Samwele Umbajinji 5:1-12
5 Bene Fidishitia pa kukwata Sanduku+ wa Leza wa bine, bamusela tamba ku Ebenezele kufika ne ku Ashedoda.
2 Bene Fidishitia basela Sanduku wa Leza wa bine bamutweja mu njibo* ya Dakona, bamutūla kubwipi na Dakona.+
3 Bene Ashedoda pa kubūka kesha lubanga futwi, batana Dakona mupone pa nshi bukuvumane ku meso a Sanduku wa Yehova.+ Penepa batekuna Dakona bamujokeja pa kifuko kyandi.+
4 Abo pa kubūka lubanga futwi difuku dilonda’ko, batana Dakona mupone pa nshi bukuvumane ku meso a Sanduku wa Yehova. Mutwe wa Dakona ne bikasala bya maboko onso abidi bikete bilēle pa lukala lwa pa kibelo. Enka kipindi kidi pamo bwa mwita wa lui* kyo kyashele kikunkane.
5 O mwanda kufika ne dyalelo, babitobo ba Dakona ne bonso batwelanga mu njibo ya Dakona kebanyatangapo pa lukala lwa pa kibelo lwa Dakona mu Ashedoda.
6 Kuboko kwa Yehova kwalēmena bene Ashedoda, webonakanya na kumeneja bantu nzadi+ mu Ashedoda ne mu matanda andi mene.
7 Bantu ba Ashedoda pa kumona byobya byadi bilongeka, banena’mba: “Kemwakilekai Sanduku wa Leza wa Isalela ekale netu, mwanda kuboko kwandi kubetusanshija bibibibi batwe ne leza wetu Dakona mwine.”
8 Ponkapo batuma bantu, bakongakanya bamfumu bonso ba bene Fidishitia kebebepangula’mba: “Le tusa kulonga namani na Sanduku wa Leza wa Isalela?” Nabo bebalondolola’mba: “Tundulwilai Sanduku wa Leza wa Isalela ku Ngata.”+ Ebiya batundulwila’ko Sanduku wa Leza wa Isalela.
9 Abo pa kupwa kumutundulwila’ko, kuboko kwa Yehova kwaalamukila kibundi, webazakaja bininge. Wakupila bantu ba mu kibundi, batyetye ne bakatampe bene, ne nzadi yebamena.+
10 Penepo batuma Sanduku wa Leza wa bine ku Ekalone,+ ino Sanduku wa Leza wa bine pa kufika’tu ku Ekalone, bene Ekalone bashilula kudila’mba: “Abetuletela Sanduku wa Leza wa Isalela mwanda wa kwitwipaya batwe ne bantu betu bene!”+
11 Kupwa batuma bantu, bakongakanya bamfumu bonso ba bene Fidishitia kebanena’mba: “Talulai Sanduku wa Leza wa Isalela; mujokejei ku kifuko kyandi kutyina’mba batwe ne bantu betu twakafwa.” Mwanda moyo wa lufu wasambakene mu kibundi monso; kadi kuboko kwa Leza wa bine kwalēmene bininge kwine’kwa,+
12 kadi boba kebafwilepo bamenenwe na nzadi. Penepo kwabija kwa kibundi kwakanda kufika ne mūlu.