Samwele Umbajinji 26:1-25
26 Mwenda mafuku bana-balume ba mu Zife+ baiya kudi Solo ku Ngibea,+ kebanena’mba: “Mwene Davida ufyeme pa mukuna wa Hakila udi kampalampala na Yeshimone?”*+
2 Ponkapo Solo wataluka watūkila mu ntanda mutuputupu ya Zife na bana-balume 3 000 batongibwe ba Isalela, bakakimba Davida mu ntanda mutuputupu ya Zife.+
3 Solo watūla nkambi pa mukuna wa Hakila udi kampalampala na Yeshimone, dya ku dishinda. Papo Davida wadi ushikata mu ntanda mutuputupu, waivwana’mba Solo waiya kumukimba mu ntanda mutuputupu.
4 Ebiya Davida watuma tubedibedi tukajingulule shi na bubine Solo i mwiye.
5 Kupwa Davida waenda pene padi patūdile Solo nkambi, penepo Davida wamona pene padi palēle Solo ne Abinele+ mwanā Nele, mukata wa kibumbo kyandi kya divita; Solo wadi ulēle mu bukata mwa nkambi koku bibumbo bya basola bimwelele mu bukata.
6 Kupwa Davida wanena Ahimeleke mwine Hiti+ ne Abishai+ mwanā Zeluya,+ mwanabo na Yoabe amba: “I ani usa kutūkila nami mu nkambi kudi Solo?” Abishai walondolola’mba: “Nsa kutūka nobe.”
7 Penepo Davida ne Abishai batwela bufuku mu bibumbo bya basola, batana Solo ulēle mu bukata mwa nkambi, mukobe wandi mushimike pa nshi dya ku mutwe wandi; Abinele ne bibumbo bya basola badi balēle bamwelele mu bukata.
8 Penepo Abishai wanena Davida amba: “Dyalelo Leza wapāna walwana nobe mu kuboko kobe.+ Shi ke pano, nakwisāshila, leka mubambakenye pa nshi na mukobe musunsa umo’tu, nkisapo kulonga’kyo misunsa ibidi.”
9 Ino Davida wanena Abishai amba: “Kokimulonga kibi, mwanda i ani ubwanya kutulula kuboko kwandi padi mushingwe māni wa Yehova+ waikala wampikwa mambo?”+
10 Davida wanena monka’mba: “Bine ne Yehova byadi mūmi, Yehova aye mwine ukamwipaya,+ nansha difuku dyandi pa kufika+ usa kufwa, pakwabo kadi usa kutūkila ku bulwi wafwila konka.+
11 Kebibwanikapo mungya mumweno wa Yehova ami kutulula kuboko kwami padi mushingwe māni wa Yehova!+ Shi ke pano, nakwisāshila, sela mukobe udi dya ku mutwe wandi ne kalondo ka mema twende.”
12 Ebiya Davida wasela mukobe ne kalondo ka mema byadi dya ku mutwe wa Solo, baenda. I kutupu muntu webamwene+ nansha kwibajingulula nansha kubūka kwine, mwanda bonso badi balēle, ke-pantu badi baponenwe na tulo tukatampe tutamba kudi Yehova.
13 Kupwa Davida waenda bukila bukwabo waimana pa nsongo ya lūlu dya kulampe, besonsoloke nabo kyaba kilampe.
14 Davida waela mabila ku bibumbo bya basola ne kudi Abinele+ mwanā Nele amba: “A Abinele, le kulondololapo?” Abinele walondolola’mba: “Abe wi ani wela mulopwe mabila?”
15 Davida wanena Abinele amba: “Mwene wi mwana-mulume? Le i ani udi pamo bwa abe mu Isalela? Penepo mwanda waka kulaminepo mfumobe mulopwe? Mwanda sola umo watwelanga kwipaya mfumobe mulopwe.+
16 Ke biyampepo byowalonga’byo. Bine ne Yehova byadi mūmi, mufwaninwe kufwa mwanda kemulaminepo mfumwenu mushingwe māni wa Yehova.+ Shi ke pano, tala koku ne koku! Le mukobe wa mulopwe ne kalondo ka mema+ byadi dya ku mutwe wandi bidi kwepi?”
17 Ebiya Solo wajiula diwi dya Davida kanena’mba: “Lelo dyadyo i dyobe diwi, a wami mwana Davida?”+ Davida walondolola’mba: “I dyami diwi abe mfumwami mulopwe.”
18 Wabweja’ko amba: “Mwanda waka mfumwami ulondalonda mwingidi wandi,+ le i bika byonongele, ne i mambo’ka ompile?+
19 Nakwisāshila, mfumwami mulopwe ateje binenwa bya mwingidi wandi: Shi i Yehova ukutonona undwe, nabya etabije* kyamulambu kyami kya miseke. Ino shi i bantu bakutonona,+ nabya i bafingwe mafingo ku meso a Yehova, mwanda dyalelo abampangila kulampe ndeke kwikala pamo na bupyani bwa Yehova,+ kebanena’mba, ‘Enda, kengidile baleza bangi!’
20 Nanshi kokaleka mashi ami amwangikile pa nshi kulampe na mpala ya Yehova, mwanda mulopwe wa Isalela waenda kukakimba’tu kīshi kitwa bu lukupa,+ pamo bwa aye upanga nkwadi mu ngulu.”
21 Solo nandi wamutentulula’mba: “Napi mambo.+ Joka abe wami mwana Davida, mwanda nkisapo kukulonga kibi monka, ke-pantu wadi ubamone amba būmi* bwami i bulēme+ dyalelo’di. Bine, nalonga bya bulembakane kadi nalonga kilubo kikatampe bya mwiko.”
22 Davida watentulula’mba: “Mukobe wa mulopwe au keo. Nena nsongwalume umo akande asele’o.
23 I Yehova ukafuta muntu ense mwendele boloke+ bwandi ne kikōkeji kyandi, mwanda dyalelo Yehova wakupānanga mu kuboko kwami, ino ami nkyadipo nsaka kutulula kuboko kwami padi mushingwe māni wa Yehova.+
24 Tala! Monka mwaikadilanga būmi bobe* na bulēme kondi dyalelo’di, mo monka būmi* bwami nabo bwikale bulēme ku meso a Yehova, kadi anyongolole mu tusua tonso.”+
25 Solo watentulula Davida amba: “Weselwe dyese, abe wami mwana Davida. Na bubine usa kulonga bintu bikatampe, kadi na bubine usa kunekenya.”+ Kupwa Davida waenda, Solo nandi wajokela ku kifuko kyandi.+
Kunshi kwa Dyani
^ Bibwanika padi i, “mu ntanda mudi zolē; mu ntanda mutuputupu.”
^ Kishima pa kishima i, “alule luvumba.”
^ Nansha’mba “muya.”
^ Nansha’mba “muya obe.”
^ Nansha’mba “muya.”
