Samwele Umbajinji 6:1-21
-
Bene Fidishitia abajokeja Sanduku ku Isalela (1-21)
6 Sanduku+ wa Yehova wadi mu ntanda ya Fidishitia myeji isamba-ibidi.
2 Bene Fidishitia baita babitobo ne bambuki+ kebebepangula’mba: “Le i bika byotufwaninwe kulonga na Sanduku wa Yehova? Mwitulombolei motufwaninwe kumutumina ku kifuko kyandi.”
3 Balondolola’mba: “Shi kemutume sanduku wa kipwano kya Yehova Leza wa Isalela, kemukimujokejai kwa kubulwa kyamulambu.+ Mufwaninwe’nka kumujokejeja’ye na kyamulambu kya mambo. Enka namino mukakoma kadi mukalombolwa kine kekitalukilapo kuboko kwandi pomudi.”
4 Penepa baipangula’mba: “I kyamulambu’ka kya mambo kyotufwaninwe kumutumina?” Nabo batentulula’mba: “Mungya buvule bwa bamfumu ba bene Fidishitia,+ tumai nzadi itano ya olo ne bampuku batano ba olo,* mwanda kino kimpengele kimo kyonka i kiponene muntu ense momudi ne bamfumu benu bene.
5 Mufwaninwe kulonga byelekejo bya nzadi ne byelekejo bya bampuku+ bene baonakanya ntanda, kadi mufwaninwe kulēmeka Leza wa Isalela. Padi ukapēleja’ko bulēmi bwa kuboko kwandi kwatūdile pomudi ne padi leza wenu ne pa ntanda yenu.+
6 I kika kyomūmijija mityima yenu pamo bwa Edipito ne Felo bāūmije mityima yabo?+ Kitatyi Kyaebasanshije,+ banenwe’nka kutambija Isalela ende, nabo baenda.+
7 Shi ke pano teakanyai dikalo dipya ne bañombe babidi badi na twana kebakutyilwe kashā mu lupungu. Penepa kutyilai bañombe ku dikalo, ino twabo twana mwitujokejei ku njibo, kulampe nabo.
8 Yatai Sanduku wa Yehova mumutenteke pa dikalo, kadi byelekejo bya olo byomumutumina bu kyamulambu kya mambo, tūlai’byo mu kasanduku kubwipi nandi.+ Kupwa mutumei ende
9 ne kutala: Shi wakandila mu dishinda dyenda ku Bete-Shemeshe,+ ku ntanda yandi, nabya i aye wetulonga kino kintu kibi mpata. Ino shi kakandilepo dine’dya, tusa kuyuka’mba ke kuboko kwandipo kwetukupila; kibetufikila’tu akyo kine.”
10 Bantu balongela monka. Basela bañombe babidi badi na twana bebakutyila ku dikalo, ino twana betushityila mu njibo.
11 Kupwa batūla Sanduku wa Yehova pa dikalo, ne kasanduku kadi’mo bampuku ba olo ne byelekejo bya nzadi yabo.
12 Penepo bañombe baenda bolokele mu dishinda dyenda ku Bete-Shemeshe.+ Badi’nka mu dishinda dikatampe dimo dyonka, benda badila; kebasāsukīlepo ku lundyo nansha ku lunkuso. Papo bamfumu ba bene Fidishitia benda bebalonda kunyuma kufika ne ku mukalo wa Bete-Shemeshe.
13 Bantu ba Bete-Shemeshe badi bangula mwangulo wa ñano mu dilungu dya musanza. Abo pa kutulula meso bamona Sanduku, basangala bininge pa kumumona.
14 Dikalo dyafika mu budimi bwa Yoshua mwine Bete-Shemeshe dyaimana kwine’kwa kubwipi na dibwe dikatampe. Penepo batyibulula mutyi wa ku dikalo, kupwa balambula bañombe’ba+ bu kyamulambu kisōkwe kudi Yehova.
15 Bene Levi+ batūkija Sanduku wa Yehova ne kasanduku kadi’ko mwadi byelekejo bya olo, bebitūla pa dibwe dikatampe. Bantu ba Bete-Shemeshe+ balambula byamulambu bisōkwe ne kulambula bitapwa kudi Yehova mu dine difuku’dya.
16 Bamfumu batano ba bene Fidishitia pa kumona nabya, bajokela ku Ekalone mu dine difuku’dya.
17 Ino yo nzadi ya olo yobatumīne Yehova kudi bene Fidishitia bu kyamulambu kya mambo:+ imo ya Ashedoda,+ imo ya Ngaza, imo ya Ashekelona, imo ya Ngata,+ imo ya Ekalone.+
18 Kadi buvule bwa bampuku ba olo bwadi pamo na buvule bwa bibundi byonso bya bene Fidishitia byadi bya bamfumu batano—bibundi bikomejibwe ne bibundi bityebitye bya mu ntanda bine kumo.
Kadi dibwe dikatampe dyobatūdile’po Sanduku wa Yehova dikidi bu kamoni ne dyalelo dino mu budimi bwa Yoshua mwine Bete-shemeshe.
19 Ino Leza waipaya bantu ba Bete-Shemeshe mwanda batadile ku Sanduku wa Yehova. Waipaya mu bukata mwabo bantu 50 070,* penepo bantu bashilula kudila mwanda Yehova webatapile, ke kutapa i kukunya.+
20 Ebiya bantu ba Bete-Shemeshe baipangula’mba: “Le i ani usa kubwanya kwimana ku meso a Yehova, uno Leza ujila,+ ne kadi usa kwenda kwa ani etutaluke?”+
21 Penepa batuma mikendi kudi bekadi ba Kidiata-Yeadimi+ amba: “Bene Fidishitia abajokeja Sanduku wa Yehova. Tūkai mumusele.”+
