Temote Umbajinji 3:1-16
3 Uno mwanda i ukulupilwa: Shi muntu ukimba kwikala mutadi,+ nabya usakanga mwingilo mulumbuluke.
2 Nanshi mutadi ufwaninwe kwikala wa kubulwa kutopekwa, mulume wa mukaji umo, mwibeje mu byonso, wa ñeni mibwane,*+ wampikwa kavutakanya, wa kizaji,+ muyuke kufundija,+
3 ke nkolwankolwapo,+ ke wa lūmapo,* ino i wa mutyima unekena,+ ke wa lupotopotopo,+ ke muntupo usenswe lupeto,+
4 ekale muntu wendeja* ba mu yandi njibo senene, wa bana bakōkele bininge na kusumininwa konso+
5 (mwanda shi muntu kayukilepo mwa kwendejeja* ba mu yandi njibo, le ukalela namani kipwilo kya Leza?),
6 ke muntupo waitabije panopano,+ kutyina wakayula mitatulo ne kutyibilwa butyibi bwatyibilwe Dyabola.
7 Kadi, ufwaninwe ne kunenenwa biyampe* na bantu ba panja,+ kutyina’mba wakafutululwa* ne kuponena mu dikinga dya Dyabola.
8 Bengidi ba mingilo nabo bafwaninwe kwikala belēmeke, ke ba ndimi ibidipo,* ke ba kwipānapo mu kutoma vinyu mingi, ke ba makomwa-mesopo a kumwena mu bya budimbidimbi,+
9 ino bekale balamine kifibwe kikola kya lwitabijo na mutyima wa mundamunda utōka.+
10 Kadi, bano’ba batompibwe bidi shi i bafwaninwe;* ebiya kebengila bu bengidi, byobadi bampikwa mambo.+
11 Bana-bakaji nabo bafwaninwe kwikala belēmeke, ke bavubavubapo,+ bekale bebeje mu byonso, bakōkele mu bintu byonso.+
12 Bengidi ba mingilo bekale balume ba mukaji umo umo, bendeja babo bana ne ba mu abo mobo senene.
13 Mwanda bantu bengila senene banenenwanga biyampe kadi besambanga pampikwa kafinda nansha kamo mu lwitabijo lwa mudi Kidishitu Yesu.
14 Nakulembela bino bintu, nansha byonkulupile kwiya kwako panopano,
15 ino shi naije, amba uyuke mwa kwiendejeja mu ba mu njibo ya Leza,+ ke kipwilo kya Leza mūmi kadi, kipanda kadi kikwatyijo kya bubine.
16 Bine, kifibwe kikola kya buno bwine Leza i kikatampe bya binebine: ‘Wamwekele mu ngitu,+ watelwa bu moloke mu mushipiditu,+ wamwekela bamwikeulu,+ wasapulwa mu mizo,+ waitabijibwa mu ino ntanda,+ watambulwa mūlu mu ntumbo.’
Kunshi kwa Dyani
^ Nansha’mba “wa bujalale; muntu wa lūku.”
^ Nansha’mba “ke ukupijanapo.”
^ Nansha’mba “uludika.”
^ Nansha’mba “kuludika.”
^ Nansha’mba “wakazobejibwa.”
^ Nansha’mba “kunenenwa maya.”
^ Nansha’mba “ba binenwapo bya bongojani.”
^ Nansha’mba “batompibwe shi i babwanye bisakibwa.”
