Samwele Umbajinji 23:1-29
23 Mwenda mafuku basapwila Davida amba: “Bene Fidishitia abaiya kulwa na Keila,+ kadi boba batūta bipūdilo.”
2 Ebiya Davida waipangula Yehova+ amba: “Le ñende nkepaye bano bene Fidishitia?” Yehova walondolola Davida amba: “Enda ukepaye bene Fidishitia ukūle Keila.”
3 Ino bantu ba Davida bamunena’mba: “Tala! Tudi na moyo pano potukidi mu Yuda;+ shi twende ku Keila kukalwa na mulongo wa bulwi wa bene Fidishitia ke pepi!”+
4 Ebiya Davida waipangula monka Yehova.+ Yehova nandi wamulondolola’mba: “Taluka; tūkila ku Keila mwanda nsa kupāna bene Fidishitia mu kuboko kobe.”+
5 Penepo Davida waenda ne bantu bandi ku Keila, walwa na bene Fidishitia; wasela bimunanwa byabo ne kwibatapa, ke kutapa i kukunya, ponkapo Davida wakūla bekadi ba Keila.+
6 Ino panyemēne Abiatala+ mwanā Ahimeleke kudi Davida ku Keila, wapaile ne efoda.
7 Basapwila Solo amba: “Davida wafika ku Keila.” Ponkapo Solo wanena’mba: “Leza wamupāna mu makasa ami,*+ mwanda wepija aye mwine mu kidiba pa kutwela mu kibundi kidi na bibelo ne mikabo.”
8 Ebiya Solo waityija bantu bonso ku divita batūkile ku Keila ne kutūdila Davida ne bantu bandi kasāla.
9 Davida pa kuyuka’mba Solo umukutyilanga kitumba, wanena kitobo Abiatala amba: “Leta efoda kuno.”+
10 Kupwa Davida wanena’mba: “A Yehova Leza wa Isalela, mwingidi obe waivwana na bubine amba Solo ukaninanga kwiya ku Keila mwanda wa konakanya kibundi pa mwanda wa ami.+
11 Lelo baledi* ba Keila basa kumpāna mu makasa andi? Le Solo usa kutūka enka mwaivwanina’kyo mwingidi obe? A Yehova Leza wa Isalela, nakwisāshila, sapwila’po mwingidi obe.” Penepo Yehova wanena’mba: “Aye usa kutūka.”
12 Davida waipangula’mba: “Lelo baledi ba Keila basa kumpāna ami ne bantu bami mu kuboko kwa Solo?” Yehova walondolola’mba: “Basa kwimupāna.”
13 Ponkapo Davida wataluka ne bantu bandi, kintu kya bantu 600,+ batamba mu Keila kebendakana konso kobadi babwanya kwenda. Pobasapwidile Solo amba Davida wanyema mu Keila, kakimulondelepo.
14 Davida waikala’nka mu ntanda mutuputupu mu bifuko bikomo kufika’mo, mu ntanda ya ngulu ya mu ntanda mutuputupu ya Zife.+ Solo wamukimba ne mikeketo,+ ino Yehova kamupēnepo mu kuboko kwandi.
15 Davida wayuka’mba* Solo waenda kukakimba būmi bwandi,* papo Davida wadi mu ntanda mutuputupu ya Zife ku Holesha.
16 Yonafane mwanā Solo waenda ku Holesha kudi Davida, wamukwasha ekale na bukomo* mudi Yehova.+
17 Wamunena’mba: “Kokikwatwa moyo mwanda tata Solo kasapo kukusokola; abe usa kwikala mulopwe pa Isalela,+ nami nkekala wa bubidi; ne tata Solo mwine uyukile’kyo.”+
18 Kupwa abo bonso bubidi basamba kipwano+ ku meso a Yehova, Davida washala mu Holesha, ino Yonafane waenda kwandi.
19 Mwenda mafuku bantu ba Zife bakandila kudi Solo ku Ngibea+ kebanena’mba: “Mwene Davida ufyeme kubwipi netu+ mu bifuko bikomo kufika’mo ku Holesha,+ ku mukuna wa Hakila+ udi kunshi* kwa Yeshimone?*+
20 A mulopwe, ponso pokikusangaja* kutūka, tūka, tusa kumupāna mu makasa a mulopwe.”+
21 Penepo Solo wanena’mba: “Yehova emwesele dyese, mwanda mubankwatyilwa lusa.
22 Nemwisāshila endai mukalonge bukomo bwa kutana kwine kwadi ne bene bamumwene’ko, mwanda bansapwidile amba i mukosoke bibi.
23 Jingululai senene bifuko byonso byafyamanga’mo kupwa jokai kondi na bukamoni. Penepa nami nsa kwenda nenu, kadi shi udi mu ntanda’ya, nsa kumukimba senene mu tununu* tonso twa Yuda.”
24 Ebiya bataluka baenda ku Zife+ kumeso kwa Solo, papo Davida ne bantu bandi badi mu ntanda mutuputupu ya Maone,+ mu Alaba+ kunshi kwa Yeshimone.
25 Kupwa Solo waiya kumukimba na bandi bantu.+ Basapwila’mo Davida, nandi ponka na ponka watūkila ku kidibwe,+ waikala mu ntanda mutuputupu ya Maone. Solo pa kwivwana’o, walonda Davida mu ntanda mutuputupu ya Maone.
26 Solo pa kufika ku mutamba umo wa lūlu, Davida ne bantu bandi nabo badi ku mutamba mukwabo wa lūlu. Davida wadi kaepangila kunyema+ Solo, ino Solo ne bantu bandi badi bafwena bajokoloka Davida ne bantu bandi mwanda wa kwibakwata.+
27 Ino mukendi waiya kudi Solo keunena’mba: “Iya bukidi, mwanda bene Fidishitia abaiya kutamba’dyo ntanda!”
28 Ponkapo Solo waleka kulonda Davida+ waenda kukekuma na bene Fidishitia. O mwanda kifuko’kya kyainikilwe bu Kidibwe kya Kukalañanya.
29 Ebiya Davida wakanda kutamba kwine’kwa wakashikata mu bifuko bikomo kufika’mo ku Ene-Ngedi.+
Kunshi kwa Dyani
^ Kishima pa kishima i, “wamupotoloja mu makasa ami.”
^ Bibwanika padi i, “benē ntanda.”
^ Bibwanika padi i, “wadi na moyo mwanda wa.”
^ Nansha’mba “muya wandi.”
^ Kishima pa kishima i, “wakomeja kuboko kwandi.”
^ Kishima pa kishima i, “ku mutamba wa lundyo.”
^ Bibwanika padi i, “mu ntanda mudi zolē; mu ntanda mutuputupu.”
^ Nansha’mba “pokisangaja muya obe.”
^ Nansha’mba “bisaka.”
