Samwele Umbajinji 29:1-11
-
Bene Fidishitia kebakulupilepo Davida (1-11)
29 Bene Fidishitia+ bakongela pamo bibumbo byabo byonso bya divita ku Afeke, papo bene Isalela batūdile nkambi dya ku nsulo ya mema mu Yezelele.+
2 Ebiya bamfumu ba bene Fidishitia badi bapita mungya tutwa twabo ne tununu twabo, Davida ne bantu bandi nabo badi bapita balonda kunyuma na Akishi.+
3 Ino bamfumu ba bene Fidishitia baipangula’mba: “I kika kyaila bano Bahebelu kuno?” Akishi walondolola bamfumu ba bene Fidishitia amba: “Uno i Davida, mwingidi wa Solo mulopwe wa Isalela, udi nami pano kepadi mwaka umo ne kupita.+ Nkimwenepo kabi nansha kamo mwadi tamba difuku dyaanyemēne kondi kufika ne dyalelo.”
4 Penepo bamfumu ba bene Fidishitia bamufītyilwa mutyima, kebamunena’mba: “Jokeja uno muntu.+ Mujokeje ku kifuko kyowamupēle. Kokamuleka atūkile netu ku bulwi kutyina’mba waketwalamukila mu bulwi.+ Mwanda le i muswelo’ka muyampe wabwanya kukimba kutōkelwa mutyima na mfumwandi shi ke’nkapo na mitwe ya bana-balume betu’ba?
5 Mwene uno ye Davida obadi bembila koku baja, amba:
‘Solo waipaya twandi tununu,Davida nandi andi makumi a tununu’?”+
6 Ebiya Akishi+ waityija Davida kamunena’mba: “Bine ne Yehova byadi mūmi, abe wi moloke swā, ami nsangedile kwenda nobe ku bulwi na kibumbo kyami kya divita,+ mwanda nkimwenepo kabi nansha kamo kodi tamba difuku dyowaile kwami kufika ne dyalelo.+ Ino bamfumu kebakukulupilepo.+
7 Nanshi joka mu ndoe, kokalonga kintu nansha kimo kya kufītyija bamfumu ba bene Fidishitia mutyima.”
8 Ino Davida wanena Akishi amba: “Mwanda waka, kyonalonga kine i kika? I kibi’ka kyowatana mudi mwingidi obe tamba difuku dyonaile kodi kufika ne dyalelo? Le kyonkyendelapo nobe kukalwa balwana na mfumwami mulopwe i kika le?”
9 Akishi walondolola Davida amba: “Mungya mumweno wami, wi muyampe pamo’nka bwa mwikeulu wa Leza.+ Ino bamfumu ba bene Fidishitia abanena’mba, ‘Kokamuleka akande netu mu bulwi.’
10 Shi ke pano būka lubanga futwi na bengidi ba mfumobe bowaile nabo; taluka wende lubanga futwi shi pabatōka’tu.”
11 Penepo Davida ne bantu bandi bataluka lubanga futwi bajokela ku ntanda ya bene Fidishitia, ino bene Fidishitia bakandila ku Yezelele.+
