Balopwe wa Bubidi 14:1-29
14 Mu mwaka wa bubidi wa Yehoashe+ mwanā Yehoahaze mulopwe wa Isalela, Amazia mwanā Yehoashe mulopwe wa Yuda wabikala.
2 Wadi na myaka 25 paabikele, wabikele myaka 29 mu Yelusalema. Dijina dya inandi i Yehoadina wa ku Yelusalema.+
3 Wadi ulonga nyeke byoloke ku meso a Yehova, ino ke pamopo bwa mukulutuba wandi Davida.+ Walongele bintu byonso mwalongēle shandi Yehoashe.+
4 Inoko mitenta keyafundwilwepo,+ kadi bantu badi bakilambula bitapwa ne kufitula mwishi wa bitapwa pa mitenta.+
5 Aye’tu pa kukomeja bulopwe mu lupusa lwandi, waipaya bengidi bandi baipaile shandi mulopwe.+
6 Inoko kaipailepo bana ba bantapani’ba, mungya mbila ya Yehova ilembelwe mu mukanda wa Bijila bya Mosesa inena’mba: “Bashabantu kebakepaibwapo pa mwanda wa babo bana, kadi bana nabo kebakepaibwapo pa mwanda wa bashabo; ino muntu ne muntu ukepaibwa pa bubi bwa aye mwine.”+
7 Waipaile bene Edoma+ mu Musanza wa Mwepo,+ bana-balume 10 000, wakwata ne kibundi kya Sela mu divita,+ kadi dijina dyakyo dyaikala ke Yokatele kufika ne dyalelo.
8 Kupwa Amazia watuma mikendi kudi Yehoashe mwanā Yehoahaze mwanā Yehu mulopwe wa Isalela amba: “Iya twikume mu bulwi.”*+
9 Yehoashe mulopwe wa Isalela watuma uno musapu kudi Amazia mulopwe wa Yuda amba: “Kayombo ka miba ka mu Lebanona katumine musapu kudi mutyi wa sedele wa mu Lebanona amba, ‘Leta obe mwana mwana-mukaji ekale mukaja wami mwana.’ Inoko, nyema wa ntanda wa mu Lebanona wapita watyampakanya kayombo ka miba’ka.
10 Shako, ubaonakanya Edoma,+ ebiya mutyima obe ubaikala na mitatulo. Sangela ntumbo yobe, ino wishikatyile mu yobe njibo.* Le kyokolomwena kyamalwa ne kupona, koshindija Yuda pamo nobe i kika?”
11 Ino Amazia kaivwenepo.+
Penepo Yehoashe mulopwe wa Isalela wakanda, ebiya aye ne Amazia mulopwe wa Yuda bekuma mu bulwi ku Bete-Shemeshe,+ kibundi kya Yuda.+
12 Yuda wanekenibwa na Isalela, penepo muntu ne muntu wanyemena kwandi.*
13 Yehoashe mulopwe wa Isalela wakwata Amazia mulopwe wa Yuda, mwanā Yehoashe mwanā Ahazia ku Bete-Shemeshe. Kupwa baiya ku Yelusalema, watubula kipunzu ku lubumbu lwa Yelusalema tamba ku Kibelo kya Efelaimi+ kutūla ne ku Kibelo kya Difinko,+ maboko 400.*
14 Wasela olo yonso ne ndalama yonso ne bintu byonso byatenwe mu njibo ya Yehova ne mu bibīko bya byabulēme bya njibo* ya mulopwe, ne misungi mine kumo. Kupwa wajokela ku Samadia.
15 Myanda mikwabo ya mānga ya Yehoashe, byaalongele ne bukomokomo bwandi ne mwaalwidile na Amazia mulopwe wa Yuda, mwene i milembwe mu mukanda wa mānga ya bitatyi bya balopwe ba Isalela?
16 Kupwa Yehoashe walādikwa mwanda wa kukōkolokwa na bakulutuba bandi, wajīkwa mu Samadia+ na balopwe ba Isalela; ebiya wandi mwana Yeloboame*+ wabikala pa kyandi kyaba.
17 Amazia+ mwanā Yehoashe mulopwe wa Yuda walāla monka myaka 15 kupwa kwa lufu lwa Yehoashe+ mwanā Yehoahaze mulopwe wa Isalela.+
18 Myanda mikwabo ya mānga ya Amazia, mwene i milembwe mu mukanda wa mānga ya bitatyi bya balopwe ba Yuda?
19 Mwenda mafuku bamukutyila kitumba+ ku Yelusalema, aye wanyemena ku Lakishi, ino batuma bana-balume ba kumulonda ku Lakishi, bamwipaila konka.
20 Ebiya bamusela pa tubalwe bamujokeja, bamujīka mu Yelusalema na bakulutuba bandi mu Kibundi kya Davida.+
21 Penepo bantu bonso ba Yuda basela Azadia,*+ wadi na myaka 16,+ bamubikika pa kyaba kya shandi Amazia.+
22 Waubakulula kibundi kya Elate+ ne kwikijokeja ku Yuda kupwa kwa mulopwe* kulādikwa mwanda wa kukōkolokwa na bakulutuba bandi.+
23 Mu mwaka wa 15 wa Amazia mwanā Yehoashe mulopwe wa Yuda, Yeloboame+ mwanā Yehoashe mulopwe wa Isalela wabikala mu Samadia, wabikele myaka 41.
24 Wadi ulonga nyeke bibi ku meso a Yehova. Kafundukilepo ku bubi bonso bwa Yeloboame mwanā Nebata bwaalubije Isalela.+
25 Wajokeja mukalo wa Isalela tamba ku Lebo-Hamata*+ kutūla ne ku Dijiba dya Alaba,*+ mungya kinenwa kya Yehova Leza wa Isalela kyaanenene kupityila kudi mwingidi wandi Yona+ mwanā Amitai, mupolofeto wa ku Ngate-Hefe.+
26 Mwanda Yehova wamwene malwa makatampe mpata a Isalela.+ Kekwashelepo muntu nansha umo, nansha’tu mufudile nansha muzoze wa kukwasha Isalela.
27 Ino Yehova walaile amba kakakombelejapo dijina dya Isalela munshi mwa diulu.+ O mwanda webakūdile na kuboko kwa Yeloboame mwanā Yehoashe.+
28 Myanda mikwabo ya mānga ya Yeloboame, byonso byaalongele ne bukomokomo bwandi, mwaalwidile ne mwaajokejeje Damakasa+ ne Hamata+ ku Yuda mu Isalela, mwene i milembwe mu mukanda wa mānga ya bitatyi bya balopwe ba Isalela?
29 Kupwa Yeloboame walādikwa mwanda wa kukōkolokwa na bakulutuba bandi, na balopwe ba Isalela; ebiya wandi mwana Zekadia+ wabikala pa kyandi kyaba.
Kunshi kwa Dyani
^ Nansha’mba “twitane mpala na mpala.”
^ Nansha’mba “njibo mikatakata.”
^ Kishima pa kishima i, “pema.”
^ Kintu kya mametele 178 (mayo 584). Tala Mbwejo B14.
^ Nansha’mba “njibo mikatakata.”
^ Ko kunena’mba, Yeloboame II.
^ Ko kushintulula’mba “Yehova Wakwasha.” Witwanga bu Uzia mu 2Ba 15:13; 2Bi 26:1-23; Isa 6:1; ne Zek 14:5.
^ Ko kunena’mba, shandi Amazia.
^ Nansha’mba “kibelo kya Hamata.”
^ Ko kunena’mba, Dijiba dya Mwepo, nansha’mba Dijiba Difwe.
