Samwele Umbajinji 25:1-44
25 Mwenda mafuku Samwele+ wafwa, penepo Isalela ense webungila pamo kumudila ne kumujīka ku yandi njibo mu Lama.+ Kupwa Davida wataluka watūkila mu ntanda mutuputupu ya Palana.
2 Ino kwadi mwana-mulume umo mu Maone+ wadi wingidila mu Kalamela.*+ Uno muntu wadi mpeta mukatampe; wadi na mikōko 3 000 ne bambuji 1 000, kadi mu kine kitatyi’kya wadi utenda mikōko yandi myoya mu Kalamela.
3 Dijina dya uno muntu i Nabalu,+ dya wandi mukaji nadyo i Abikele.+ Wandi mukaji wadi na bujinguludi kadi muyampe mpala, ino wandi mulume, mwine Kalebu,+ wadi na mutyima mūmu, kadi wadi ulonga bibi.+
4 Davida waivwana mu ntanda mutuputupu amba Nabalu utendanga mikōko yandi myoya.
5 Ebiya Davida wamutumina bansongwalume dikumi, kadi Davida wasapwila bansongwalume’ba amba: “Kandai ku Kalamela, shi mubafika kwa Nabalu, mwipangulei mu dijina dyami mwabūkile.
6 Kupwa nenai amba, ‘Ufwa bununu, ikala biyampe,* ne ba mu njibo yobe nabo bekale biyampe, kadi ne byonso byodi nabyo bikale biyampe.
7 Pano naivwana’mba utendanga mikōko myoya. Potwadi na bakumbi bobe ketwebalongelepo kibi,+ kadi kebajimijepo kintu nansha kimo kitatyi kyonso kyotwadi nabo mu Kalamela.
8 Ipangula bansongwalume bobe basa kukusapwila. Tōkelwa’po bansongwalume bami mutyima, mwanda tubaiya mu kitatyi kya nsangaji.* Nakwisāshila, pá bengidi bobe ne obe mwana Davida kyonso kyobīkile.’”+
9 Penepo bansongwalume ba Davida baenda basapwila Nabalu bino bintu byonso mu dijina dya Davida. Abo bapwa’tu,
10 Nabalu watentulula bengidi ba Davida amba: “Le Davida i ani, ne mwanā Yese nandi i ani? Ano mafuku bengidi bavule banyemanga bamfumwabo.+
11 Le mfwaninwe kuyata mikate yami ne mema ami ne mwita ontapīle boba bantendelanga myoya ya mikōko mpe’byo bantu kebayukene ne kobatamba kwine?”
12 Penepo bansongwalume ba Davida bajoka bamusapwila bino binenwa byonso.
13 Ponkapo Davida wanena bantu bandi’mba: “Muntu ne muntu esomeke kipete!”+ Ebiya bonso besomeka bipete byabo, Davida nandi wesomeka kipete kyandi, kintu kya bantu 400 bakanda na Davida, ino bantu 200 bashala na bintu.
14 Mu kine kitatyi’kya, mwingidi umo wasapwila Abikele mukaja Nabalu amba: “Tala! Davida watumenga mikendi kutamba mu ntanda mutuputupu mwanda wa kusakila mfumwetu biyampe, inoko aye webashola mutonko.+
15 Bano bantu badi netu biyampe mpata. Kadi kebetulongelepo kibi, ketwajimijepo kintu nansha kimo kitatyi kyonso kyotwadi nabo mu madimi.+
16 Badi pamo bwa lubumbu lwa kwitukinga koku ne koku, ekale bufuku nansha mwinya, kitatyi kyonso kyotwadi nabo tukumba mikōko.
17 Shi ke pano kwata butyibi uyuke bya kulonga, mwanda kino kisa kuletela mfumwetu ne njibo yandi yonso kyamalwa,+ kadi aye i muntu wa bitupu, kekudipo muntu+ nansha umo ubwanya kwisamba nandi.”
18 Ebiya Abikele+ wasela bukidibukidi mikate 200, milondo ibidi mikatampe miyule vinyu, ne mikōko itano milongololwe kala, ne bipimo bitano bya sea* bya miseke mikange, ne mikate 100 ya mañanza, ne mikate 200 ya mikuyu miponde, byonso webitenteka pa bampunda.+
19 Kupwa wanena bengidi bandi amba: “Mbadikilei kumeso; nsa kwimulonda.” Ino kasapwidilepo wandi mulume Nabalu kintu nansha kimo.
20 Paadi ukandile pa mpunda wenda utūka koku lūlu lumujike, ponkapo Davida ne bantu bandi nabo badi bāya batūkila dya kwaadi, ebiya webasambakana.
21 Ino Davida wadi unena’mba: “Nalamine bya bitupu bintu byonso bya uno mukwetu mu ntanda mutuputupu. Kekudipo kintu kyandi nansha kimo kyajimine,+ ino aye wanjokejeja bibi ku biyampe.+
22 Leza alonge balwana na Davida* enka namino ne kubweja’ko shi ndeke mwana-mulume* wandi nansha umo mūmi kufika ne ku lubanga.”
23 Abikele pa kumona Davida, watūka pa mpunda lubilo wapona mpala panshi ku meso a Davida, kaevukwila pa nshi.
24 Kupwa wamuponena ku maulu kanena’mba: “A mfumwami, matope ekale pondi; leka’po mwingidi obe mwana-mukaji esambe nobe, kadi ivwana binenwa bya mwingidi obe mwana-mukaji.
25 Nakwisāshila, mfumwami kakita mutyima kudi uno Nabalu+ wa bituputupu, mwanda udi’nka mwikadile dijina dyandi. Dijina dyandi i Nabalu,* kadi kadipo na ñeni. Ino ami, mwingidi obe mwana-mukaji nkyamwenepo bansongwalume ba mfumwami bowatumine.
26 Shi ke pano, a mfumwami, bine ne Yehova byadi mūmi kadi ne byodi* mūmi, i Yehova wakukankaja+ kupya mambo a mashi+ ne kulubula kinongo* na kuboko kobe abe mwine. Balwana nobe ne boba bakimba kusanshija mfumwami bekale pamo bwa Nabalu.
27 Ino pano kino kyabuntu*+ kyobaletela mfumwami kudi mwingidi obe mwana-mukaji, kipebwe bansongwalume balonda mfumwami.+
28 Nakwisāshila, lekela mwingidi obe mwana-mukaji kujilula kwandi, mwanda Yehova ukalongela binebine mfumwami njibo ya myaka na myaka,+ mwanda mfumwami ulwanga malwi a Yehova,+ kadi i kutupu kibi kitenwe modi mafuku obe onso.+
29 Shi muntu waimana kukulondalonda ne kukimba būmi bobe,* būmi bwa* mfumwami bukavungilwa senene mu mufuko wa būmi na Yehova Leza obe, ino būmi bwa* balwana nobe ukebusumbwila kulampe pamo bwa dibwe ditamba mu topito.*
30 Kadi shi Yehova walongela mfumwami bino bintu byonso biyampe byalaile ne kukutonga bu mutangidiji pa Isalela,+
31 kuketopekapo nansha kwialakanya* mu mutyima obe mwanda wa kumwanga mashi pa kubulwa mwanda ne mwanda wa kuleka kuboko kwa mfumwami kulubule kinongo.*+ Shi Yehova walongela mfumwami biyampe, vuluka mwingidi obe mwana-mukaji.”
32 Penepo Davida wanena Abikele amba: “Yehova Leza wa Isalela atendelwe, mwine wakutuma dyalelo’di kunsambakana!
33 Yeselwe dyese ñeni yobe! Kadi weselwe dyese pa kunkankaja dyalelo’di kupya mambo a mashi+ ne kulubula kinongo* na makasa a ami mwine.
34 Shi bitupu, bine ne Yehova Leza wa Isalela byadi mūmi, mwine wankankaja kwimulonga kibi,+ shi kwailepo bukidi kunsambakana,+ longa lubanga’lu kekwadipo kwa kushala mwana-mulume* nansha umo wa Nabalu.”+
35 Pa kino Davida waitabija byaamuletele’bya kamunena’mba: “Kanda ku yobe njibo mu ndoe. Tala, nakwivwana, kadi nsa kulonga byowalomba’byo.”
36 Kupwa Abikele wajokela kudi Nabalu wadi usoba masobo pamo bwa mulopwe mu yandi njibo; Nabalu* wadi musangale kadi mukolwe kolwē. Abikele kamulombwelepo kakintu nansha kamo kufika ne byobwatōkele lubanga.
37 Lubanga, Nabalu pa kutōkwa mu meso, wandi mukaji wamusapwila bino bintu. Ponkapo mutyima wandi waikala pamo bwa mutyima wa muntu mufwe, kadi walāla mūme tē pamo bwa dibwe.
38 Kintu kya mafuku dikumi pa kupita’po, Yehova wakupila Nabalu ne kufwa wafwa.
39 Davida pa kwivwana’mba Nabalu wafu, wanena’mba: “Yehova atendelwe, mwine waunenena+ pa mwanda wa mutonko wa Nabalu,+ ne wakankeje mwingidi wandi kulonga kintu kyo-kyonso kibi,+ kadi Yehova wajokeja bubi bwa Nabalu pa mutwe wandi aye mwine!” Ebiya Davida watuma bantu bakamunenene Abikele ekale wandi mukaji.
40 Penepo bengidi ba Davida baiya kudi Abikele ku Kalamela kebamunena’mba: “Davida wetutume kodi tukusele wikale wandi mukaji.”
41 Nandi waimana ponka na ponka, wevukwila mpala pa nshi kanena’mba: “Umpika obe au keye udi pamo bwa mwingidi wa koija maulu+ a bengidi ba mfumwami.”
42 Kupwa Abikele+ waimana bukidibukidi wakanda pa mpunda wandi koku bengidi bandi bana-bakaji batano bamulonda kunyuma; waenda pamo na mikendi ya Davida, waikala wandi mukaji.
43 Davida wasongele ne Ahinoame+ wa ku Yezelele,+ bano bana-bakaji bonso babidi baikala bandi bakaji.+
44 Ino Solo wapāna Mikale+ wandi mwana mwana-mukaji, mukaja Davida, kudi Paletyi+ mwanā Laishe, wa ku Ngadime.
Kunshi kwa Dyani
^ I kibundi kya mu Yuda; ke Lūlupo lwa Kalamela.
^ Nansha’mba “ndoe ikale nobe.”
^ Kishima pa kishima i, “difuku diyampe.”
^ Sea imo i malitele 7,33 (makwatyi 6,66 a byūmu). Tala Mbwejo B14.
^ Bibwanika padi i, “kudi Davida.”
^ Kishima pa kishima i, “muntu ense usukwila ku lubumbu.” I muneneno wa mu Kihebelu wa kufutulula bana-balume.
^ Ko kushintulula’mba “Wampikwa ñeni; Kivila.”
^ Nansha’mba “kuleta lupandilo.”
^ Nansha’mba “muya obe i.”
^ Kishima pa kishima i, “dyese.”
^ Nansha’mba “muya obe.”
^ Nansha’mba “muya wa.”
^ Nansha’mba “myuya ya.”
^ Nansha’mba “na ditamba mu kaseba ka topito.”
^ Kishima pa kishima i, “kubezemuka nansha kukukala.”
^ Nansha’mba “kulete lupandilo.”
^ Nansha’mba “kuleta lupandilo.”
^ Kishima pa kishima i, “muntu ense usukwila ku lubumbu.” I muneneno wa mu Kihebelu wa kufutulula bana-balume.
^ Kishima pa kishima i, “mutyima wa Nabalu.”
