Samwele Umbajinji 2:1-36
2 Ebiya Hana wanena mu milombelo amba:
“Mutyima wami usangalanga mudi Yehova;+Disengo* dyami i dizunzulwe na Yehova.
Kyakanwa kyami i kyasamine balwana nami bininge,Mwanda nsangedile bilongwa byobe bya lupandilo.
2 Kekudipo nansha umo ujila pamo bwa Yehova,Kekudipo nansha umo poso’nka abe,+Kadi kekudipo dibwe pamo bwa Leza wetu.+
3 Kemwakisambai’nka kwisamba na kwizunzula;Kintu kya kibengo kekyakitamba mu kyakanwa kyenu,Mwanda Yehova i Leza wa buyuki,+Kadi aye ubandaulanga bilongwa senene.
4 Mata a miketo a bana-balume bakomokomo abatyumunwa,Ino boba bakukala abapebwa bukomo.+
5 Boba badya biyampe bafwaninwe kwieyeka ku mikate,Ino ba nzala kebakifupo monka nzala.+
Ñumba wabutula bana basamba-babidi,+Ino yewa wadi na bana bavule washala masala.*
6 Yehova wipayanga, kadi ulamanga būmi;*Utūkijanga mu Kibundu,* kadi usangulanga.+
7 Yehova ulandapajanga, kadi upetejanga;+Utūkijanga panshi, kadi uzunzulanga.+
8 Wimikanga mu luvumbi muntu mupēlulwe;Ulangulanga mulanda mu mulwi wa buto,*+Mwanda wa kwibashikatyija na bamfumu,Wibapa kityi kya bulēme.
Yehova ye mwinē bipanda bya ntanda,+Kadi utūlanga ntanda ya bumeni pa abyo.
9 Ulamanga matabula a bantu bandi ba lulamato,+Ino babi bakobijibwa talala mu mfindi,+Mwanda muntu kanekenyangapo na bukomo.+
10 Yehova ukatyumuna boba balwa nandi;*+Ukebakungwila tamba mūlu.+
Yehova ukatyiba mambo kufika ne ku mfulo kwa ntanda,+Ukapa mulopwe wandi bukomo+Kadi ukazunzula disengo dya* mushingwe māni wandi.”+
11 Kupwa Elekana waenda ku yandi njibo mu Lama, ino mwanuke’wa waikala mwingidi wa* Yehova+ ku meso a Edi kitobo.
12 Ino bana ba Edi badi bantu babi;+ kebadipo balēmekele Yehova.
13 Badi balonga namino na kyepelo kifwaninwe kupebwa babitobo na bantu:+ Ponso padi palambula muntu kitapwa, mwingidi wa kitobo wadi wiya na lukanya lwa misomo isatu mu kuboko, ao mwita papo ukisaba,
14 wadi utunga’lo mu kyoilo, mu kisuku kya kutēka’mo kya mikonko ibidi, mu mutēko, nansha mu kisuku kya kutēka’mo kya mukonko umo. Kyonso kyadi kyabuka ku lukanya, kitobo wadi usela’kyo ke kyandi. Mo mobadi balongela bene Isalela bonso badi bāya mu Shilo’mwa.
15 Kadi, ne kumeso kwa muntu ulambula kitapwa kufitula mwishi wa māni,+ mwingidi wa kitobo wadi wiya kamunena’mba: “Leta mwita wa kitobo wa kosha. Kasapo kusela mwita obe mutēke, poso mwita mubishi kete.”
16 Shi muntu’wa wamunena’mba: “Wibaleke bidi bafitule mwishi wa māni,+ penepa kosela kyonso kyosaka,”* aye wadi unena’mba: “Kutupu, mpe’o’nka pano; shi bitupu, nsa kusela’o ku bukomo!”
17 Enka nenki bubi bwa bengidi bwabaya bininge ku meso a Yehova,+ mwanda bano bana-balume badi bapunika kyamulambu kya Yehova.
18 Ino Samwele wadi wingila+ ku meso a Yehova, uvwele* efoda+ ya bukonge, nansha byaadi ukidi’tu mwanuke.
19 Ne kadi inandi wadi umulongela kotyi mutyetye wampikwa maboko, wadi umupaila kotyi mwaka ne mwaka paadi ukanda na wandi mulume kukalambula kitapwa kya pa mwaka.+
20 Ebiya Edi waesela Elekana ne wandi mukaji kanena’mba: “Yehova akupe mwana na uno mukaji pa kyaba kya uno wapānwa kudi Yehova.”+ Penepo nabo bajokela kwinjibo.
21 Yehova wata Hana mutyima, nandi waimita;+ kupwa wabutwila’ko bana bana-balume basatu ne bana-bakaji babidi. Ino mwanuke Samwele wadi wenda utama ku meso a Yehova.+
22 Edi wadi ke mununu bininge, ino waivwene bintu byonso byadi bilonga+ bandi bana ku Isalela yense ne mobadi balādila na bana-bakaji badi bengila ku kibelo kya pema wa kubungakena’ko.+
23 Wadi wibanena’mba: “Kyomulongela nyeke bino bintu i kika? Mwanda bintu byonaivwana bimunena bantu bonso i bibi.
24 Lekai, a bami bana, myanda yongivwana ijokoloka mu bantu ba Yehova ke miyampepo.
25 Shi muntu wapi mukwabo mambo, muntu ungi ubwanya kumwabijija kudi Yehova;* ino shi muntu wapi Yehova mambo,+ i ani ukamulombelela?” Ino bapela kuteja shabo, mwanda Yehova wasumininwe kwibepaya.+
26 Mu kine kitatyi’kya, mwanuke Samwele wadi wenda utama, kadi Yehova ne bantu badi bamutōkelwa mutyima.+
27 Muntu umo wa Leza waiya kudi Edi kamunena’mba: “Yehova wanena namino amba: ‘Mwene nesokwele patōkelela ku njibo ya shobe pobadi mu Edipito bu bapika ku njibo ya Felo?+
28 Kadi aye watongelwe mu bisaka byonso bya Isalela+ kwingila bu kitobo wami ne kukanda pa kisōkelo+ kyami mwanda wa kulambula bitapwa, kulambula ensense,* ne kuvwala efoda ku meso ami; ne kadi napēle njibo ya mukulutuba wenu byamulambu byonso bilambulwa na mudilo wa bene Isalela.*+
29 Mwanda waka banwe bana-balume mufutulula* kitapwa kyami ne kyamulambu kyami kyonasoñenye mu kifuko kyami kya kwikala’mo?+ Mwanda waka ulēmeka nyeke bobe bana bininge kuntabuka, mwinunija banwe bene na bipindi bilumbuluke bya byamulambu byonso bilambula bantu bami bene Isalela?+
30 “‘O mwanda Yehova Leza wa Isalela wanena namino amba: “Bine nanenene amba njibo yobe ne njibo ya mukulutuba obe ikananga nyeke ku meso ami.”+ Ino pano Yehova wanena’mba: “Kebibwanikapo kondi, mwanda boba bandēmeka nami nkebalēmeka,+ ino boba bamfutulula nabo bakazobejibwa.”
31 Tala! Mafuku asa kwiya onsa kufundula bukomo bobe* ne bwa njibo ya shobe bwine, enka nenki mu njibo ya shobe kemukekalapo muntu ukashala mūmi kufika ne ku bununu.+
32 Kadi ukamona walwana mu kīkalo kyami mu bukata mwa biyampe byonso bilongelwa Isalela,+ ino kemukekalapo monka nansha dimo mununu mu yobe njibo.
33 Muntu wa kobe onkikafundulapo ku mwingilo wa ku kisōkelo kyami ukalengeja meso obe ekale na kafi ne kukuletela njia,* ino bavule mu yobe njibo bakafwa ku kipete kya bana-balume.+
34 Kadi byobya bisa kufikila bobe bana babidi, ba Hofini ne Finease, bikekala kiyukeno kodi: Mu difuku dimo bakafwa abo bonso bubidi.+
35 Penepa nkeletela kitobo ukulupilwa.+ Ukengila mungya byobya bisaka mutyima wami;* kadi nkamūbakila njibo ya myaka na myaka, nandi ukananga nyeke ku meso a mushingwe māni wami.
36 Yense ukashala mu njibo yobe ukāya kwivukwila kwadi amba bamufute’ko lupeto ne mukate, kadi ukanena’mba: “Nakwisāshila, ntūle pa mwingilo umo wa babitobo mwa kudīla kibese kya mukate.”’”+
Kunshi kwa Dyani
^ Nansha’mba “Bukomo.” Tala Nshintulwilo ya Bishima.
^ Kishima pa kishima i, “wafumba.”
^ Nansha’mba “uletanga ku būmi.”
^ Nansha’mba “Sheole,” ko kunena’mba, kibundu kya bantu bonso. Tala Nshintulwilo ya Bishima.
^ Bibwanika padi i, “kyala kya busala.”
^ Bibwanika padi i, “Boba balwa na Yehova bakatuyulwa.”
^ Nansha’mba “bukomo bwa.” Tala Nshintulwilo ya Bishima.
^ Nansha’mba “wadi wingidila.”
^ Nansha’mba “kisakasaka muya obe.”
^ Kishima pa kishima i, “mwikutyile.”
^ Bibwanika padi i, “Leza ukamunenena’ko.”
^ Kishima pa kishima i, “bana ba Isalela.”
^ Bibwanika padi i, “kulengeja mwishi wa kya mulambu ukande mūlu.”
^ Kishima pa kishima i, “muta kyambo.”
^ Kishima pa kishima i, “kuboko kobe.”
^ Nansha’mba “kuzozeja muya obe.”
^ Nansha’mba “bidi mu mutyima wami ne mu muya wami.”
