Balopwe wa Bubidi 11:1-21
11 Atadia+ inandya Ahazia pa kumona’mba wandi mwana wafu,+ wataluka wakonakanya musuku onso wa bulopwe.*+
2 Ino Yehosheba mwanā Mulopwe Yeholama mwana-mukaji, mwanabo na Ahazia, wasela Yehoashe+ mwanā Ahazia wamunyemeja mu bana ba mulopwe badi ba kwipaibwa, wamulama aye ne muledi wandi mu kyumba kya kulāla’mo kya munda. Balonga buninge bwa kufya’ye Atadia, o mwanda kaipailwepo.
3 Washikata nandi myaka isamba, mufibwe mu njibo ya Yehova, papo Atadia uludika ntanda’ya.
4 Mu mwaka wa busamba-bubidi, Yehoyada watumanya bakete bakata ba tutwa ba balami bene Kadi ne balami* ba njibo mikatakata,+ webetyija kwadi mu njibo ya Yehova. Weivwanika* nabo ne kwibatyipija mutyipo pa uno mwanda ku njibo ya Yehova, kupwa webalombola mwanā mulopwe.+
5 Webasoñanya’mba: “Mufwaninwe kulonga namino: Mwibungei mu bisumpi bisatu. Kisumpi kibajinji kikengila mingilo mu dya Sabato kadi kikalama ndaminine njibo* ya mulopwe,+
6 kisumpi kya bubidi kikekala pa Kibelo kya Kyalwilo, ne kisumpi kya busatu kikekala pa kibelo kunyuma kwa balami ba njibo mikatakata. Mukalama njibo mwishintakanya.
7 Bibumbo byenu bibidi kebikengilapo mu dya Sabato’bya bifwaninwe kulama ndaminine njibo ya Yehova mwanda wa kukinga mulopwe.
8 Mufwaninwe kujokoloka mulopwe ku mitamba yonso, muntu ne muntu na byabulwi byandi mu kuboko. Muntu ense ukatwela mu milongo ukepaibwa. Ikalai na mulopwe konso kwaenda.”*
9 Bakata ba tutwa+ balonga enka mwebasoñaninye kitobo Yehoyada. Penepo mukata ne mukata wasela bantu bandi badi bengila mu dya Sabato pamo ne boba kebadipo bengila mu dya Sabato, batwela kwa kitobo Yehoyada.+
10 Kupwa kitobo wapa bakata ba tutwa mikobe ne mangabo majokoloke adi a Mulopwe Davida, oa adi mu njibo ya Yehova.
11 Balami ba njibo mikatakata+ bakemana pa byaba byabo, muntu ne muntu na byabulwi byandi mu kuboko, tamba ku mutamba wa lundyo wa njibo kutūla ne ku mutamba wa lunkuso wa njibo, dya ku kisōkelo+ ne dya ku njibo, bajokolokele mulopwe koku ne koku.
12 Penepo Yehoyada watambija mwanā mulopwe+ wamuvwika kilukwa* ne Bukamoni,*+ bamubikika ne kumushinga māni. Kebakupila makasa ne kunena’mba: “Mulopwe ufwa bununu!”+
13 Atadia pa kwivwana lunwa lwa bantu banyema, ponkapo waiya kwadi bantu ku njibo ya Yehova.+
14 Ebiya wamona mulopwe wimene kwine’kwa dya ku kikomo mungya kibidiji.+ Bakata ne boba bēlanga bimpungidi+ badi na mulopwe, kadi bantu bonso ba ntanda badi basangale, bēla bimpungidi. Ponkapo Atadia wasana bivwalwa byandi kadila’mba: “I kitumba! I kitumba!”
15 Ino kitobo Yehoyada wasoñanya bakata ba tutwa,+ boba batongelwe kuludika kibumbo kya divita, kaebanena’mba: “Mutalulei ku milongo, kadi yewa ense usa kumulonda, mwipayei na kipete!” Mwanda kitobo wanenene amba: “Kemwakimwipailai mu njibo ya Yehova.”
16 Ebiya bamukwata, aye pa kufika popa padi patwelela tubalwe ku njibo* ya mulopwe,+ waipailwa ponka.
17 Ebiya Yehoyada wasamba kipwano pa bukata bwa Yehova ne mulopwe ne bantu,+ amba bendelele kwikala bantu ba Yehova, kadi wasambija kipwano pa bukata bwa mulopwe ne bantu.+
18 Kupwa bantu bonso ba ntanda’ya baiya ku njibo* ya Bāla batūta bisōkelo byandi+ ne kulalakanya bankishi bandi+ fututu, baipaila Matane kitobo wa Bāla+ kumeso kwa bisōkelo.
Penepo kitobo watonga batadi ba njibo ya Yehova.+
19 Kupwa wasela bakata ba tutwa,+ balami bene Kadi, ne balami ba njibo mikatakata,+ ne bantu bonso ba ntanda’ya batambija mulopwe ku njibo ya Yehova, ebiya baiya nandi ku njibo* ya mulopwe dya ku dishinda dya kibelo kya balami ba njibo mikatakata. Penepa washikata pa lupona lwa balopwe.+
20 Penepo bantu bonso ba yoya ntanda basangala kadi kibundi kyaikala talala nyā, mwanda baipaile Atadia na kipete ku njibo ya mulopwe.
21 Yehoashe+ wadi na myaka isamba-ibidi paabikele.+
Kunshi kwa Dyani
^ Kishima pa kishima i, “lukunwa lonso lwa bulopwe.”
^ Kishima pa kishima i, “banyema lubilo.”
^ Nansha’mba “Wasamba kipwano.”
^ Nansha’mba “njibo mikatakata.”
^ Kishima pa kishima i, “patamba ne patwela.”
^ Pakwabo i muvungo wadi’mo Bijila bya Leza.
^ Nansha’mba “nkaka.”
^ Nansha’mba “njibo mikatakata.”
^ Nansha’mba “tempelo.”
^ Nansha’mba “njibo mikatakata.”
