Balopwe wa Bubidi 12:1-21
12 Mu mwaka wa busamba-bubidi wa Yehu,+ Yehoashe+ wabikala, wabikele myaka 40 mu Yelusalema. Dijina dya inandi i Zibiha wa ku Bela-Sheba.+
2 Yehoashe wadi ulonga nyeke byoloke ku meso a Yehova mafuku onso adi amufundija kitobo Yehoyada.
3 Inoko mitenta+ keyafundwilwepo, kadi bantu badi bakilambula bitapwa ne kufitula mwishi wa bitapwa pa mitenta.
4 Yehoashe wanena babitobo amba: “Yatai lupeto lonso luletwa ku njibo ya Yehova lwa byamulambu bijila,+ lupeto lunenwe kuleta muntu ne muntu,+ ne lupeto lupānwa mungya bulēme bwa muntu,* ne lupeto lonso luleta muntu ne muntu ku njibo ya Yehova+ mungya mumutonwena mutyima wandi.
5 Babitobo bakasela’lo abo bene ku bantu babo bapāna lupeto* belwingidije mwanda wa kulongolola njibo ponso poyonekele.”*+
6 Kufika ne mu mwaka wa 23 wa Mulopwe Yehoashe, babitobo badi kebalongolwele bintu byadi byonekele ku njibo.+
7 Ebiya Mulopwe Yehoashe waityija kitobo Yehoyada+ ne babitobo bakwabo kaebanena’mba: “Kyokemulongolwelapo bintu byonekele ku njibo i kika? Nanshi kemukiselai monka lupeto ku bantu benu bapāna lupeto, poso shi lwingidijibwa ku kulongolola njibo.”+
8 Ponkapo babitobo beivwanika kuleka kusela monka lupeto ku bantu ne kuleka kupebwa kiselwa kya kulongolola njibo.
9 Kupwa kitobo Yehoyada wasela sanduku,+ watubula kipunzu pa mpūto wamutūla kubwipi na kisōkelo ku lundyo shi muntu utwela mu njibo ya Yehova. Mo mwadi mutūla babitobo badi bengila bu batulama ba pa kibelo lupeto lonso lwadi luletwa mu njibo ya Yehova.+
10 Ponso pobadi bamona’mba mu sanduku mubaikala lupeto lungi, mulembi wa mulopwe ne kitobo mukatampe badi bakanda bakongakanya* ne kubala lupeto luletelwe ku njibo ya Yehova.+
11 Lupeto lobadi babala’lwa badi bapa’lo boba batongelwe kutala mwingilo wadi wingilwa mu njibo ya Yehova. Abo nabo bafuta’lo basendwe ba mityi ne bōbaki badi bengila ku njibo ya Yehova,+
12 ne ku boba badi bayenga ne boba badi basōnga mabwe. Kadi badi bapota mityi ne mabwe masōnge mwanda wa kulongolola bintu byadi byonekele ku njibo ya Yehova ne kwingidija lupeto ku bintu bikwabo byonso byadi bilomba lupeto pa kulongolola njibo.
13 Inoko, i kutupu lupeto lwadi luletwa ku njibo ya Yehova lwaingidijibwe ku kupunga byoilo bya ndalama, mikashi ya kubula nayo mudilo, ngeso, bimpungidi,+ nansha kintu kyo-kyonso kya olo nansha kya ndalama kya ku njibo ya Yehova.+
14 Badi bapa’lo enka boba badi bengila mingilo, balongolola nalo njibo ya Yehova.
15 Kebadipo balonda mwadi mwingidijibwa lupeto lwadi lupebwa bana-balume badi bapa’lo bengidi, mwanda badi bantu bakulupilwa.+
16 Inoko, lupeto lwa byamulambu bya mambo+ ne lupeto lwa byamulambu bya bubi kelwadipo luletwa ku njibo ya Yehova; lwadi lwa babitobo.+
17 I mu kine kitatyi’kya kyakandile Hazaele+ mulopwe wa Shidea kulwa na Ngata,+ ne kukwata wamukwata, kupwa papo wakanina kukatamba* Yelusalema bulwi.+
18 Ponkapo Yehoashe mulopwe wa Yuda wayata byamulambu byonso bijila byapandwile bakulutuba bandi, ba Yehoshafata, Yeholama, ne Ahazia, balopwe ba Yuda, pamo ne byamulambu byandi bijila ne olo yonso yatenwe mu bibīko bya byabulēme bya njibo ya Yehova ne bya njibo* ya mulopwe, watumina’byo Hazaele mulopwe wa Shidea.+ Penepo nandi waleka kutamba Yelusalema bulwi.
19 Myanda mikwabo ya mānga ya Yehoashe, byonso byaalongele, mwene i milembwe mu mukanda wa mānga ya bitatyi bya balopwe ba Yuda?
20 Inoko bengidi bandi beivwanikile bamukutyila kitumba,+ baipaila Yehoashe ku njibo ya pa Ndunduma,*+ mu dishinda ditūkila ku Shila.
21 Bengidi bandi, ba Yozakala mwanā Shimeata ne Yehozabada mwanā Shomela bo bamutapile ne kumwipaya.+ Bamujīka na bakulutuba bandi mu Kibundi kya Davida, ebiya wandi mwana Amazia wabikala pa kyandi kyaba.+
Kunshi kwa Dyani
^ Nansha’mba “muya.”
^ Nansha’mba “bayukane.”
^ Nansha’mba “padi mitanta.”
^ Nansha’mba “baela mu mifuko.” Kishima pa kishima i, “bakuta.”
^ Kishima pa kishima i, “Hazaele watadidija mpala yandi kukanda ku.”
^ Nansha’mba “njibo mikatakata.”
^ Nansha’mba “pa Bete-Milo.”
