Samwele Umbajinji 24:1-22
24 Solo pa kujoka kwaadi ukalondele bene Fidishitia, bamusapwila’mba: “Tala! Davida udi mu ntanda mutuputupu ya Ene-Ngedi.”+
2 Penepo Solo wasela bana-balume 3 000 batongwe mu Isalela ense, bakakimba Davida ne bantu bandi pa kifuko kitunduke kya mabwemabwe kya bambuji ba mu ngulu.
3 Solo waiya ku bipombo bya mikōko bya mabwe byadi ku dishinda, kwine kwadi mutá, penepo watwela’mo kukendalala,* papo Davida ne bantu bandi badi bashikete munda bininge kunyuma kwa mutá.+
4 Ebiya bantu ba Davida bamunena’mba: “Dino i difuku dyakunena Yehova amba, ‘Tala! Napāna walwana nobe mu makasa obe,+ ubwanya kumulonga byonso byomona bu biyampe.’” Penepa Davida wataluka, waketa bityebitye milomo ya kotyi wampikwa maboko wa Solo.
5 Kupwa papo mutyima* wa Davida wadi keumutu’nka kumutwa+ mwanda waketele milomo ya kotyi wampikwa maboko wa Solo.
6 Wanena bantu bandi amba: “Kebibwanikapo mungya mumweno wa Yehova nonge kino kintu kudi mfumwami, mushingwe māni wa Yehova, na kutulula kuboko kwami pādi, mwanda aye i mushingwe māni wa Yehova.”+
7 Enka nenki Davida wakankaja* bandi bantu na bino binenwa, kadi kebalekelepo batambe’dyo Solo. Ino Solo waimana watamba mu mutá, ne kwenda waenda.
8 Kupwa Davida wataluka watamba mu mutá kaela Solo mabila kunyuma’mba: “A mfumwami mulopwe!”+ Solo pa kuvundamuka kamutale, Davida wafukata bininge mpala pa nshi kaevukwila.
9 Davida wanena Solo amba, ‘Mwanda waka uteja binenwa bya bantu banena’mba, ‘Tala! Davida ukimbanga kukusanshija’?+
10 Dyalelo’di meso obe abemwena mwakupāninanga Yehova mu kuboko kwami mu mutá. Ino panenanga muntu umo amba nkwipaye,+ nakukwatyilwanga lusa kenena’mba, ‘Nkisapo kutulula kuboko kwami padi mfumwami, mwanda i mushingwe māni wa Yehova.’+
11 Kadi tala, a tata, bine tala milomo ya kotyi obe wampikwa maboko mu kuboko kwami; mwanda ponaketanga milomo ya kotyi obe wampikwa makasa, nkyadipo nkwipaile. Pano ukokeja kumona ne kwivwanija’mba nkikaninepo kukusanshija nansha kukutombokela, kadi nkikupilepo mambo,+ ino abe ye umpoyapoya mwanda wa kuyata būmi bwami.*+
12 Yehova etutyibile mambo abe ne ami,+ kadi Yehova akulubwile kinongo pa mwanda wami,+ ino kuboko kwami kekusapo kukulonga kibi.+
13 Monka munenena lukindi lwa pa kala’mba: ‘Mu babi mutambanga bubi,’ ino kuboko kwami kekusapo kukulonga kibi.
14 Lelo mulopwe wa Isalela watambe kukalonda ani? Le i ani opanga lubilo? Le i mbwa mufwe? Lelo i kīshi kya bituputupu kitwa bu lukupa?+
15 Yehova ekale mutyibi, uketutyibila mambo abe ne ami, kadi ukamona myanda yami+ ne kunenena ne kuntyibila mambo kadi ukankūla ku kuboko kobe.”
16 Davida pa kupwa kumunena bino binenwa, Solo wanena’mba: “Lelo dyadyo i dyobe diwi, a wami mwana Davida?”+ Penepo Solo washilula kudila na diwi dikatampe.
17 Wanena Davida amba: “Abe wi moloke kumpita, mwanda ubanongela biyampe ino ami nakujokeleja bibi.+
18 Bine, dyalelo ubanombola biyampe byowalonga pa kuleka kowaleka kungipaya paumpānanga Yehova mu kuboko kobe.+
19 Mwanda le i muntu’ka utana walwana nandi wamuleka ende bitupu kumusanshija mpika? Yehova usa kukupala mpalo miyampe+ pa mwanda wa byowaunongela dyalelo.
20 Shi ke pano tala! Ndyukile amba bine usa kubikala bulopwe ne amba bulopwe+ bwa Isalela bukeja mu makasa obe.
21 Ntyipile nanshi mu dijina dya Yehova+ amba kukakombelejapo ntundu* yami ikāya’ko kadi amba kukatukijapo fututu dijina dyami mu njibo ya tata.”+
22 Penepo Davida watyipila Solo, kupwa Solo waenda kwandi.+ Ino Davida ne bantu bandi bakandila ku kifuko kikomejibwe.+
Kunshi kwa Dyani
^ Kishima pa kishima i, “kupūta binyantyilo byandi.”
^ Nansha’mba “mutyima wa mundamunda.”
^ Bibwanika padi i, “wapalakanya.”
^ Nansha’mba “muya wami.”
^ Kishima pa kishima i, “lukunwa.”
