Yoano Umbajinji 5:1-21
5 Muntu ense witabija’mba Yesu i Kidishitu, i mubutulwe na Leza,+ kadi muntu ense usenswe yewa ubutwile, usenswe ne yewa ubutwilwe na aye.
2 Pano e potuyukila’mba tusenswe bana ba Leza,+ shi tusenswe Leza ne kulonda mbila yandi.
3 Mwanda buno namino bo buswe bwa Leza, amba tulame mbila yandi;+ kadi mbila yandi keilēmangapo,+
4 mwanda muntu ense* mubutulwe na Leza unekenyanga ino ntanda.+ Kadi buno bo bushindañani bwanekenya ino ntanda, ke lwitabijo lwetu kadi.+
5 Lelo i ani ukokeja kunekenya ino ntanda?+ Le ke yewapo udi na lwitabijo amba Yesu i Mwanā Leza?+
6 Uno’u ye aye waile kupityila ku mema ne mashi, Yesu Kidishitu, ke enkapo na mema kete,+ ino i na mema ne mashi.+ Kadi mushipiditu usapulanga bukamoni,+ mwanda mushipiditu i bubine.
7 Mwanda kudi bisatu bisapula bukamoni:
8 mushipiditu,+ mema+ ne mashi;+ kadi bino bisatu’bi bisapulanga bukamoni bumo bonka.
9 Shi twitabijanga bukamoni bwa bantu, bukamoni bwa Leza i bukatampe kutabuka. Mwanda buno bo bukamoni buleta Leza, bukamoni bwaleta padi wandi Mwana.
10 Muntu witabije mudi Mwanā Leza udi na bukamoni munda mwandi. Yewa kadipo na lwitabijo mudi Leza wamubepeja bubela,+ mwanda ketabijepo bukamoni buletele Leza padi wandi Mwana.
11 Buno namino bo bukamoni, amba Leza wetupele būmi bwa nyeke,+ kadi buno būmi budi mudi wandi Mwana.+
12 Yewa udi na Mwana udi na buno būmi; yewa kadipo na Mwanā Leza kadipo na buno būmi.+
13 Nemulembela bino’bi mwanda wa muyuke amba mudi na būmi bwa nyeke,+ banwe badi na lwitabijo mu dijina dya Mwanā Leza.+
14 Kadi kino kyo kikulupiji kyotumukulupile*+ amba shi tumulombe kintu kyonso, shi kika shi kika, mwendele kiswa-mutyima kyandi, witwivwananga.+
15 Kadi shi tuyukile amba witwivwananga mu byonso byotumulomba, tuyukile amba tusa kutambula byotulomba mwanda twi bamulombe’byo.+
16 Shi muntu wamone mwanabo ulonga bubi kebuletapo lufu, ukalomba, ne Leza nandi ukamupa būmi,+ i amo, ukapa’bo boba kebalongelepo bubi buleta lufu.+ Kudi bubi buleta lufu. Nkimulombwelepo kulomba pa mwanda wa buno bubi.
17 Bukondame bonso i bubi,+ ino kudi bubi kebuletapo lufu.
18 Tuyukile amba muntu ense mubutulwe na Leza kalongaloñangapo bubi, ino yewa mubutulwe na Leza* umutalanga, kadi mubi kakokejapo kumukwata.*+
19 Tuyukile amba batwe twi batambe kudi Leza, inoko ino ntanda yonsololo idi mu lupusa lwa yewa mubi.+
20 Ino tuyukile amba Mwanā Leza waile,+ kadi wetupe bujinguludi* amba tuyuke yewa mwine wa bine. Kadi tudi mu bumo na yewa mwine wa bine,+ kupityila kudi wandi Mwana Yesu Kidishitu. Aye’wa ye Leza wa bine ne būmi bwa nyeke.+
21 A twana tutyetye, mwilamei ku bilezaleza.+
Kunshi kwa Dyani
^ Kishima pa kishima i, “kintu kyonso.”
^ Nansha’mba “tunenanga pampikwa kafinda ku meso andi.”
^ Nansha’mba “kamuteñangapo.”
^ Ko kunena’mba, Yesu Kidishitu, Mwanā Leza.
^ Kishima pa kishima i, “ñeni; bukomo bwa kulanga.”
