Samwele Umbajinji 28:1-25
-
Solo waenda kudi muntu ubukanga na bibanda ku Ene-Dola (1-25)
28 Mu mene mafuku’a bene Fidishitia bakongela pamo bibumbo byabo bya divita mwanda wa kulwa na Isalela.+ Ebiya Akishi wanena Davida amba: “Na bubine uyukile amba abe ne bantu bobe musa kwenda nami ku bulwi.”+
2 Davida nandi watentulula Akishi amba: “Uyukile biyampe bisa kulonga mwingidi obe.” Akishi wanena Davida amba: “Kyo kine kyonsa kukutongela bu mulami wa kundama nyeke.”*+
3 Ino Samwele wadi ke mufwe, kadi Isalela yense wamudidile ne kumujīka mu kyabo kibundi kya Lama.+ Kadi Solo watalwile babuka na bibanda ne bilumbu mu ntanda’ya.+
4 Bene Fidishitia bekongela pamo, kupwa baenda batūla nkambi mu Shuneme.+ Solo nandi wakongela Isalela yense pamo, batūla nkambi mu Ngidiboa.+
5 Solo pa kumona nkambi ya bene Fidishitia wakwatwa moyo, mutyima keumuzakala bininge.+
6 Nansha Solo byaadi wipangula Yehova,+ ino Yehova kadipo umulondolola nansha dimo, ekale mu bilotwa nansha na Udimi+ nansha ke ku bapolofeto kwine.
7 Ku mfulo Solo wanena bengidi bandi amba: “Nkimbilei’ko mwana-mukaji ubukanga na bibanda,+ ñende nkamwipangule.” Bengidi bandi bamutentulula’mba: “Tala! Kudi mwana-mukaji umo ubukanga na bibanda mu Ene-Dola.”+
8 Penepo Solo weinanya, wavwala bivwalwa bingi waenda bufuku kudi mwana-mukaji’wa na bantu bandi babidi. Kanena’mba: “Nakwisāshila, longa majende ne kubuka na bibanda,+ ntambijije yewa onsa kukulombola.”
9 Ino mwana-mukaji’wa wamunena’mba: “Abe mwine uyukile byalongele Solo, mwaatalwidile babuka na bibanda ne bilumbu mu ino ntanda.+ Penepa mwanda waka usaka kunta* dikinga mwanda wa kungipaija?”+
10 Penepo Solo wamutyipila mu dijina dya Yehova amba: “Bine ne Yehova byadi’ko mūmi, kusapo kupya mambo nansha amo mu uno mwanda!”
11 Ebiya mwana-mukaji wanena’mba: “Le nkulupwile ani?” Nandi amba: “Ndupwile Samwele.”
12 Mwana-mukaji pa kumona’tu “Samwele,”*+ waela lwanji na diwi dyandi dyonso kanena Solo amba: “Kyowaundimbila i kika? Mwene wi Solo!”
13 Mulopwe wamunena’mba: “Kokakwatwa moyo, ino ubamone bika?” Mwana-mukaji walondolola Solo amba: “Namone muntu umo udi bwa leza ukanda utamba panshi.”
14 Ponkapo wamwipangula’mba: “Le udi namani?” nandi amba: “I mununu umo ukanda, uvwele kotyi wampikwa maboko.”+ Penepo Solo wajingulula’mba i “Samwele,” ponkapo wafukata mpala pa nshi bininge kaevukwila.
15 Kupwa “Samwele” wanena Solo amba: “Kyowaunkambakenya i kika na kunena bantambije?” Solo walondolola’mba: “Ndi mu makambakano makomo. Bene Fidishitia balwanga nami, kadi Leza wandeka kakinondololangapo, ekale ku bapolofeto nansha mu bilotwa;+ o mwanda mwine nakwite unombole byomfwaninwe kulonga.”+
16 Ebiya “Samwele” watentulula’mba: “Kyoungipangwila i kika pano pakuleka+ Yehova, waikala ke kinkwa nobe?
17 Yehova usa kulonga enka mwaalaile kupityila kondi amba: Yehova ukasana bulopwe ebutalule mu kuboko kobe ape’bo mukwenu umo, ke Davida kadi.+
18 Mwanda kwakōkelepo diwi dya Yehova kadi kwafikidijepo bulobo bwandi budyendyemuka pa bene Amaleke,+ o mwanda Yehova wakulonga kino dyalelo’di.
19 Kadi Yehova usa kupāna Isalela ne abe mwine mu makasa a bene Fidishitia,+ kesha’di abe+ ne bobe bana+ musa kwikala nami. Kadi Yehova usa kupāna kibumbo kya divita kya Isalela mu makasa a bene Fidishitia.”+
20 Ponkapo Solo wapona pa nshi mutamuke ntā, wakwatwa moyo bininge mwanda wa binenwa bya “Samwele.” Kashelepo na bukomo nansha butyetye, mwanda kadilepo kakudya nansha kamo dyuba dyonso ne bufuku bonso.
21 Mwana-mukaji pa kwiya kwadi Solo ne kumona’mba wadi muvutakanibwe bininge, wamunena’mba: “Tala mwingidi obe wakōkelanga byowanenanga, kadi natūlanga būmi bwami mu kyaka*+ ne kulonga byowanombolanga.
22 Shi ke pano, nakwisāshila, teja’po bikunena mwingidi obe. Leka nkutūdile kipindi kya mukate; kupwa udye amba umone’ko bukomo mwa kwendela.”
23 Ino aye wapela’mba: “Nkisapo kudya.” Inoko bengidi bandi ne mwana-mukaji bamuzenza’nka kumuzenza. Ku mfulo webevwana, wabūka pa nshi washikata pa kitanda.
24 Mwana-mukaji wadi na kyana kya ñombe kinune mu njibo, penepo wekitapa* bukidibukidi, wayata bukula wavuba’bo kupwa walonga nabo mikate yampikwa kiyujo.
25 Wapa’byo Solo ne bengidi bandi badya. Kupwa bataluka, baenda bwine bufuku’bwa.+
Kunshi kwa Dyani
^ Kishima pa kishima i, “bu mulami wa mutwe wami mafuku onso.”
^ Nansha’mba “kuta muya wami.”
^ Nansha’mba “kyokya kyadi kimweka bu Samwele.”
^ Nansha’mba “nasela muya wami mu dikasa dyami.”
^ Nansha’mba “wekilambula bu kitapwa.”
