Samwele Umbajinji 30:1-31
30 Davida ne bantu bandi pa kufika ku Zikelake+ mu difuku dya busatu, bene Amaleke+ baile kutamba’dyo kunshi* ne mu Zikelake, kadi batambile ne Zikelake bulwi, bamusōka na mudilo.
2 Baselele bana-bakaji+ ne bonso badi’mo bu misungi, kushilwila ku mutyetye bininge kutūla ne ku mukatampe bininge. Kebaipailepo muntu nansha umo, ino bebaselele baenda nabo.
3 Davida ne bantu bandi pa kufika mu kibundi, batana bekisōke, kadi babo bakaji ne babo bana bana-balume ne babo bana bana-bakaji baselwe bu misungi.
4 Ebiya Davida ne bana-balume baadi nabo bashilula kudila bininge enka ne byokebashelepo na bukomo nansha bumo bwa kudila.
5 Ne bakaji babidi ba Davida bene baselelwe bu misungi, ba Ahinoame wa ku Yezelele ne Abikele mukaji wa kishala wa Nabalu mwine Kalamela.+
6 Davida wajingilwe mutyima bininge, mwanda bantu badi banena kumwasa mabwe, ke-pantu bantu bonso* badi na bululu bukatampe pa kujimija babo bana bana-balume ne bana-bakaji. Ino Davida wekomeja na bukwashi bwa Yehova Leza wandi.+
7 Penepo Davida wanena kitobo Abiatala+ mwanā Ahimeleke amba: “Leta’po bidi Efoda kuno.”+ Ebiya Abiatala waletela Davida Efoda.
8 Davida waipangula Yehova+ amba: “Le nkalonde kino kibumbo kya bañonaona? Lelo nsa kwibapeta?” Ebiya Nandi wamulondolola’mba: “Kebalonde, mwanda usa kwibapeta binebine, kadi usa kukūla byobaselele.”+
9 Ponka na ponka Davida wataluka na bana-balume 600+ baadi nabo, baenda kufika ne ku Kinekaneka* kya Besole, kwine kwakashele bana-balume bamo.
10 Davida waendelela kwibalonda na bana-balume 400, ino bana-balume 200 bakōkele bininge pa kwabuka Kinekaneka kya Besole bashala kunyuma.+
11 Batana muntu umo mwine Edipito mu ntanda, baenda nandi kudi Davida. Bamupa byakudya ne mema a kutoma,
12 ne kibese kya mukate wa mikuyu miponde ne mikate ibidi ya mañanza. Aye pa kupwa kudya, wajokeja bukomo* mwanda wadi kadile kakudya nansha kutoma mema kwine mafuku asatu dyuba ne bufuku.
13 Ino Davida wamwipangula’mba: “Le wi wa ani, ne kotamba i kwepi?” nandi walondolola’mba: “Ne mwingidi mwine Edipito, umpika wa muntu umo mwine Amaleke, ino mfumwami waunshile mwanda nabelele pano kepadi mafuku asatu.
14 Twatambile’dyo kunshi* kwa bene Keleta+ ne ntanda ya Yuda ne kunshi* kwa Kalebu,+ kadi twasōkele Zikelake na mudilo.”
15 Penepo Davida wamwipangula’mba: “Le usa kuntwala kudi kino kibumbo kya bañonaona?” Nandi amba: “Shi untyipile mu dijina dya Leza amba kusapo kungipaya ne amba kusapo kumpāna mu makasa a mfumwami, nabya nsa kukutwala ku kino kibumbo kya bañonaona.”
16 Ebiya wamutwala kwine kobadi bakusankene koku ne koku mu ntanda’ya, badya batoma ne kusoba masobo pa mwanda wa bitūtwa bivule byonso byobaselele mu ntanda ya bene Fidishitia ne mu ntanda ya Yuda.
17 Penepo Davida webepaya tamba lubanga pakifīta kutūla ne ku kyolwa kikwabo; i kutupu muntu wanyemene+ poso’nka bana-balume 400 bo bakandile pa bangamedia banyema.
18 Davida wajokeja byonso byaselele bene Amaleke,+ kadi Davida wakūla ne bandi bakaji babidi.
19 Kekwadipo kintu kyabo nansha kimo kyajimine, tamba ku kityetye bininge kutūla ne ku kikatampe bininge. Bajokeja babo bana bana-balume ne bana-bakaji ne bitūtwa;+ Davida wajokeja bintu byonso byobaselele.
20 Ebiya Davida wayata mikōko yonso ne bañombe bonso, byobaendeje kumeso kwa luombe lwabo. Kebanena’mba: “Bino i bitūtwa bya Davida.”
21 Penepo Davida wafika kokwa kwadi bana-balume 200 bakōkele kwenda na Davida bashala mu Kinekaneka kya Besole,+ nabo batamba kusambakana Davida ne bantu bandi. Davida pa kufwena kwadi bano bantu, webepangula shi badi biyampe.
22 Inoko, bantu bonso babi ne ba bitupu mu boba baendele na Davida banena’mba: “Byokebaendelepo netu, ketusapo kwibapa kitūtwa nansha kimo kyotwajokeja poso kupa muntu ne muntu wandi mukaji ne bandi bana ende.”
23 Ino Davida wanena’mba: “A banabetu, kemufwaninwepo kulonga nankyo na byetupa Yehova. Aye wetulamine ne kupāna mu kuboko kwetu kibumbo kya bañonaona kyaile kwitulwa.+
24 Le i ani usa kwimwitabijija kino? Bintu bikapebwa yewa waendele ku bulwi bikekala pamo ponka na bikapebwa yewa washele ushikete ku bintu.+ Bonso bakapebwa bintu pamo.”+
25 Tamba mu dine difuku’dya, watūdidila kino bu musoñanya ne bu kijila pa Isalela kufika ne dyalelo.
26 Davida pa kujokela ku Zikelake, watuma bitūtwa bimo kudi bakulumpe ba Yuda badi balunda nandi, kanena’mba: “Kino i kyabuntu* kyenu kya mu bitūtwa bya balwana na Yehova.”
27 Webituma ku boba badi mu Betele,+ ku boba badi mu Lamote wa Nengeba,* ku boba badi mu Yatilu,+
28 ku boba badi mu Aloele, ku boba badi mu Shifemote, ku boba badi mu Eshetemoa,+
29 ku boba badi mu Lakale, ku boba badi mu bibundi bya bene Yelamele,+ ku boba badi mu bibundi bya bene Kena,+
30 ku boba badi mu Holama,+ ku boba badi mu Bolashane, ku boba badi mu Atake,
31 ku boba badi mu Hebelona,+ ne ku bifuko byonso byapityile’ko Davida ne bantu bandi.
Kunshi kwa Dyani
^ Nansha’mba “Nengeba.”
^ Nansha’mba “ke-pantu myuya ya bantu bonso.”
^ Tala Nshintulwilo ya Bishima.
^ Kishima pa kishima i, “mushipiditu wandi wamujokela.”
^ Nansha’mba “Nengeba.”
^ Nansha’mba “Nengeba.”
^ Kishima pa kishima i, “dyese.”
^ Nansha’mba “kunshi.”
