Samwele Umbajinji 20:1-42
-
Yonafane ulamete Davida (1-42)
20 Penepo Davida wanyema ku Naiote mu Lama. Inoko, waiya kudi Yonafane kanena’mba: “Le i bika byonalonga?+ Le kibi kyonalonga i kyepi, ne i mambo’ka ompile shobe akimbila būmi bwami?”*
2 Penepo Yonafane wamunena’mba: “Kebibwanikapo!+ Kusapo kufwa. Tala! Tata kasapo kulonga kintu kyo-kyonso, kikatampe nansha kityetye pampikwa kunsokwela’kyo. Tata ubwanya’tu namani kumfya uno mwanda? Kino kekisapo kulongeka.”
3 Ino Davida watyipa monka kanena’mba: “Shobe uyukile biyampe amba ubauntōkelwa mutyima+ o mwanda ubwanya kunena’mba, ‘Yonafane kafwaninwepo kuyuka kino kutyina’mba byakamusansa.’ Ino, bine ne Yehova byadi mūmi kadi bine ne byodi* mūmi, padi’tu ditabula dimo pa bukata bwa ami ne lufu!”+
4 Ebiya Yonafane wanena Davida amba: “Kyonso kyonena,* nsa kukulongela’kyo.”
5 Davida wanena Yonafane amba: “Kesha i kweji katenta,+ na bubine nenwe kushikata na mulopwe pa kudya; ino ufwaninwe kunyemeja, ñende nkafyame mu ntanda kufika ne mu difuku dya busatu kyolwa.
6 Shi shobe wajingulula’mba nkidi’popo, nabya mulombole amba, ‘Davida waunzenzenga mupe lupusa ende bukidi ku kibundi kyabo ku Betelema,+ mwanda badi’ko na kitapwa kya mwaka kya kisaka kyonso.’+
7 Shi walondolola’mba, ‘I biyampe,’ ko kunena’mba kudi ndoe kudi mwingidi obe. Ino shi walobe, yuka’mba i musumininwe kunsanshija.
8 Lombola mwingidi+ obe buswe bwa ndamatyidile mwanda ubasamba kipwano na mwingidi obe ku meso a Yehova.+ Ino shi nemupye mambo,+ ngipaye abe mwine. Kyokampānina kudi shobe i kika?”
9 Penepo Yonafane wanena’mba: “Kebibwanikapo kukulonga kino kintu! Shi nayuka’mba tata i musumininwe kukusanshija, mbulwepo kukulombola?”+
10 Kupwa Davida wanena Yonafane amba: “I ani usa kunombola shi shobe wakulondolola bibi?”
11 Yonafane wanena Davida amba: “Iya twende mu ntanda.” Ponkapo abo bonso bubidi baenda mu ntanda.
12 Penepa Yonafane wanena Davida amba: “Yehova Leza wa Isalela ekale kamoni amba nsa kuloba tata tudi mu kanwa kubwipi na kino kitatyi kesha nansha ku difuku dya busatu. Shi waloelelwa Davida, mwene nsa kukutumina musapu ne kukusokwela’kyo?
13 Ino shi tata ukanine kukusanshija, Yehova alonge Yonafane kino ne kubweja’ko shi nkikusokwedile’kyopo ne kukunyemeja mu ndoe. Yehova ekale nobe,+ enka mwawaikadile na tata.+
14 Mwene usa kunombola buswe bwa ndamatyidile bwa Yehova pano ponakidi mūmi ne ponsa kufwa pene?+
15 Kokaleka nansha dimo kulombola buswe bobe bwa ndamatyidile ku ba mu njibo yami,+ nansha kitatyi kisa kukombeleja Yehova balwana na Davida bonso pano pa ntanda.”
16 Ebiya Yonafane wasamba kipwano na njibo ya Davida kanena’mba, “Yehova usa kulandula’kyo ne kwita balwana na Davida beshintulwile.”
17 Penepo Yonafane watyipija monka Davida pa buswe bwamusenswe, mwanda wadi umusenswe mwaesanshilwe aye mwine.*+
18 Kupwa Yonafane wamunena’mba: “Kesha i kweji katenta,+ basa kumona’mba kudi’popo, mwanda pa kityi kyobe kepasapo kwikala muntu.
19 Mu difuku dya busatu, po pene pobasa kumona’mba kudi’popo, ino abe ufwaninwe kwiya pa kifuko powafyeme difuku dikwabo’pa* wikale kuno kubwipi na dibwe.
20 Ami nsa kwela miketo isatu bukila bumo bwadyo na ami wasa mu kitōndo.
21 Ponsa kutuma mwingidi nsa kumunena’mba, ‘Enda, kakimbe miketo.’ Shi nanena mwingidi amba, ‘Tala! Miketo idi ku wao obe mutamba, boya’yo,’ penepa abe ufwaninwe kujoka, mwanda bine ne Yehova byadi mūmi, kino kishintulula’mba bintu byonso i biyampe kodi kekudipo kyaka.
22 Ino shi nanena nsongwalume’wa amba, ‘Tala! Miketo idi kumeso bininge nobe,’ nabya enda, mwanda Yehova wakunyemeja.
23 Ino pa mwanda wa mulao otwelaa,+ abe ne ami, Yehova ekale pa bukata bwetu nyeke.”+
24 Penepo Davida wafyama mu ntanda. Kweji katenta pa kutamba, mulopwe washikata pa kityi kyandi kitatyi kya byakudya.+
25 Mulopwe wadi ushikete pashikatanga nyeke dya ku lubumbu. Yonafane wadi umutadidile, Abinele+ nandi wadi ushikete mu lubavu lwa Solo, ino pa kifuko kya Davida padi patupu muntu.
26 Solo kanenenepo kintu nansha kimo mu dine difuku’dya, mwanda wadi unena mu mutyima wandi amba: ‘Kudi kintu kyamufikila waikala musubile.+ Bine, ye uno musubile.’
27 Ino difuku dikwabo kupwa kwa kweji katenta, difuku dya bubidi, pa kifuko kya Davida padi’nka patupu muntu. Penepa Solo wanena wandi mwana Yonafane amba: “Mwanda waka mwanā Yese+ kailepo ku byakudya kesha ne dyalelo dine?”
28 Yonafane walondolola Solo amba: “Davida waunzenzele mupe lupusa lwa kwenda ku Betelema.+
29 Wanenene amba, ‘Nakwisāshila, mpe’ko lupusa ñende, mwanda tudi na kitapwa kya kisaka mu kibundi, kadi i mwanetu mwine wangityija. Shi ubauntōkelwa mutyima, nakwisāshila, ndeke ñende mu bufyafya nkamone banabetu.’ O mwanda mwine kailepo ku meza a mulopwe.”
30 Ponkapo Solo walobela Yonafane bininge, kamunena’mba: “Abe mwanā mwana-mukaji ntomboki, ulanga’mba nkiyukilepo amba wi mutonge kwikupa ku mutamba wa mwanā Yese, mwanda wa bumvu bobe abe mwine ne bumvu bwa inobe?*
31 Kitatyi kyonso kidi mwanā Yese mūmi pano pa ntanda, abe ne bulopwe bobe kemukakomejibwapo pototo.+ Shi ke pano, tuma muntu andetele’ye mwanda ufwaninwe kufwa.”*+
32 Ino Yonafane wanena shandi Solo amba: “Kyasa kufwila i kika?+ Walonga bika?”
33 Ponkapo Solo wamwasa mukobe mwanda wa kumutapa,+ ebiya Yonafane wayuka’mba shandi i musumininwe kwipaya Davida.+
34 Yonafane wataluka ponka na ponka ku meza na bulobo bukatampe, kadi kadilepo kakudya nansha kamo mu difuku dya bubidi kupwa kwa kweji katenta, mwanda wadi mujingwe mutyima pa mwanda wa Davida+ kadi shandi wamufwijije bumvu.
35 Lubanga Yonafane waenda mu ntanda mungya mobadi belaile na Davida, ne mwingidi nkasampe wadi nandi.+
36 Wanena mwingidi wandi amba: “Enda’po bidi lubilo ukakimbe miketo yongela.” Mwingidi waenda lubilo, penepo Yonafane waela muketo kumeso kwandi.
37 Mwingidi pa kufika pa kifuko paelele Yonafane muketo, Yonafane waela mwingidi lubila’mba: “Mwene muketo udi kumeso kobe?”
38 Yonafane waela mwingidi lubila’mba: “Peja’ko! Enda bukidi! Kokija!” Penepo mwingidi wa Yonafane waboya miketo wajokela kudi mfumwandi.
39 Mwingidi kadipo wivwanije kintu nansha kimo pa uno mwanda; enka Yonafane ne Davida bo badi bayukile mobishintulwila.
40 Kupwa Yonafane wapa mwingidi wandi byabulwi wamulombola’mba: “Enda kebitwale mu kibundi.”
41 Mwingidi pa kutaluka, Davida watamba pa kifuko kya pabwipi kyadi dya kunshi. Kupwa wapona mpala pa nshi wevukwila misunsa isatu, ebiya befifya kebedila, ino Davida wadila kupita.
42 Yonafane wanena Davida amba: “Enda mu ndoe, mwanda batwe bonso tubatyipe+ mu dijina dya Yehova amba, ‘Yehova ekale pa bukata bwa abe ne ami ne pa bukata bwa lutundu* lobe ne lutundu* lwami nyeke.’”+
Kupwa Davida wataluka waenda, Yonafane nandi wajokela mu kibundi.
Kunshi kwa Dyani
^ Nansha’mba “muya wami.”
^ Nansha’mba “muya obe i.”
^ Nansha’mba “kinena muya obe.”
^ Nansha’mba “muya wandi aye mwine.”
^ Kishima pa kishima i, “mu difuku dya mingilo.”
^ Kishima pa kishima i, “mwanda wa bumvu bwa mutaka wa inobe?”
^ Kishima pa kishima i, “mwanda i mwanā lufu.”
^ Kishima pa kishima i, “lukunwa.”
^ Kishima pa kishima i, “lukunwa.”
