Balopwe wa Bubidi 15:1-38
15 Mu mwaka wa 27 wa Yeloboame* mulopwe wa Isalela, Azadia*+ mwanā Amazia+ mulopwe wa Yuda wabikala.+
2 Wadi na myaka 16 paabikele, wabikele myaka 52 mu Yelusalema. Dijina dya inandi i Yekodia wa ku Yelusalema.
3 Wadi ulonga nyeke byoloke ku meso a Yehova na mwalongēle shandi Amazia.+
4 Inoko mitenta keyafundwilwepo,+ kadi bantu badi bakilambula bitapwa ne kufitula mwishi wa bitapwa pa mitenta.+
5 Yehova wasanshija mulopwe waikala nyeke wa makopo+ kufika ne difuku dyaafwile; kadi wadi ushikete mu njibo ya kufula,+ papo Yotama+ mwanā mulopwe uludika njibo,* utyibila bantu ba ntanda’ya mambo.+
6 Myanda mikwabo ya mānga ya Azadia,+ byonso byaalongele, mwene i milembwe mu mukanda wa mānga ya bitatyi bya balopwe ba Yuda?
7 Kupwa Azadia walādikwa mwanda wa kukōkolokwa na bakulutuba bandi,+ bamujīka na bakulutuba bandi mu Kibundi kya Davida; ebiya wandi mwana Yotama wabikala pa kyandi kyaba.
8 Mu mwaka wa 38 wa Azadia+ mulopwe wa Yuda, Zekadia+ mwanā Yeloboame wabikala pa Isalela mu Samadia, wabikele myeji isamba.
9 Walongele bibi ku meso a Yehova na mwalongēle bakulutuba bandi. Kafundukilepo ku bubi bwa Yeloboame mwanā Nebata bwaalubije Isalela.+
10 Kupwa Shalumu mwanā Yabeshe wamukutyila kitumba, wamutapila+ ku Ibeleame.+ Pa kupwa kumwipaya, wabikala pa kyandi kyaba.
11 Myanda mikwabo ya mānga ya Zekadia i milembwe mu mukanda wa mānga ya bitatyi bya balopwe ba Isalela.
12 Kino kyafikidije kinenwa kya Yehova kyaanenene Yehu amba: “Nkongo iná ya bobe bana+ ikashikata pa lupona lwa Isalela.”+ Kadi ye mobyalongekele.
13 Shalumu mwanā Yabeshe wabikala mu mwaka wa 39 wa Uzia+ mulopwe wa Yuda, wabikele kweji mutuntulu mu Samadia.
14 Kupwa Menahema mwanā Ngādi watamba ku Tiza+ wakanda ku Samadia, watapa Shalumu+ mwanā Yabeshe mu Samadia. Pa kupwa kumwipaya, wabikala pa kyandi kyaba.
15 Myanda mikwabo ya mānga ya Shalumu ne kitumba kyaakutyile, i milembwe mu mukanda wa mānga ya bitatyi bya balopwe ba Isalela.
16 I mu kine kitatyi’kya kyaile Menahema kutamba ku Tiza, waonakanya Tifisa ne bonso badi’mo ne ntanda yandi mine, mwanda kamushitwidilepo bibelo. Wamonakanya ne kusaba mafu a bana-bakaji ba memi badi’mo.
17 Mu mwaka wa 39 wa Azadia mulopwe wa Yuda, Menahema mwanā Ngādi wabikala pa Isalela, wabikele myaka dikumi mu Samadia.
18 Wadi ulonga nyeke bibi ku meso a Yehova. Kafundukilepo ku bubi bonso bwa Yeloboame mwanā Nebata bwaalongeje Isalela,+ mu mafuku andi onso.
19 Pūla+ mulopwe wa Ashidia watwela mu ntanda’ya, penepo Menahema wapa Pūla talenta* 1 000 ya ndalama mwanda wamukweshe akomeje bulopwe bininge.+
20 Ebiya Menahema wakonga ndalama mu Isalela, weilunga ku bantu balēme kadi bampeta.+ Wapa mulopwe wa Shidea mashekele* 50 a ndalama a muntu ne muntu. Kupwa mulopwe wa Ashidia wajoka, kashelepo monka mu ntanda’ya.
21 Myanda mikwabo ya mānga ya Menahema,+ byonso byaalongele, mwene i milembwe mu mukanda wa mānga ya bitatyi bya balopwe ba Isalela?
22 Kupwa Menahema walādikwa mwanda wa kukōkolokwa na bakulutuba bandi, ebiya wandi mwana Pekaya wabikala pa kyandi kyaba.
23 Mu mwaka wa 50 wa Azadia mulopwe wa Yuda, Pekaya mwanā Menahema wabikala pa Isalela mu Samadia, wabikele myaka ibidi.
24 Wadi ulonga nyeke bibi ku meso a Yehova. Kafundukilepo ku bubi bwa Yeloboame mwanā Nebata bwaalongeje Isalela.+
25 Kupwa sola wandi mukwashi Peka,+ mwanā Lemadia wamukutyila kitumba, wamutapila mu Samadia mu kiteba kikomejibwe kya njibo* ya mulopwe pamo ne Alekoba ne Adie. Wadi na bana-balume 50 ba ku Ngileade; pa kupwa kumwipaya, wabikala pa kyandi kyaba.
26 Myanda mikwabo ya mānga ya Pekaya, byonso byaalongele, i milembwe mu mukanda wa mānga ya bitatyi bya balopwe ba Isalela.
27 Mu mwaka wa 52 wa Azadia mulopwe wa Yuda, Peka+ mwanā Lemadia wabikala pa Isalela mu Samadia, wabikele myaka 20.
28 Wadi ulonga nyeke bibi ku meso a Yehova, kafundukilepo ku bubi bwa Yeloboame mwanā Nebata bwaalubije Isalela.+
29 Mu mafuku a Peka mulopwe wa Isalela, Tilate-Pilese+ mulopwe wa Ashidia watwela ku bukomo wakwata Iyona, Abele-Bete-Maka,+ Yanoa, Kedesha,+ Hazola, Ngileade,+ ne Ngadilea, ntanda yonso ya Nafatale,+ waselela bekadi mu Ashidia bu misungi.+
30 Kupwa Hoshea+ mwanā Elā wakutyila Peka mwanā Lemadia kitumba, wamutapa wamwipaya; ebiya wabikala pa kyandi kyaba mu mwaka wa 20 wa Yotama+ mwanā Uzia.
31 Myanda mikwabo ya mānga ya Peka, byonso byaalongele, i milembwe mu mukanda wa mānga ya bitatyi bya balopwe ba Isalela.
32 Mu mwaka wa bubidi wa Peka mwanā Lemadia mulopwe wa Isalela, Yotama+ mwanā Uzia+ mulopwe wa Yuda wabikala.
33 Wadi na myaka 25 paabikele, wabikele myaka 16 mu Yelusalema. Dijina dya inandi i Yelusha mwanā Zadoki.+
34 Wadi ulonga nyeke byoloke ku meso a Yehova na mwalongēle shandi Uzia.+
35 Inoko mitenta keyafundwilwepo, kadi bantu badi bakilambula bitapwa ne kufitula mwishi wa bitapwa pa mitenta.+ Aye ye waubakile kibelo kya pangala kya njibo ya Yehova.+
36 Myanda mikwabo ya mānga ya Yotama, byaalongele, mwene i milembwe mu mukanda wa mānga ya bitatyi bya balopwe ba Yuda?
37 Mu mene mafuku’a Yehova washilula kutuma Lezina mulopwe wa Shidea ne Peka+ mwanā Lemadia bakalwe Yuda bulwi.+
38 Kupwa Yotama walādikwa mwanda wa kukōkolokwa na bakulutuba bandi, wajīkwa na bakulutuba bandi mu Kibundi kya Davida mukulutuba wandi. Ebiya wandi mwana Ahaza wabikala pa kyandi kyaba.
Kunshi kwa Dyani
^ Ko kunena’mba, Yeloboame II.
^ Ko kushintulula’mba “Yehova Wakwasha.” Witwanga bu Uzia mu 2Ba 15:13; 2Bi 26:1-23; Isa 6:1; ne Zek 14:5.
^ Nansha’mba “njibo mikatakata.”
^ Talenta imo i makilo 34,2. Tala Mbwejo B14.
^ Shekele imo i mangalame 11,4. Tala Mbwejo B14.
^ Nansha’mba “Njibo mikatakata.”
