Samwele Umbajinji 19:1-24
19 Mwenda mafuku Solo wasapwila Yonafane wandi mwana ne bengidi bandi bonso amba usa kwipaya Davida.+
2 Ino Yonafane mwanā Solo byaadi usenswe Davida bininge,+ Yonafane wasapwila Davida amba: “Tata Solo usakanga kukwipaija. Shi ke pano dyumuka shi ke lubanga, enda pantu pafyame ufyame konka.
3 Nsa kutamba nkemane kubwipi na tata mu budimi mosa kwikala. Nsa kukunenena kudi tata, shi najingulula mwanda o-onso, na bubine nsa kukusapwila’o.”+
4 Ebiya Yonafane wanenena Davida+ biyampe kudi shandi Solo. Wamunena’mba: “Mulopwe kafwaninwepo kulubila mwingidi wandi Davida, mwanda kakulubilepo kadi wamwenine mu byonso byaakulongēle.
5 Watūdile būmi bwandi mu kyaka* pa kwipaya mwine Fidishitia,+ penepa Yehova waleta bushindañani* bukatampe pa Isalela yense. Abe mwine wemwenine’kyo, kadi wasangele bininge. Penepo mwanda waka usaka kulubila mashi ampikwa mambo na kwipaija Davida pampikwa mwanda?”+
6 Solo wateja Yonafane, kadi Solo watyipa’mba: “Bine ne Yehova byadi mūmi, kasapo kwipaibwa.”
7 Kupwa papo Yonafane waita Davida wamusapwila ino myanda yonso. Penepo Yonafane waselela Davida kudi Solo, waendelela kumwingidila mwaadi umwingidilanga dibajinji.+
8 Mwenda mafuku divita dyashilula monka, Davida nandi watamba walwa na bene Fidishitia webatapa, ke kutapa i kukunya, nabo bamunyema.
9 Penepo mushipiditu mubi utamba kudi Yehova waiya padi Solo+ paadi ushikete mu yandi njibo koku ukwete mukobe mu kuboko, papo Davida omba ñimbo na lunsense.+
10 Solo wakimba kulamakenya Davida ku lubumbu na mukobe, ino aye waepa Solo, penepa watunga mukobe mu lubumbu. Davida wanyema waenda bwine bufuku’bwa.
11 Kupwa Solo watuma mikendi ku njibo ya Davida beilame ne kumwipaya lubanga,+ ino Mikale mukaja Davida wamusapwila’mba: “Shi kunyemenepo* buno bufuku, kesha usa kufwa.”
12 Ponkapo Mikale watūkijija Davida pa dididisha, nandi wanyema wakafyama.
13 Ebiya Mikale wayata nkishi wa telafimi* wamutūla pa butanda, wayata ne kisandi kisuke na myoya ya mbuji wekitūla ku mitwe, wamupūta kisandi.
14 Penepo Solo watuma mikendi ikasele Davida, ino Mikale wanena’mba: “I mubele.”
15 Ebiya Solo watuma mikendi ikatale Davida kadi weilombola’mba: “Ndetelei’ye pa butanda bwandi mwanda wa kumwipaya.”+
16 Mikendi pa kutwela, bamona nkishi wa telafimi* pa kitanda ne kisandi kisuke na myoya ya mbuji kitūle paelanga mutwe.
17 Solo wanena Mikale amba: “Mwanda waka wadi ubaundimbe uno muswelo, ubanyemeja walwana+ nami amba apande?” Mikale watentulula Solo amba: “Wadi waunena’mba, ‘Nyemeje, shi bitupu nsa kukwipaya!’”
18 Ino Davida wanyemene wakafyama, wafika kudi Samwele ku Lama.+ Wamusapwila byonso byamulongele Solo. Penepo aye ne Samwele baenda, bakashikata mu Naiote.+
19 Mwenda mafuku basapwila Solo amba: “Tala! Davida udi mu Naiote mu Lama.”
20 Ponkapo Solo watuma mikendi ikakwate Davida. Abo pa kumona bakulumpe mu bapolofeto banena bupolofeto ne Samwele wimene wibaludika, mushipiditu wa Leza watūkila mikendi ya Solo, nabo baanza kwiendeja pamo bwa bapolofeto.
21 Bantu pa kulombola’byo Solo, watuma ponka na ponka mikendi mikwabo, nabo bashilula kwiendeja pamo bwa bapolofeto. Ebiya Solo watuma mikendi mikwabo, ya busatu, nabo bashilula kwiendeja pamo bwa bapolofeto.
22 Ku mfulo aye mwine waenda ku Lama. Aye pa kufika pa kyumbu kikatampe kidi mu Seku, waipangula’mba: “Le ba Samwele ne Davida badi kwepi?” Balondolola’mba: “Badi mu Naiote+ mu Lama.”
23 Aye Solo ukidi mu dishinda tamba kwine’kwa wenda ku Naiote mu Lama, mushipiditu wa Leza wamutūkila ne aye mwine, waenda mwishinda wiendeja pamo bwa mupolofeto enka ne byaafikile mu Naiote mu Lama.
24 Wavūla ne bivwalwa byandi, nandi kawiendeja pamo bwa mupolofeto ku meso a Samwele, kadi walāla konka mutaka* difuku dyonso’dya ne bufuku bonso’bwa. O mwanda banenanga’mba: “Le Solo nandi ubadilwa mu bapolofeto?”+
Kunshi kwa Dyani
^ Nansha’mba “Watūdile muya wandi mu dikasa dyandi.”
^ Nansha’mba “lupandilo.”
^ Nansha’mba “Shi kupandijepo muya obe.”
^ Nansha’mba “leza wa mu njibo; kilezaleza.”
^ Nansha’mba “leza wa mu njibo; kilezaleza.”
^ Nansha’mba “muvwale bityetye.”
