Samwele Umbajinji 3:1-21
-
Samwele waitwe ekale mupolofeto (1-21)
3 Mu kine kitatyi’kya, mwanuke Samwele wadi wingidila+ Yehova ku meso a Edi, ino kinenwa kitamba kudi Yehova kyadi ke kisakane mu mene mafuku’a; bimonwa+ kebyadipo bisambakene konsokonso.
2 Difuku dimo Edi wadi ulēle pa kifuko kyandi kya nyeke, kadi meso andi adi keadi na kafi; kadipo ukibwanya kumona.+
3 Kinanu kya Leza+ kyadi kekyabudile, kadi Samwele wadi ulēle mu tempelo*+ ya Yehova, mwine mwadi Sanduku wa Leza.
4 Penepo Yehova waita Samwele. Nandi waitaba’mba: “Kalombo.”
5 Waenda lubilo kudi Edi kanena’mba: “Ami uno, mwanda ubangite.” Ino aye amba: “Nkikwityilepo. Kalāle monka.” Penepo nandi waenda wakalāla.
6 Yehova waita monka’mba: “Samwele!” Ponkapo Samwele wabūka waenda kudi Edi kanena’mba: “Ami uno, mwanda ubangite.” Ino aye amba: “Nkikwityilepo, a wami mwana. Kalāle monka.”
7 (Ino Samwele wadi kayukidije Yehova, kadi kinenwa kya Yehova kyadi kekyamusokwedilwe.)+
8 Ebiya Yehova waita monka musunsa wa busatu amba: “Samwele!” Penepo nandi wabūka waenda kudi Edi kanena’mba: “Ami uno, mwanda ubangite.”
Ebiya Edi wajingulula’mba i Yehova wita mwanuke’u.
9 Penepo Edi wanena Samwele amba: “Enda ukalāle, shi wakwite ufwaninwe kunena’mba, ‘Nena, a Yehova, mwanda mwingidi obe wivwene.’” Penepa Samwele waenda wakalāla pa kifuko kyandi.
10 Yehova waiya waimana ponka’pa, kupwa waita’nka mwaadi wityila misunsa mikwabo amba: “Samwele, Samwele!” Samwele nandi wanena’mba: “Nena, mwanda mwingidi obe wivwene.”
11 Yehova wanena Samwele amba: “Tala! Noñanga kintu mu Isalela, muntu ense wikivwana matwi andi onso abidi akatenda.+
12 Mu dine difuku’dya nkafikidija padi Edi bintu byonso byonanenene pa njibo yandi, tamba ku ngalwilo ne ku mfulo.+
13 Ufwaninwe kumulombola’mba ndetanga butyibi bwa myaka na myaka pa njibo yandi pa mwanda wa kilubo kyayukile,+ mwanda bandi bana bafiñanga Leza,+ ino aye kwibafunina mpika.+
14 O mwanda natyipīle njibo ya Edi amba kilubo kya njibo ya Edi kekikapūtwapo nansha dimo na bitapwa nansha na byamulambu.”+
15 Samwele walāla kufika ne ku lubanga; kupwa washitula bibelo bya njibo ya Yehova. Samwele wadi na moyo wa kusapwila Edi kimonwa’kya.
16 Ino Edi waita Samwele amba: “Samwele, wami mwana!” Nandi waitaba’mba: “Kalombo.”
17 Wamwipangula’mba: “Wakusapwilanga musapu’ka? Nakwisāshila, kokamfinda’o. Leza akulongele monka ne kubweja’ko shi umfinde nansha’tu kishima kimo mu byonso byaakulombolanga.”
18 Ebiya Samwele wamulombola bintu byonso, kadi kamufindilepo kakintu nansha kamo. Edi wanena’mba: “I Yehova. Alonge byobya byamona bu biyampe ku meso andi.”
19 Samwele wadi wenda utama, ne Yehova mwine wadi nandi+ kadi kalekelepo kinenwa kyandi nansha kimo kileke kufikidila.*
20 Isalela ense tamba ku Dani kutūla ne ku Bela-Sheba wayuka amba Samwele watūlwa bu mupolofeto wa Yehova.
21 Kadi Yehova wadi kamweka nyeke mu Shilo, mwanda Yehova wadi wimwekeja kudi Samwele mu Shilo kupityila ku kinenwa kya Yehova.+