Samwele Umbajinji 21:1-15
21 Mwenda mafuku Davida waiya ku Nobe+ kudi kitobo Ahimeleke. Ahimeleke washilula kuzakala pa kwitana na Davida, kamunena’mba: “Mwanda waka udi bunka pampikwa muntu mukwabo?”+
2 Davida walondolola kitobo Ahimeleke amba: “Mulopwe wantume kulonga kintu kampanda, ino wanenene amba, ‘Muntu kakiyuka kintu nansha kimo pa mwingilo onakutuma ne pa myanda yonakusoñanya.’ Ne mwilae kwitana na bansongwalume bami pa kifuko kampanda.
3 Ino shi udi’ko na mikate itano, mpe’yo, nansha kyonso kidi’ko.”
4 Inoko kitobo walondolola Davida amba: “Nkidipo na mikate ya bitupu, ino kudi’nka mikate ijila+—bansongwalume babwanya kudya’yo enka shi i belame ku bana-bakaji.”*+
5 Davida walondolola kitobo amba: “Na bubine bana-bakaji badi kulampe netu pamo’nka na mu mafuku a kunyuma ponadi ntamba kwenda ku bulwi.+ Shi imbidi ya bansongwalume i ijila nansha shi mwingilo i wa bitupu, mwene dyalelo dyo dine dyoifwaninwe kwikala ijila!”
6 Penepo kitobo wamupa mikate ijila,+ mwanda kekwadipo mikate mikwabo poso’nka mikate milombolwe yatalwilwe ku meso a Yehova mwanda wa kwiipingakanya na mikate mipya mu difuku dyoyatalwilwe.
7 Ino mwingidi umo wa Solo wadi kwine’kwa mu dine difuku’dya, mulamwe ku meso a Yehova. Dijina dyandi i Doeke+ mwine Edoma,+ mukulu wa bakumbi ba Solo.
8 Kupwa Davida waipangula Ahimeleke amba: “Le udi’ko na mukobe nansha na kipete kuno? Ami nkyaselelepo kipete kyami nansha byabulwi byami bine, mwanda mwingilo wa mulopwe wadi wa bukidibukidi.”
9 Penepo kitobo walondolola’mba: “Kipete kya Ngodiata+ mwine Fidishitia owaipaile mu Musanza* wa Elā,+ kidi’ko, i kivungile mu kisandi kunyuma kwa efoda.+ Shi usaka kusela’kyo, sela’kyo, mwanda kyo akyo kidi’ko kete.” Davida nandi amba: “Kekudipo kikwabo na kino. Mpe’kyo.”
10 Mu dine difuku’dya Davida wataluka waendelela kunyema+ Solo, kupwa wafika kudi Akishi mulopwe wa Ngata.+
11 Bengidi ba Akishi bamunena’mba: “Mwene uno ye Davida mulopwe wa ntanda’ya? Mwene i aye obadi bembila koku baja, amba,‘Solo waipaya twandi tununu,Davida nandi andi makumi a tununu’?”+
12 Davida walama bino binenwa ku mutyima, wakwatwa moyo bininge pa mwanda wa Akishi mulopwe wa Ngata.+
13 Penepa weinanya kawienge bu kivila+ ku meso abo, kalonga bya buvila paadi mu bukata mwabo.* Wadi ulembakanya mishiko pa bibelo koku usūmija lulenji ku myevu.
14 Ku mfulo Akishi wanena bengidi bandi amba: “Kemumwenepo amba uno muntu i mulembakane! Kyomwamuletela kondi i kika?
15 Le mbudilwe bantu balembakane amba nkimbe uno ulonga bya bulembakane ku meso ami? Le uno muntu ufwaninwe’tu kutwela mu yami njibo?”
Kunshi kwa Dyani
^ Nansha’mba “i bejibe kulāla na bana-bakaji.”
^ Nansha’mba “Dilungu dya Musanza.”
^ Kishima pa kishima i, “mu makasa abo.”
