Balopwe wa Bubidi 1:1-18
-
Ediya walaa lufu lwa Ahazia (1-18)
1 Ahaba pa kupwa kufwa, Moabu+ watombokela Isalela.
2 I kine kitatyi’kya kyaponene Ahazia pa kipunzu mu kyumba kyandi kya pangala mu Samadia wetapa bibibibi. Penepo watuma mikendi kawiinena’mba: “Endai, kepangulei Bāla-Zebuba leza wa Ekalone+ mwa kuyukila shi nsa kukoma ku kino kilonda.”+
3 Ino mwikeulu wa Yehova wanena Ediya*+ mwine Tishibi amba: “Taluka, kesambakane na mikendi ya mulopwe wa Samadia wibasapwile amba, ‘Le i mwanda kekudipo Leza mu Isalela, e kine kyomwendela kukepangula Bāla-Zebuba leza wa Ekalone?+
4 Shi ke pano Yehova wanena namino amba: “Kusapo kutaluka pa butanda polēle’po, mwanda na bubine usa kufwa.”’” Ponkapo Ediya waenda.
5 Mikendi pa kujokela kwadi, webepangula ponka na ponka’mba: “Kyomwajokela i kika?”
6 Bamulondolola’mba: “Kwadi muntu umo waiyanga kwitusambakana, wetunena’mba, ‘Endai, jokelai kudi mulopwe wimutumine mumusapwile amba, “Yehova wanena namino amba: ‘Le i mwanda kekudipo Leza mu Isalela, e kine kyowatumina bantu bakepangule Bāla-Zebuba leza wa Ekalone? Shi ke pano, kusapo kutaluka pa butanda polēle’po, mwanda na bubine usa kufwa.’”’”+
7 Ponkapo webepangula’mba: “Lelo yao muntu waiyanga kwimusambakana ne kwimusapwila bino binenwa wadi namani?”
8 Nabo bamulondolola’mba: “I mwana-mulume uvwele kivwalwa kya myoya+ ne mukaba wa kiseba mu kifuka kyandi.”+ Penepo wanena’mba: “I Ediya mwine Tishibi.”
9 Kupwa mulopwe wamutumina mukata wa 50 pamo ne bana-balume bandi 50. Aye pa kukanda kwaadi, watana Ediya ushikete pa nsongo ya lūlu. Wamunena’mba: “A muntu wa Leza wa bine,+ mulopwe wanena’mba, ‘Tūka.’”
10 Ino Ediya watentulula mukata wa 50 amba: “Eyo, shi ndi muntu wa Leza, mudilo utūke mūlu+ ukuloteje abe ne bana-balume bobe 50.” Ponkapo mudilo watūka mūlu wamuloteja aye ne bana-balume bandi 50.
11 Ebiya mulopwe wamutumina monka mukata wa 50 mukwabo pamo ne bana-balume bandi 50. Waenda kamunena’mba: “A muntu wa Leza wa bine, mulopwe wanena namino amba, ‘Tūka bukidi.’”
12 Ino Ediya webatentulula’mba: “Shi ndi muntu wa Leza wa bine, mudilo utūke mūlu ukuloteje abe ne bana-balume bobe 50.” Ponkapo mudilo wa Leza watūka mūlu wamuloteja aye ne bana-balume bandi 50.
13 Kupwa mulopwe watuma monka mukata wa 50 wa busatu ne bana-balume bandi 50. Ino mukata wa 50 wa busatu wakanda, wevukwila mu manwi andi ku meso a Ediya kamuzenze amutōkelwe mutyima, wamunena’mba: “A muntu wa Leza wa bine, nakwisāshila, leka būmi bwami ne būmi bwa* bano bengidi bobe 50 bwikale bulēme ku meso obe.
14 Mudilo ke mutūke kala mūlu ne kuloteja bakata ba 50 babidi babajinji ne bisumpi byabo bya bantu 50, ino pano leka būmi* bwami bwikale bulēme ku meso obe.”
15 Ponkapo mwikeulu wa Yehova wasapwila Ediya amba: “Tūka nandi. Kokikwatwa moyo.” Ebiya wataluka, watūkila nandi kwa mulopwe.
16 Penepo Ediya wanena mulopwe amba, “Yehova wanena namino amba: ‘Watumine mikendi kukepangula Bāla-Zebuba leza wa Ekalone.+ Le i mwanda kekudipo Leza mu Isalela?+ Mwanda waka kwamwipangwilepo? Shi ke pano, kusapo kutaluka pa butanda polēle’po, mwanda na bubine usa kufwa.’”
17 Penepa wafwa, mungya kinenwa kya Yehova kyanenene Ediya; kadi byakadipo na mwana mwana-mulume, Yeholama*+ wabikala pa kyandi kyaba, mu mwaka wa bubidi wa Yeholama+ mwanā Yehoshafata mulopwe wa Yuda.
18 Myanda mikwabo ya mānga ya Ahazia,+ byaalongele, mwene i milembwe mu mukanda wa mānga ya bitatyi bya balopwe ba Isalela?
Kunshi kwa Dyani
^ Ko kushintulula’mba “Leza Wami I Yehova.”
^ Nansha’mba “leka muya wami ne myuya ya.”
^ Nansha’mba “muya.”
^ Ko kunena’mba, mwanabo na Ahazia.
