Samwele Umbajinji 22:1-23
22 Ebiya Davida watamba kwine’kwa,+ wanyemena ku mutá wa Adulama.+ Banababo ne njibo yonso ya shandi pa kwivwana’o, batūkila kwaadi’kwa.
2 Ne boba bonso badi mu makambakano ne badi na mapu ne badi na njia* bebungila kwadi, nandi waikala ke mukata wabo. Kwadi kintu kya bana-balume 400 pamo nandi.
3 Davida watamba kwine’kwa waenda ku Mizipe mu Moabu wanena mulopwe wa Moabu+ amba: “Nakwisāshila, tata ne mama bashale’po bidi nobe kufika ne byondyuka bisa kunongela Leza.”
4 Ebiya webashiya na mulopwe wa Moabu, nabo bashala nandi kitatyi kyonso kyadi Davida mu kifuko kikomejibwe.+
5 Mwenda mafuku mupolofeto Ngade+ wanena Davida amba: “Kokekala nyeke mu kifuko kikomejibwe. Tamba’mo wende mu ntanda ya Yuda.”+ Ponkapo Davida watamba waenda mu ditó dya Helete.
6 Solo waivwana’mba abasokola Davida ne bantu badi nabo. Papo Solo wadi ushikete mu Ngibea+ munshi mwa mutyi wa tamadise pa mutenta koku ukwete mukobe mu kuboko, kadi bengidi bandi bonso badi bamujokolokele.
7 Kupwa Solo wanena bengidi bandi badi bamujokolokele amba: “Nemwisāshila, ivwanai banwe bene Benjemani. Lelo mwanā Yese+ nandi usa kwimupa banwe bonso madimi ne madimi a mañanza? Le ukemutonga banwe bonso bu bakata ba tununu ne bakata ba tutwa?+
8 Banwe bonso mubankutyila kitumba! I kutupu waunombwele pasambile wami mwana kipwano na mwanā Yese!+ I kutupu nansha umo momudi unkwatyilwa lusa ne kunombola’mba wami mwana watonona mwingidi wami amfyamine, mobikadile dyalelo’mu.”
9 Penepo Doeke+ mwine Edoma, wadi utūdilwe kwine’kwa bu mukata wa bengidi ba Solo, walondolola’mba:+ “Namwene mwanā Yese wiya ku Nobe kwa Ahimeleke mwanā Ahitube.+
10 Kadi wamulombelele kudi Yehova wamupa ne byakudya. Wamupēle’nka ne kipete kya Ngodiata mwine Fidishitia.”+
11 Ponkapo mulopwe waityija Ahimeleke mwanā Ahitube kitobo ne babitobo bonso ba njibo ya shandi, badi mu Nobe. Ebiya abo bonso baiya kwa mulopwe.
12 Penepo Solo wanena’mba: “Nakwisāshila, teja bidi abe mwanā Ahitube!” Nandi watentulula’mba: “Kalombo a mfumwami.”
13 Solo wamunena’mba: “Mwanda waka mwaunkutyile kitumba, abe ne mwanā Yese, ubamupe mikate ne kipete kadi ubamulombelela kudi Leza? Aye ulwanga nami kadi i mumfyamine, mobikadile dyalelo’mu.”
14 Ino Ahimeleke walondolola mulopwe amba: “I ani mu bengidi bobe bonso ukulupilwa* pamo bwa Davida?+ I muko+ wa mulopwe kadi i mukata wa bobe basola balami ne i mulēmekibwe mu njibo yobe.+
15 Le dyalelo dyo dibajinji dyonamulombelela kudi Leza?+ Nkibwanyapo kulonga byowanena’byo! Mulopwe kakalongela mwingidi wandi nansha njibo yonso ya tata kibi, mwanda mwingidi obe kadipo uyukile kantu nansha kamo mu ino myanda.”+
16 Ino mulopwe wanena’mba: “Bine abe Ahimeleke usa kufwa,+ abe ne njibo yonso ya shobe.”+
17 Penepo mulopwe wanena balami* badi bamujokolokele amba: “Alamukai mwipaye babitobo ba Yehova, mwanda abekupe kudi Davida! Badi bayukile amba unyemanga, ino kebansapwidilepo!” Ino bengidi ba mulopwe kebasakilepo kōlola kuboko mwanda wa kutapa babitobo ba Yehova.
18 Kupwa mulopwe wanena Doeke+ amba: “Abe alamuka utape babitobo!” Ponkapo Doeke mwine Edoma+ waenda watapa babitobo aye mwine. Waipaile mu dyodya difuku bana-balume 85 bavwele efoda+ ya bukonge.
19 Waipaya na kipete ne bantu ba Nobe+ bene, kibundi kya babitobo; watapa na kipete mwana-mulume ne mwana-mukaji, mwanuke ne mwana mutyetye, ñombe, ne mpunda, ne mukōko.
20 Inoko mwana umo wa Ahimeleke mwanā Ahitube witwa bu Abiatala,+ wapanda ne kunyema wanyema wakalonda Davida.
21 Abiatala wasapwila Davida amba: “Solo waipaya babitobo ba Yehova.”
22 Penepo Davida wanena Abiatala amba: “Byopadi Doeke mwine Edoma, nayukile mu dyodya difuku+ amba, na bubine usa kukasapwila Solo. Nalambikwa lufu lwa muntu ense* wa mu njibo ya shobe.
23 Shikata nami. Kokikwatwa moyo, mwanda ense ukimba būmi bobe* wakimbe būmi bwami;* nsa kukulama.”+
Kunshi kwa Dyani
^ Nansha’mba “badi na muya wa bululu.”
^ Nansha’mba “mukōkele.”
^ Kishima pa kishima i, “banyema lubilo.”
^ Nansha’mba “muya onso.”
^ Nansha’mba “muya obe.”
^ Nansha’mba “muya wami.”
