamunenene Yehova. Aye pa kufika ku Betelema,+ bakulumpe ba kibundi bazakala pa kwitana nandi, kebanena’mba: “Le ubaiya mu ndoe?”
5 Nandi walondolola’mba: “Naiya mu ndoe. Naiya kulambula kitapwa kudi Yehova. Mwipandulei, mwiye nami ku kitapwa.” Kupwa wapandula Yese ne bandi bana, penepa webetyija ku kitapwa.
6 Abo pa kutwela wamona Ediabu,+ kanena’mba: “Na bubine uno wimene ku meso a Yehova ye mushingwe māni wandi.”
7 Ino Yehova wanena Samwele amba: “Kokata mutyima ku mumwekelo wandi ne ku bula bwandi,+ mwanda ami namupele. Ke-pantu muswelo umona muntu i mwishile na muswelo umona Leza, mwanda muntu bitupu umonanga byobya bimweka na meso, ino Yehova aye umonanga mu mutyima.”+
8 Kupwa Yese waita Abinadaba+ wamupityija ku meso a Samwele, penepo Samwele wanena’mba: “Yehova katongelepo ne uno mwine.”
9 Kadi Yese waleta Shamaha,+ ino aye amba: “Yehova katongelepo ne uno mwine.”
10 Ebiya Yese wapityija bana bandi bana-balume basamba-babidi ku meso a Samwele, ino Samwele wanena’mba: “Yehova katongelepo nansha umo pa bano’ba.”
11 Ku mfulo Samwele wanena Yese amba: “Le bano bo bobe bana bonso bana-balume?” Nandi walondolola’mba: “Nkasampe pa bonso+ ushele panja kufika ne pano; udishanga mikōko.”+ Kupwa Samwele wanena Yese amba: “Tuma’ko muntu, mwanda ketusapo kushikata kudya bidibwa poso’nka afike pano.”
12 Ebiya watuma’ko muntu wamuleta. Aye wadi na ngitu ityila, na meso malumbuluke, kadi muyampe mpala.+ Penepo Yehova wanena’mba: “Imana, mushinge māni, mwanda ye aye yao!”+
13 Ebiya Samwele wasela disengo dya māni wamushinga māni+ ku meso a banababo. Penepo mushipiditu wa Yehova waanza kupa Davida bukomo tamba dine difuku’dya.+ Kupwa Samwele wataluka waenda ku Lama.+
14 Pano mushipiditu wa Yehova wadi ke mutaluke Solo,+ penepo mushipiditu mubi utamba kudi Yehova wamuzakaja.+
15 Bengidi ba Solo bamunena’mba: “Ubamone mukuzakeja mushipiditu mubi utamba kudi Leza.
16 Tubakwisāshila, a mfumwetu, soñanya bengidi bobe bakakimbe muntu ujingulwile biyampe komba lunsense.+ Ponso pāya mushipiditu mubi utamba kudi Leza podi, aye ukakombela’lo, nobe ukevwana biyampe.”
17 Ponkapo Solo wanena bengidi bandi amba: “Nemwisāshila, nkimbilei’ko muntu omba biyampe, mundetele’ye.”
18 Mwingidi umo wanena’mba: “Tala’po bidi! Ami namwene mombelanga mwanā Yese mwine Betelema na bwino, kadi i muntu mukankamane, wa bulwi mukomokomo.+ Ubwanya kunena biyampe, kadi i muyampe mpala,+ ne Yehova nandi udi nandi.”+
19 Kupwa Solo watuma mikendi kudi Yese amba: “Ntumine obe mwana Davida, yewa udi na luombe.”+
20 Penepa Yese watenteka mikate pa mpunda, ne mutyibi wa kiseba wa vinyu, ne mbuji mwana, watumina’byo Solo na wandi mwana Davida.
21 Enka nenki Davida wafika kwa Solo washilula kumwingidila.+ Solo wamusanswa bya mwiko, nandi waikala ke kyabuta wandi.
22 Solo watuma musapu kudi Yese amba: “Nakwisāshila leka Davida añingidile nyeke mwanda namutōkelwa mutyima.”
23 Ponso padi pāya mushipiditu mubi utamba kudi Leza padi Solo, Davida wadi usela lunsense kaomba, penepa Solo watūkija mutyima ne kwivwana biyampe, ne mushipiditu mubi nao wamutaluka.+
