Samwele Umbajinji 4:1-22
4 Kadi kinenwa kya Samwele kyasambakana mu Isalela ense.
Penepa Isalela watamba kukasambakana bene Fidishitia mu bulwi; batūla nkambi kubwipi na Ebenezele, ino bene Fidishitia badi batūdile nkambi ku Afeke.
2 Penepa bene Fidishitia bepanga mu milongo ya bulwi mwanda wa kwisambakana na Isalela, ino bulwi bwapita bibi kadi Isalela wanekenibwa na bene Fidishitia, bene baipaile kintu kya bana-balume 4 000 kokwa kobadi balwila mu ntanda.
3 Bantu pa kujokela ku nkambi, bakulumpe ba Isalela banena’mba: “Mwanda waka Yehova waleka tunekenibwe* dyalelo na bene Fidishitia?+ Tuselei sanduku wa kipwano kya Yehova mu Shilo,+ amba ekale netu etupandije ku makasa a balwana netu.”
4 Ebiya bantu batuma bana-balume ku Shilo, nabo basela’ko sanduku wa kipwano kya Yehova wa bibumbo ushikete pa lupona peulu* pa bakelubi.+ Ne bana babidi ba Edi, ba Hofini ne Finease+ nabo badi’ko pamo ne sanduku wa kipwano kya Leza wa bine.
5 Sanduku wa kipwano kya Yehova pa kutwela’tu mu nkambi, bene Isalela bonso batuta kyungwe kikatampe ne ntanda yajina.
6 Bene Fidishitia pa kwivwana lunwa lwa kyungwe’kya, kebeipangula’mba: “Mwanda waka mu nkambi ya Bahebelu mudi kyungwe kikatampe namino?” Mfulo mfulō bayuka’mba i Sanduku wa Yehova watwelanga mu nkambi.
7 Bene Fidishitia bakwatwa moyo, kebanena’mba: “Leza watwela mu nkambi!”+ Ebiya banena’mba: “I kya bulanda mpata kotudi, mwanda kashā kekwalongekele kintu na kino!
8 I kya bulanda mpata kotudi! Le i ani uketupandija mu makasa a uno Leza mukatampe? Uno i Leza wakubije Edipito na kwibepaya mu miswelo palapala mu ntanda mutuputupu.+
9 Banwe bene Fidishitia kankamanai ne kulonga bintu bwa bana-balume, kutyina’mba mwakengidila Bahebelu monka mobemwingidile.+ Longai bintu bwa bana-balume kadi lwai!”
10 Penepo bene Fidishitia balwa, ino Isalela wanekenibwa,+ kadi muntu ne muntu wanyemena ku pema wandi. Bantu batapilwe, ke kutapa i kukunya; ku mutamba wa Isalela kwaponene basola ba lwa nshi 30 000.
11 Kadi Sanduku wa Leza wakwatwa, ne bana babidi ba Edi, ba Hofini ne Finease bafwa.+
12 Muntu umo mwine Benjemani wanyema lubilo tamba kobadi balwila wafika ku Shilo enka mu dine difuku’dya na bivwalwa bisanike ne luvumbi ku mutwe.+
13 Kitatyi kyafikile muntu’wa, Edi wadi ushikete mu kityi dya ku dishinda utala, mwanda mutyima wandi wadi uzakala pa mwanda wa Sanduku wa Leza wa bine.+ Muntu’wa watwela mu kibundi wasapula myanda, ponkapo kibundi kyonso kyashilula kudila.
14 Edi pa kwivwana lunwa lwa kudila, waipangula’mba: “Le luno lunwa lwa lupotopoto i lwa’ka?” Mwine muntu’wa wapēja bukidi, wasapwila Edi myanda’ya.
15 (Ino Edi wadi na myaka 98, kadi meso andi adi matolomoke, kadipo ukibwanya kumona.)+
16 Ebiya muntu’wa walombola Edi amba: “Ami ye utamba kwadi kulwilwa! Nanyema’nka dyalelo’di kwadi kulwilwa.” Penepo nandi wamwipangula’mba: “Le byadi namani, a wami mwana?”
17 Ebiya yewa waile na myanda’wa wamusapwila’mba: “Isalela wanyema bene Fidishitia, kadi bantu abanekenibwa bininge;+ ne bobe bana babidi, ba Hofini ne Finease nabo abafu,+ kadi ne Sanduku wa Leza wa bine nandi wakwatwa.”+
18 Aye’tu pa kutela Sanduku wa Leza wa bine, Edi wapona kyādi paadi ushikete dya ku kibelo, nshingo yandi yatyumuka ne kufwa wafwa, mwanda wadi ke mununu kadi wadi kalēma. Watyibīle Isalela mambo mu myaka 40.
19 Muko wandi, mukaja Finease, wadi na dīmi kadi wadi kubwipi na kubutula. Aye pa kwivwana musapu amba Sanduku wa Leza wa bine wakwatwa, ne amba shandi muko ne wandi mulume abafu, penepo wetonta, bisanso byamukwata mu kitulumukila ne kubutula wabutula.
20 Aye paadi kafu, bana-bakaji badi bemene kubwipi nandi banena’mba: “Kokikwatwa moyo, mwanda ubabutula mwana mwana-mulume.” Ino aye kulondolola mpika nansha kuta’ko mutyima kwine.*
21 Ino wainika mwana bu Ikabode,*+ kanena’mba: “Ntumbo ibaselwa mu Isalela ibaenda bu musungi,”+ wadi ulanga kukwatwa kwa Sanduku wa Leza wa bine ne byafikīle shandi muko ne wandi mulume.+
22 Wanenene amba: “Ntumbo ibaselwa mu Isalela ibaenda bu musungi, mwanda Sanduku wa Leza wa bine wakwatwa.”+
Kunshi kwa Dyani
^ Kishima pa kishima i, “Mwanda waka Yehova wetunekenya?”
^ Bibwanika padi i, “pa bukata.”
^ Nansha’mba “katūdile’kopo mutyima wandi.”
^ Ko kushintulula’mba “Le Ntumbo Idi Kwepi?”
